42. यीशु दा सुअर्गे जो वापस जाणा

जिस दिन परमात्मैं यीशुये जो मरेयां ते दोबारा जिन्दा कित्ता था, तिसदे दो चेले कुसी ग्रांए च जा दे थे। कने रस्ते चलेयो इसा गल्ला दे बारे च गल्ल करा दे थे जेह्ड़ा यीशु सौगी होएया था सैह़ ग्ला दे ते कि सैह़ मसीह था, अपर तमी सैह़ मारेया गेआ। हुण सैह़ जणासां ग्ला दियां हन कि सैह़ दोबारा ते जिन्दा होई गेआ ऐ। सैह़ नी जाणदे थे कि कुसा गल्ला पर बसुआस करन।

यीशुयैं आई करी तिन्हां चेलेयां सौगी चलणा लग्गा, अपर सैह़ तिसियो पणछैणी नीं सके। यीशुयैं तिन्हां ते पुछया कि तुहां कुसदे बारे च गल्लां करा दे हन। तिन्हां तिसियो पिछलेयां दिनां च यीशु सौगी होईयो सारी घटना दे बारे च दस्सेया। सैह़ सोचणा लग्गे, कि अहां कुसी परदेसी माणुये सौगी गल्लां करा दे हन जेह्ड़ा नीं जाणदा ऐ कि यरूशलेम सैहरे च क्या होएया था।

ताह़लू यीशुयैं तिन्हां जो समझाया कि परमात्मे दा वचन मसीह दे बारे च क्या ग्लांदा ऐ। बड़ी पैहल्लैं, भविष्यवक्तां ग्लाया था कि बुरे लोक मसीह जो पीड़ित करगे कने मारी दिंगे। अपर भविष्यवक्तां एह़ भी ग्लाया था कि सैह़ त्रीये दिनैं दोबारा भिरी जिन्दा होई जांगा।

जाह़लू सैह़ तिस सैहरे च पुज्जे जित्थु सैह़ दोयो रूकणा चांह़दे थे, ताह़लू लगभग संझ होई गियो थी। तिन्हां यीशु जो अपणे सौगी रूकणे तांई ग्लाया, तां सैह़ तिन्हां सौगी इक्की घरे च गेआ, कने सैह़ संझा दे खाणा खाणे तांई बैठी गे। यीशुयैं इक्क रोटी लेई कने परमात्मे दा धन्यवाद कित्ता, कने भिरी सैह़ तोड़ी। ताह़लू इकदम तिन्हां जो पता लग्गी गेआ कि एह़ यीशु ऐ। अपर ताह़लू तिकर सैह़ तिन्हां दिया नजरा ते गायब होई गेआ था।

भिरी सैह़ दोयो इक्की दूये नैं ग्लाणा लग्गे, "सैह़ यीशु था! इसतांईं जाह़लू तिन्हीं अहां जो परमात्मे दे वचने ते समझया था तां अहां बड़े खुस थे।” सैह़ तिसी बग्त यरूशलेम सैहरे जो वापस चली गे। जाह़लू सैह़ पुज्जे तां तिन्हां बाकि चेलेयां जो दस्सेया, "यीशु सच्ची च जिन्दा होई गेआ ऐ! अहां तिसियो दिख्या ऐ!"

जाह़लू चेले गल्लां करा दे थे, ताह़लू यीशु चाणचक तिस कमरे च तिन्हां दे सामणैं प्रकट होई गेआ। यीशुयैं तिन्हां नैं ग्लाया, "तुहां जो सांति मिल्लैं!" चेलेयां सोचेया कि एह़ कोई भूत ऐ, अपर यीशुयैं तिन्हां जो ग्लाया, "तुहां क्जो डरा दे हन? तुहां एह़ क्जो नी सोचदे कि एह़ सच्ची च मैं यीशु ऐ? मेरे हत्थां-पैरां जो दिखा। क्जोकि भूतां दा हड्डी कने मांस नीं हुंदा जेह्ड़ा तुहां मिन्जो च दिख्या ऐ।" यीशुयैं एह़ दस्सणे तांईं कि मैं कोई भूत नीं ऐ, तिन्हां ते कुच्छ खाणे तांई मंगेया। तिन्हां तिसियो मच्छिया दा इक्क पीस दित्ता, कने तिन्हीं तिसियो खाई लेआ।

