44. पतरस कने यूहन्ना दे जरिये इक्क लंगड़े भिखारी जो चंगा करणा

इक्क दिन, पतरस कने यूहन्ना प्रार्थना करणे तांई मंदरे च गे। ताह़लू लोक इक्क लंगड़े भिखारी माणुये जो लेई करी आये, कने तिन्हां तिसियो मंदरे बाहर बैठाई दित्ता तांजे सैह़ ओणे-जाणे आल़े लोकां ते भीख मंगी सकैं। जाह़लू तिन्हीं पतरस कने यूहन्ने जो मंदरे च जांदे दिख्या तां तिन्हां ते भीख मंगणा लग्गा।

पतरसैं तिस लंगड़े माणुये दी तरफ दिख्या कने ग्लाया, “मिन्जो अल्ल तिज्जो देणे तांई पैसे तां नीं हन। अपर जेह्ड़ा मिन्जो अल्ल ऐ सैह़ मैं तिज्जो दिंदा ऐ। यीशु दे नांऐ ते, उठ कने चल-फिर!"

तिसी बग्त परमात्मैं तिस लंगड़े माणुये जो खरा करी दित्ता। सैह़ चलणा-फिरणा लग्गी पेआ कने परमात्मे दी स्तुति करणा लग्गा। मंदरे च खड़ौत्यो लोक तिसियो दिक्खी करी हराण होई गे।

तिसी बग्त लोकां दी इक्क भीड़ तिस माणुये जो दिखणे तांई आई जेह़ड़ा खरा होई गेआ था। पतरसैं तिन्हां नैं ग्लाया, "एह माणु खरा दिक्खी करी हरान मत होआ। अहां इसियो अपणिया ताकता नैं खरा नीं कित्या ऐ, या इसतांई नी कि अहां परमात्मे दा आदर करदे हन। बल्कि, सैह़ यीशु ऐ जिन्हीं इस माणुये जो अपणिया सामर्थी नैं खरा कित्ता ऐ, क्जोकि अहां यीशु पर बसुआस करदे हन।”

“सैह़ तुहां ही हन जिन्हां तिस राज्यपाल पिलातुसे नैं यीशु जो मारी देणे तांई ग्लाया था। तुहां तिसियो मारी दित्ता जेह्ड़ा सबना जो ज़िन्दगी दिंदा ऐ। अपर परमात्मैं तिसियो मरेयां ते दोबारा जिन्दा करी दित्ता ऐ। तुहां नीं समझेया कि तुहां क्या करा दे थे, अपर जाह़लू तुहां तिन्हां कम्मां जो करा दे थे, तां जेह़ड़ा भविष्यवक्तां ग्लाया था सैह़ पूरा होएया। तिन्हां ग्लाया था कि मसीह दुख झेलगा कने मरी जांगा। परमात्मैं एह़ इस तरीके नैं होणा दित्ता। इसतांई हुण अपणे पापां ते पश्चाताप करा कने परमात्मे दिया तरफा मुड़ा, तांजे सैह़ तुहां देयां पापां जो धोई करी साफ़ करी दैं।"

जाह़लू मंदरे दे अगुवां पतरस कने यूहन्ने दियां गल्लां जो सुणेया, तां सैह़ बड़े जादा घबराई गै। इसतांई तिन्हां सैह़ गिरफ्तार करी ले कने जेला च पाई दित्ता। अपर जेह़ड़ा पतरसैं ग्लाया था तिस पर मतेआं लोकां बसुआस कित्ता। यीशु पर बसुआस करणे आल़े लोकां दी गिणती लगभग 5,000 होई गेई।

अगले दिन इआं होएया कि सैह़ यहूदी अगुवे पतरस कने यूहन्ने जो महायाजके कने होर धार्मिक अगुवां दे सामणैं लेई करी आये। सैह़ तिस माणुये जो भी लेई करी आये जेह़ड़ा लंगड़ा था। तिन्हां पतरसे कने यूहन्ने ते पुछया, “इस लंगड़े माणुये जो खरा करणे दी सामर्थ कने अधिकार कुणी दित्ता?"

पतरसै जवाब दित्ता, "एह़ माणु जेह्ड़ा तुहां सामणैं खड़ौत्या ऐ तिसियो यीशु मसीह दिया सामर्थी नैं खरा कित्या ऐ। तुहां यीशु जो सूल़िया पर टुँगी दित्ता, अपर परमात्मैं तिसियो दोबारा ते जिन्दा करी दित्ता। तुहां तिसियो अपनाया नीं, अपर यीशु मसीह ते अलावा उद्धार पाणे दा कोई दूया रस्ता नीं ऐ!"

सैह अगुवे पतरस कने यूहन्ने दियां गल्लां सुणी करी हरान होई गे। तिन्हां दिख्या कि एह़ आम माणु थे कने अनपढ़ थे। अपर भिरी तिन्हां जो याद आएया कि एह़ माणु तां यीशु सौगी रैंह्दे थे। इसतांई तिन्हां पतरस कने यूहन्ने जो ग्लाया, “जे तुहां यीशु दे बारे च लोकां जो कोई होर संदेस सुणाया, तां अहां तुहां जो खतरनाक सजा दिंगे।" इन्हां गल्लां ग्लाणे ते बाद, तिन्हां पतरस कने यूहन्ने जो डराई-धमकाई करी जाणा दित्ता।