18. राज्य नि विभागणी

बराच वरीस नंतर, दाविद मरी ग्या आणि तेना पुत्र शलमोन इस्राएल देश वर राज्य करू लागणा. परमेश्वर नि शलमोन ले दर्शन दिध व तेले सर्वास्तून जास्त काय पाहिजे अस विचार. जव शलमोन नि बुद्धी मांगी तव परमेश्वर तेनावर खुश हुईना व तेनी तेले जग मधला सर्वास्तून ज्ञानी व्यक्ती बनाव. शलमोन नि गैरा गोष्टी शिकात व तो एक सुनामी न्यायाधीश बनना. परमेश्वर नि तेले गैरा मालदार बी कर.

आपला बाप दाविद ना योजना ना प्रमाणे व तेनी जमा करेल सामग्री कण शलमोन नि यरुशलेम शहर मा एक मंदिर बांध. लोक दर्शनमंडप ना समोर स्तुती नई करत आते मंदिर मा परमेश्वर नि स्तुती व अर्पण कराले लागनात. परमेश्वर मंदिर मा उना व तेनी उपस्थिती त्या मंदिर मा होती, आणि परमेश्वर आपला लोकस्मा राहाले लागणा.

पण शलमोन नि दुसरा देश ना बायास्वर प्रेम कर. तेनी गैरा बायास संगे लगन करीसन परमेश्वर ना आज्ञास्ले मोळ. तेनी 1000 बायास संगे लगन कर. तेस्ना मधून गैरा बाया दुसरा देश ना होत्यात तीस्नी आपला देवतास्ले आपला बरोबर आन आणि तेस्नी पूजा कराले चालू ठेव. शलमोन धल्ला हवा नंतर तेनी बी तेस्ना देवतास्नी पूजा करी.

परमेश्वर शलमोन नि करेल काम ना बारामा तेनावर रागे भरणा. तेना ह्या अविश्वासू पणा मुळे परमेश्वर नि तेले दंड दिध. परमेश्वर नि शलमोन नि मृत्यु नंतर इस्राएल देश न राज्य ना दोन भाग करा.

शलमोन नि मृत्यु नंतर तेना पोऱ्या रहोबाम राजा बनना. रहोबाम हवू एक मूर्ख माणुस होता. इस्राएल देश मधला सर्वा लोक तेले राजा म्हनिसन मान्यता दिसन तेना राज्याभिषेक कराले एकत्र हुईनात. तेस्नी रहोबाम कळे तक्रार करी कि, शलमोन नि तेस्ले गैरा कष्ट कराले लाव व जास्त प्रमाण कण कर वसूल कर.

रहोबाम नि मूर्खपणा कण उत्तर दिध,“तुम्हाले वाटी ऱ्हायन अशीन कि मना बाप शलमोन नि तुमना कळून कष्ट कराई लीयेल शे, पण मी त तेना तून बी जास्त कष्ट तुमना कळून कराई लेसू व तुमना संगे कळक वागसू.”

इस्राएल देश ना दहा गोत्रस्नी एकत्र ईसन रहोबाम ना विरुद्ध मा विद्रोह कर. फक्त दोनच गोत्र तेना संगे विश्वासू ऱ्हायनात. ह्या दोन गोत्र मियसन यहूदा ना राज्य बनना.

इस्राएल देश ना दुसरा दहा विरोधी गोत्रस्नी यरुबाम नाव ना माणुस ले आपला राजा म्हनिसन नेम. तेस्नी उत्तर कळला भाग मा आपला राज्य नि स्थापना करी व तेस्ले इस्राएलीस्ना राज्य अस म्हणामा ऊन.

यरुबाम नि परमेश्वर ना विरुद्ध विद्रोह कर व लोकस्ले पाप मा पाळ. यहूदा ना राज्य मधला मंदिर मा स्तुती नई करत तेनी आपला लोकस साठे दोन मुर्तीस्ले स्थापित कर व तेस्नी पूजा कराले लागणा.

यहूदा ना राज्य व इस्राएल देश ना राज्य एकमेकस्ना शत्रू बनी ग्यात व तेस्ना मा कायम झगळा होवाले लागनात.

इस्राएल ना नवीन राज्य मा सर्वाच राजा द्रुष्ट होतात. तेस्ना मधून गैरास्ना वध बिगर इस्राएल देश ना लोकस्नीच कर ज्या तेस्ना जागा वर राज्य कराना देखत होतात.

सर्वा राजा आणि इस्राएल देश ना राज्य मधला बहुसंख्य लोक मुर्ती नि पूजा करू लागनात. तेस्ना ह्या मुर्तीपूजा मा व्यभिचार व नरबलीस्ना (पोरस्ना अर्पण) समावेश होता.

यहूदा ना राजा दाविद ना वंश मधला होतात. तेस्ना मधून काही राजा चांगला होतात. तेस्नी न्याय कण राज्य कर व खरा परमेश्वर नि स्तुती करी. पण यहूदा ना राजस मधून गैरा राजा द्रुष्ट होतात. तेस्नी भ्रष्ट हुईसन मुर्तीपुजा करी. तेस्ना मधून काही राजास्नी त स्वता ना पोरस्ना बी अर्पण त्या खोटा देवातास्ना साठे कर. यहूदा ना राज्य मधला बहुसंख्य लोकस्नी बी परमेश्वर ना विरुद्ध विद्रोह करीसन दुसरा देवातास्नी पूजा करी.