8. परमेश्वर योसेफ आणि तेना परिवार ना बचाव करस

बराच वरीस नंतर जव योसेफ धल्ला हुई जायेल होता, तेनी आपला आवळता पोऱ्या, योसेफ ले मेंढ्यास्नी राखोई करणारा आपला मोठा भावूस कळे तेस्न कस काय चालू शे हय देखा साठे धाळ.

आपला बाप याकोब न योसेफ वर जास्त प्रेम राहामुळे आणि योसेफ आपला भावूस्वर राज्य करीन अस सपन तेले दिखा मुळे तेना भावू तेना द्वेष कराले लागनात. जव योसेफ आपला भावूस जोळे उना, तव तेस्नी तेले काही गुलामस्ना व्यापारीस्ले विकी टाक.

योसेफ ना भावूस्नी घर परत जावाना पहिले योसेफ ना झगा मेंढी ना रक्त मा बुळाव. मंग तेस्नी तो झगा आपला बाप ले दाखाळा एनासाठे कि जंगली प्राणी नि योसेफ ले मारी टाकेल शे एनावर तेना विश्वास बसो. याकोब ले गैरा दुख हुईना.

त्या गुलामस्ना व्यापारीस्नी योसेफ ले मिसर देश मा लय. नाईल नदी ना तठवर बसेल मिसर देश हवू एक मोठा आणि सामर्थ्यशाली देश होता. गुलामस्ना व्यापारीस्नी योसेफ ले एक मालदार सरकारी अधिकारी ले विकी टाक. योसेफ नि आपला मालक नि चांगली सेवा करी, आणि परमेश्वर नि योसेफ ले आशीर्वादित कर.

त्या मालक नि बायको नि योसेफ संगे कुकर्म कराना प्रयात्न्य करा, पण ह्या प्रकारे परमेश्वर ना विरुध्द मा पाप कराले योसेफ नि नकार करा. एनामुळे ती रागे भारीसन योसेफ वर खोटा आरोप लावा आणि योसेफ ले धरीसन बंदीगृह मा टाकामा ऊन. बंदीगृह मा बी योसेफ परमेश्वर संगे विश्वासयोग्य ऱ्हायना, आणि परमेस्वर नि तेले आशीर्वाद दिधा.

दोन वरीस नंतर, बिगर पाप ना हुईसन बी योसेफ बंदीगृहमाच होता. एक रात ले, फारो राजा ले दोन चिंताजनक सपन दिखनात, तेना सल्लागारस पैकी कोणी बी तेले त्या सपनस्ना अर्थ सांगू नई सकना.

परमेश्वर नि योसेफ ले सपन ना अर्थ सांगानी क्षमता दियेल होती, म्हणून फारो राजा नि योसेफ ले बंदीगृह मधून आपला घर लय. योसेफ नि तेना सपन ना अर्थ सांग आणि तेले सांग, “परमेश्वर सात वरीस लगून गैर पिक पाणी दिन आणि तेना नंतर सात वरीस लगून काय पळीन.

योसेफ नि फारो राजा वर एवळी छाप पळणी कि तेनी तेले मिसर देश ना पंतप्रधान बनाई टाक.

योसेफ नि लोकस्ले चांगला काय मधला सात वरीस मा धान्य ना गैरा संगरा करीसन ठेवाले सांग. मंग योसेफ नि काय मधला सात वरीस लगून लोकस्ले पुरीन ईलत धान्य विक.

तो काय फक्त मिसर देशमाच नई पण याकोब आणि तेना परिवार ना लोक जठे राहात होतात कनान देश मा बी भयंकार होता.

मंग याकोब आपला मोठा पोरस्ले धान्य विकत लेवाले मिसर देश मा धाळस. धान्य विकत लेवाले एयेल भावू योसेफ ना समोर उभा होतात पण तेस्नी तेले वयख नई. पण योसेफ नि तेस्ले वयखी लिध.

बदलेल शेतस कि नई हय परखा नंतर, योसेफ नि तेस्ले सांग, “मी तुमना भावू योसेफ शे,!” भ्यावू नका. तुमी मले गुलाम म्हनिसन विकीसन मन वाईट करान प्रयात्न्य कर, पण परमेश्वर नि त्याच वाईट न मन चांगल करासाठे उपयोग कर! या आणि मिसर देश मा वस्ती करीसन राहा, कि मी तुमले आणि तुमना परिवार ले धान्य पुराई सकू.

जव योसेफ ना भावू घर परत उनात व तेस्नी आपला बाप याकोब ले, योसेफ आजून जित्ता शे अस सांग. तव याकोब ले गैरी खुशी हुईनी.

जरी बी याकोब आते धल्ला हुई जायेल होता, तरी बी तो आपला परिवार संगे मिसर देश मा उना आणि त्या सर्वा तठे राहू लागनात. याकोब नि आपला मराना पहिले, आपला सर्वा पोरस्ले आशीर्वाद दिधा.

परमेश्वर नि अब्राहाम संगे करेल करार ना अभिवचन इसहाक कळे, मंग याकोब आणि तेना बारा पोरस कळे आणि तेना तेना परिवार कळे सोपामा एयेल होत. ह्या बारा पोरस्नी संतती ह्या इस्राएल ना बारा वंश हुईनात