43. कलीसिया दी सुरूआत होणा

यीशुये दा सुअर्गे जो वापस चली जाणे ते बाद, चेले यरूशलेम सैहरे च रुकी गे जेह्ड़ा यीशुयैं तिन्हां जो करणे दा हुकम दित्या था। तित्थु दे बसुआसी लोक लागातार प्रार्थना करणे तांई किट्ठे हुंदे थे।

हर साल, फसह दा त्योहार 50 दिन बाद, यहूदी लोक पिन्तेकुस्त नाए दे इक्क खास दिने जो मनांदे थे। पिन्तेकुस्त आल़े दिन यहूदी लोक कणका दी बड्डाईया दी खुसी मनांदे थे। सारे संसारे ते यहूदी लोक पिन्तेकुस्त आल़े दिन जो मनाणें तांई यरूशलेम सैहरे च आएयो थे। इस साल, पिन्तेकुस्त मनाणे दा बग्त यीशुये दा सुअर्ग चले जाणे दे लगभग इक्क हफ्ते बाद आएया था।

पिन्तेकुस्त आल़े दिन सारे बसुआसी लोक इक्की जगाह पर किट्ठे थे, जिस घरे च सैह़ थे तित्थु चाणचक तेज हौआ दी उआज़ होई कने सारा गुंजी गेआ। ताह़लू तिन्हां दे सामणे अग्गी दियां ऐदिआं लपटां प्रकट होईआं कने सारे बसुआसियां देयां सिरां पर आई गियां। सैह़ सारे पवित्र आत्मा नैं भरौई गे कने तिन्हां होरनी भासां च प्रभु परमात्मे दी अराधना कित्ती। एह़ सैह़ भासां थियां जिन्हां जो ग्लाणे तां तिन्हां जो पवित्र आत्मा त्यार कित्या था।

जाह़लू यरूशलेम सैहरे च रैंहणे आल़ेआं लोकां सैह़ उआज़ सुणी, तां एह़ दिखणे तांई सारे लोक किट्ठे होई गे कि एह़ क्या होआ दा ऐ। तिन्हां बसुआसी लोकां जो प्रभु परमात्मे दे जरिये कित्ते गे बड्डे-बड्डे कम्मां दा एलान करदे सुणेया। सैह़ हरान थे क्जोकि बेसक सैह़ लग्ग-लग्ग देसां ते आएयो थे कने लग्ग-लग्ग भासा ग्लांदे थे अपर सैह़ भी तिन्हां कम्मां जो अपणिया भासा च सुणना लगेयो थे। चेले इस्राएल देसे थे कने अरामी, इब्रानी कने यूनानी भासा ग्लांदे थे, अपर लोक अपणिया-अपणिया भासा च सुणा दे थे कि परमात्मे क्या-क्या कित्ता।

इन्हां च कुच्छ लोक ग्लाणा लग्गे कि सैह़ चेले नशे च थे। अपर पतरस खडौई गेआ कने तिन्हां नैं ग्लाया, "मेरी गल्ल सुणा! एह़ लोक नशे च नी हन! इसदे बजाए, जेह्ड़ा तुहां दिखदे हन सैह़ एई ऐ जेह्ड़ा योएल भविष्यवक्तैं ग्लाया था कि एह़ होणा ऐ। परमात्मैं ग्लाया, “आखरी दिनां च, मैं सब लोक अपणिया आत्मा नैं भरी दिंगा।”

“हे इस्त्राएली लोको, यीशु इक्क एदेया माणु था जिन्हीं एह़ दस्सणे तांई कि मैं कुण ऐ मते सारे अनोखे कम्म कित्त्यो थे। तिन्हीं परमात्मे दिया सामर्थी नैं मते सारे अनोखे कम्मां जो कित्ते थे। तुहां एह़ जाणदे हन, कजोकि तुहां इन्हां कम्मां जो दिख्या ऐ। अपर तुहां तिसियो सूल़िया पर टुँगी दित्ता।”

यीशु मरी गेआ था अपर परमात्मैं तिसियो मरेयां ते दोबारा जिन्दा करी दित्ता। तिन्हीं सैह़ गल्ल पूरी करी दित्ती जेह्ड़ी इक्क भविष्यवक्तैं लिखियो थी: कि ‘तू अपणे पवित्र माणुये जो कब्रा च सड़ना नीं दिंगा।’ अहां इसा गल्ला दे गवाह हन कि परमात्मैं यीशुये जो दोबारा ते जिन्दा करी दित्ता।

“पिता परमात्मैं हुण यीशुये जो अपणे सज्जे पास्सैं बैठाई करी तिसियो आदर दित्ता ऐ। कने यीशुयैं अहां तांई पवित्र आत्मा घल्लया ऐ जिसदा तिन्हीं वादा कित्या था कि मैं घल्लगा। पवित्र आत्मा ई तिन्हां कम्मां जो पूरा करदा ऐ जिन्हां जो तुहां दिखा दे कने सुणा दे हन।”

“तुहां तिस माणुये, मतलब यीशुये जो सूल़िया पर टुँगी दित्ता। अपर जिसते तुहां जाणी लेआ कि परमात्मैं यीशुये जो सारियां चीज्जां पर प्रभु कने मसीह दोयो ठैहराया ऐ!"

पतरसे दिया गल्ला जो सुणने आल़े लोक तिसदियां गल्लां नैं अन्दरे तिकर हिल्ली गियो थे। इसतांई तिन्हां पतरस कने चेलेयां ते पुछया, “भाऊओ, अहां जो क्या करना चाइदा।”

पतरसैं तिन्हां जो जवाब दित्ता, “तुहां च हर इक्क माणु अपणे पापां ते पश्चाताप करैं तांजे परमात्मा तुहां देयां पापां जो माफ करैं, कने यीशु मसीह दे नांऐ ते बपतिस्मा लैं। ताह़लू सैह़ तुहां जो पवित्र आत्मा दा वरदान दिंगा।"

पतरसे दिया गल्ला सुणी करी लगभग 3,000 लोकां यीशु पर बसुआस कित्ता कने सैह़ यीशुये दे चेले बणी गै। तिन्हां बपतिस्मा लेआ कने यरूशलेम सैहरे दिया कलेसियादा हिस्सा बणी गे।

जाह़लू प्रेरितां तिन्हां जो सिक्षा दित्ती, तां बसुआसियां लगातार ध्याने नैं सुणी। सैह़ अप्पु च किट्ठे होई नैं संगति करदे थे कने इक्की दूये तांई प्रार्थना करदे थे, कने प्रभु भोज भी करदे थे। सैह़ मिली नैं परमात्मे दी स्तुति करदे थे कने जेह़ड़ा कुच्छ भी तिन्हां अल्ल था तिसियो अप्पु च बंडी लैंदे थे। तिस सैहरे दा हर इक्क माणु तिन्हां तांई अच्छा वचार रखदा था हर दिन, जादा ते जादा लोक बसुवासी बणदे गे।