۹- تانری موسی نی چاغیریر

یوسوفون اؤلومون دَن سونرا، بوتون اِئل طایفا سی میصردا قالدیلار. اونلار وَ اوشاقلاری اوْردا یاشییردیلار وَ چوخ اوشاق صاحیبی اولدولار. میصری لَر اونلاری ایسرائیلی سَسلی ِیردی لَر.‌

ِنِئچَه یوز ایل کِئچندَن سونرا، ایسرائیلی لَرین سایی سی داها چوخالدی. میصری لَر، یوسوفو وَ یاخشی ایشلَرینی دا هِئچ یادا گَتیرمیردیلَر.‌ اونلار ایسرائیلی لَر دَن قُورخوردولار چون ایسرائیلی لَرین سایسی چوخیدی. بِئلَه اولدی کی او زامان دا حکومت اِئلییَن فیرعون میصری لَرَه اَمر اِئلَدی‌ کی ایسرائیلی لَری قوللوقا توتسونلار.‌

میصری لَر، ایسرائیلی لَری زورا قویدولار کی بویوک بینا لار و شَهر لَر تیکسینْلَر. چَتین ایشلَر، ایسرائیلی لَرین گونوْن قارالتْمیشْدی، آما تانری اونلارا بَرَکَت وِئردی وَ اونلارین اوشاقلاری گینَه دَه چوخالیردی.

فیرعون گُؤردی کی ایسرایلی لَر چوخ اوشاق گَتیریرلَر، بو اؤزدَن اؤز اِئلینه اَمر اِئلَدی کی اونلارین اوغلانلارینی نیل چایْینا آتسینلار وَ اؤلدورسونلَر.

بِئلَکی بیر ایسرائیلی آرواد بیر اوغلان دوْغدی. او وَ اَری اوراجاق کی یِئری واریدی، او اوشاقی گیزلَتدیلَر.

او وقت کی اوشاقین آناسی وَ آتاسی داها اِئلیَه بیلمَدیلَر اونی گیزلَدَلَر ، بو اۆزدَن اونون جانین اَمان دا ساخلاماقا، بیر کؤرپَه اوشاقی سَلَه نین ایچیندَه نیل چایْین نیزارلارینین آراسیندا قویدولار. آما اوشاقین بویوک باجیسی اؤزاخدان باخیردی گؤرَه کی اونون باشینا نَئلَر گَلَجاق

فیرعونون قیزی سَلَه نی گؤردی وَ ایچینَه باخدی. او وقت کی کؤرپَه اوشاق گؤردی اونی اؤز اوغلی کیمی قبول اِئلدی.او بیر ایسرائیلی آروادی اَمیشتیرمَگَه ایشَه توتدی آما بیلمیردی کی بو آرواد اوشاقین اؤز آناسی دی.او وقت کی اوشاقین آناسی، اوشاقی سوت دَن آلاندان سونرا، اونی فرعونون قیزین یانینا قایتاردی و فرعونون قیزی اوشاقین آدین موسی گویْدی.

او زامان کی موسی بؤیودی، بیر گون گؤردی بیر میصری، بیر ایسرائیلی نوکَری کُؤتَک لیر.‌ موسی اَئلَشدی کی ایسرائیلی قارداشینی اونون اَئلین دَن قورتاراسین.

موسی بو‌فیکرینَن کی هِئچ کیم اونی گورمییَجاق ، او میصرینی اؤلدوردی وَ جَنازَه سین گیزلَتدی. آما بیر آدام موسی نین‌ بو ایشین گؤردی.

فیرعون موسی نین ‌بو ایشین بیلدی وَ اَئلَشْدی موسی نی اؤلدورَه. آما موسی میصر دَن چؤللَرَه قاچدی وَ فیرعونون سَربازلاری اِئلیَمَدیلَر اونی اوردا تاپسینلار.

موسی میصر دَن اوزاق بیر چؤللوق یِئردَه چوبانلیق اِئلیردی. اوردا ائوْلَندی وَ ایکی اوغلو اولدی.

بیر گونون ، او وقت کی موسی قایین آتاسینین قویونلارین گؤزلوردی، بیر بوتَه گؤردی کی آلیشیر آما یانمیر.‌ سونرا اونون سَبَبین بیلمَگَینَه بوتییَه یاخینلاشدی. موسی آلیشان بوتَه نین یاخینینا گَلَن زامان، تانری بوتَه نین آراسیندان سَسلَدی: «باشماقلارین آیاقین دان چیخارت چون کی دوردوقون یِئر موقَدس دی».

اوندان سونرا تانری دِئدی: « مَن اِئلیمین اینجیمَکْ لَرین وَ مُصیبَت لَرینی گؤرموشَم. مَن سَنی فیرعونون یانینا گوندَریرَم کی اِئلیمی میصرین قوللوقوندان اِئشیگَه چیخارتاسان. مَن کَنعانین یوردون اونلارا وِئرجاقام. او یوردون کی سؤزون ایبراهیما، ایسحاقا وَ یَعقوبا چوخدان وَعدَه سین وِئرمیشدیم.»

موسی دِئدی: اگَر اِئل مَن دَن سوروشسالار کیم مَنی یوللویوب، اونلارا نَه دِئیم؟ تانری بویوردی: « وارام هَمَن کی وارام. اونلارا دِئگینَن ‍‍‍‍‌ٰ" وارام " مَنی سیزین یانیزا یوللویوب.‌ بیردَه کی، اونلارا دِئه، مَن یَهُوَه، سیزین آتالاریز ایبراهیم، ایسحاق وَ یعقوبون تانریسیام. مَنیم آدیم سونوناقَدَر بودور.»

موسی فیرعونون یانینا گِئتمَک ایستَمیردی، چون کی یاخشی دانیشامْیردی. بونا گوره تانری موسی نین قارداشی هارونی یوللادی کی موسی یا کؤُمَک اِئلیَه.