यीशुयैं ग्लाया, “मेरे बारे च परमात्मे दा वचन जेह़ड़ा कुच्छ भी ग्लांदा ऐ सैह़ पूरा हुंगा। मैं तुहां जो दस्सी दित्या था कि एह़ सब होणा जरूरी ऐ।" ताह़लू यीशुयैं तिन्हां जो परमात्मे दा वचन खरे कित्ते समझाया। तिन्हीं ग्लाया, “बड़ी पैहल्लैं भविष्यवक्तां लिख्या था, कि मसीह जो, मतलब मिन्जो दुख झेलणा हुंगा, मरणा हुंगा कने भिरी त्रीये दिनैं मरेयां ते दोबारा जिन्दा होणा हुंगा।"

तिन्हां भविष्यवक्तां एह़ भी लिख्या था कि मेरे चेले परमात्मे दे वचन लोकां जो प्रचार करगे। कने हर इक्क माणु जो वचने दे जरिये दस्सगे कि अपणे पापां ते पश्चाताप करा। जे सैह़ इआं करदे हन तां परमात्मा तिन्हां देयां पापां जो माफ करगा। मेरे चेले इस संदेसे दा प्रचार यरूशलेम सैहरे ते सुरू करगे। ताह़लू सैह़ सारियां जगांह कने सारियां जातिआं च जांगे। कने जेह्ड़ा कुच्छ मैं ग्लाया कने कित्ता कने जेह्ड़ा कुच्छ मिन्जो सौगी होएया, तुहां इन्हां सारियां गल्लां दे गवाह हन।”

इन्हां चाल़ी दिनां च, यीशु अपणे चेलेयां जो मती बरी दुस्सेया। इक्क बरी तां सैह़ इक्क ई बग्ते पर 500 ते भी जादा लोकां जो दुस्सेया। तिन्हीं अपणेयां चेलेयां जो मते तरिकेयां नैं साबित कित्ता कि मैं मरेयां ते दोबारा जिन्दा होई गेआ ऐ, कने यीशुयैं तिन्हां जो परमात्मे दे राज्ज दे बारे च सिक्षा दित्ती।

यीशुयें अपणे चेलेयां जो ग्लाया, “पिता परमात्मे मिन्जो सुअर्ग कने धरतिया दा सारा अधिकार मिन्जो दित्या ऐ। इसतांई हुण मैं तुहां नैं ग्लांदा ऐ: जाई करी सारी जातिआं दे लोकां जो चेला बणां। कने तिन्हां जो पिता, पुत्तर कने पवित्र आत्मा दे नांए ते बपतिस्मा देआ। जेह्ड़े भी मैं तुहां जो हुक्म दित्ते हन तिन्हां सारे हुक्मां जो मनणे भी हन कने लोकां जो सखाणे भी हन। याद रखा, मैं हमेसा तुहां सौगी ऐ।"

यीशुये दे मरेयां ते दोबारा जिन्दा होणे दे चाल़ी दिन बाद, तिन्हीं अपणे चेलेयां नैं ग्लाया, “सुणा मैं तुहां पर पवित्र आत्मा घल्लगा जिसदा वादा मेरे पिता परमात्मैं कित्या था, अपर जाह़लू तिकर मेरा पिता परमात्मा तुहां जो सामर्थ नीं दिंदा ऐ ताह़लू तिकर यरूशलेम सैहरे च रुक्की रेह्आ।” इन्हां गल्लां करणे ते बाद यीशु सुअर्गे जो वापस चली गेआ, कने इक्की बदल़ैं तिसियो तिन्हां दिया नजरा ते लक्काई लेआ। यीशु सुअर्गे च सारी चीज्जां पर राज्ज करणे तांई परमात्मे दे सज्जे पास्सैं बैटी गेआ।