۸- تانری یوسوفی وَ عائیلَه سین قورتاریر

ایل لَر سونرا، اُو زامان کی یَعقوب قوجا بیر کیشی اُولدی، چوخ ایستَکلی اُوغلو یوسوفی گُؤندَردی کی چوبانلیق اِئلییَن قارداشلارینین ساغلیق خَبَرین اُونا گَتیرسین.

یوسوفون قارداشلاری اوندان آجیقلاری گَلیردی چون کی یَعقوب اونی چوخ سِئویردی وَ یوسوف دا یوخودا گؤرموشدی اونلارا پادیشاهلیق اِئلییَجاق. او زامان کی یوسوف قارداشلارینین یانینا گِئتْدی اونلار اونی توتدولار وَ برده آلان تاجیرلَرَه ساتدیلار.

یوسوف قارداشلاری اِئوَه گَلمَدَن قاباق، اُونلار یوسوفون اوست کُؤینَگین ییرتدیلار وَ اونون اوستونَه کِئچی قانین دان سَپدیلَر. اونلار اوست کُؤینَگین آتالارینا گُؤرستدیلَر کی بیلسینکی وحشی بیر حِیوان یوسوفی اؤلدورب. سونرا یَعقوب چوخ غَملی اُولدی.

قوول تاجیرلَری یوسوفی میصرَه آپاردیلار. میصر بیر بویوک وَ گؤجلی اؤلکِیْدی کی نیل چایْین یانینْدِیْدی. اونلار اونی بیر وارلی میصریلی مَقاما ساتدیلار. یوسوف اَربابینا یاخشی نؤکَرلیک اِئلَدی وَ تانری دا اونی بَرَکَت وِئردی.

وارلی مَقامین آروادی یوسوفونان بیرلیکدَه یاتماقا چالیشیردی، آما یوسوف قَبول اِئلَمَدی کی تانریا نیسبَت گوناه اِئلَمَسین. سونرا او آرواد حیرصلَندی وَ یوسوفا بوش یِئرَه ایفتیرا آتْدی. اونی توتدولار وَ زیندانا آپاردیلار. آما یوسوف زینداندا دا تانری یا وَفالی قالْدی وَ تانری اونی بَرَکَت وِئردی.

نِئچَه ایل کِئچَندَن سونرا، یوسوف هَلَه گوناهسیز زیندان دِیْدی. بیر گِئجَه فیرعون (میصری لَر شاه لارینی فیرعون چاغیریردیلار ) ایکی یوخو گؤردی کی اونی چوخ پریشان اِئلدی. فیرعونون هِئچ بیر موشاویری اِئلیَنمَدی لَر او یوخولاری آچیقلیا لار.

چون کی تانری یوسوفا یوخونون آچیقلاماسینین گؤجون وِئرمیشْدی، فیرعون اونی زیندان دان یانینا چاغیرْدی کی یوخوسون آچیقلاسین. یوسوف اونا دِئدی: «تانری یِددی ایل بولْلوق وئِرَجَک آما دالیسیجاق یِددی ایلدَن سونرا قَحَطدیق اولاجاق.»

فیرعون اِئلَه یوسوفون شَخصیَتینَه حیران قالدی کی اونی میصر دَه ایکینجی گؤجلی یِئرَهَ قُویدی.

یوسوف خَلقَ دِئدی کی بو یِددی ایل بوللوقون دا، یِئمَک حاصیل لارین آنبار اِئلسینلَر.اوندان سونرا یِددی ایل قَحَطدیق کی باشلادی، یوسوف اَکینلَری خَلقَه ساتیردی کی دُویونجاق یِئمَکلَری اُولسون.

قَحَطدیق وَ یامان قورولوخ تَکْجَه میصیردَه دَییردی بَلکه یَعقوب وَ عائیلَه سینین یاشادیغی کَنعان توپراقیندا بووْروموشدی.

بونا گُؤرَه یَعقوب بویوک اُوغلان لارین میصرا گُؤندَردی کی یِئمَک وَ آذوقا آلسینلار. اُو زامان کی یِئمَک آلماق اوچون یوسوفونان گؤز گؤزَه گَلدیلر ، اُونی تانیمادیلار. آما یوسوف اُونلاری تانیدی.

یوسوف قارداشلارینین نَه قَدَر دَئییشمَلَرینی بیلمَک اوچون اونلاری ایمتاحان اِئلَدی. سونرا دِئدی: «مَن یوسوف سیزین قارداشیزام، قورخمایین. سیز مَنیم حققیم دَه پیسلیک اِئلَدیز آما تانری سیزین پیسلیگیزی یاخشیا چِئویردی. گَلین میصر دا یاشیین کی مَن بوردا سیزَه وَ عائیلَه زَ هر شِئیی حاضیر اِئلییَه بیلَرَم.»

یوسوفون قارداشلاری اِئوَه دُوندولَر وَ یوسوفون دیری اولماقینین خَبرین آتالارینا دِئدیلَر. او چوخ سِئویندی.

یَعقوب قوجا بیر کیشی اولموشْدی،آما اؤز عائیلَه سین لَه میصرَه کوچْدی وَ اوردا بیر یِئردَه یاشادیلار. یَعقوب اؤلمَمیشْدَن قاباق اوغلان لارینین هامیسین برَکَت وِئردی.

عَهد وَ سُؤزو کی تانری ایبراهیمینَن باغلامیشدی، ایسحاق دان سونرا یعقوبا وَ اوندان سوُنرا اُون ایکی اُوغلونا وَ عائیلَه لَرینَه یِئتیشدی. یعقوبون اُون ایکی اُوغلون دان، ایسرائیلین اون ایکی اِئلی دوزَلدی.