۴۰. ایسّا سَلیبئے سَرا درَنجگَ بیت

وهدے سِپاهیگان ایسّائے کَلاگ و مَلَنڈ کَنگ هَلاس کُرت، ایسّااِش بُرت که سَلیبئے سَرا بدرَنجَنتی. سَلیبِش ایسّائے بَڈّا دات و پدا هما سلیبئے سَرا ایسّااِش دْرتک.

سِپاهیگان ایسّا «کامپۆل» نامێن جاگَهێا بُرت. اۆدا ایسّا سَلیبئے سَرا درَتکِش و آییئے دَست و پادِش مێه جَتنت. بَله ایسّایا گوَشت: «او منی پِت! اِشان بِبَکش پَرچا که اے نزاننت که چے کَنگا اَنت.» آیان ایسّائے سَربُرا، سَلیبئے سَرا تَهتگے هَم درَتک. تَهتگئے سَرا نِبِشتَه اَت: «اے یَهودیانی بادشاه اِنت.» پیلاتوسا گوَشتگ‌اَت که هَمے پئیما نِبِشتَه بکَنێت.

سِپاهیگان ایسّائے پُچّانی سَرا شَرت بَست. گۆن وَتی اے کارا آیان پێشگۆییے سَرجَم کُرت. اے پێشگۆییَ گوَشیت: «منی پُچِّش وَتی نیاما بَهر کُرتنت و جامگئے سَرا شَرتِش بَست.»

ایسّائے دوێن کَشان یکّ یکّ دُزّے هَست‌اَت که سِپاهیگان یَکّێن وَهدا سَلیبئے سَرا درَتکنت. یَکّ دُزّێا ایسّا کَلاگ گپت، بَله دومیا گۆن آییا گوَشت: «تَرا هُدائے کِرّا نتُرسیت که تَرا سِزا بدَنت؟ ما مئیاربار اێن که ما بازێن رَدێن کار کُرتگ، بَله اے مرد بێمئیارے.» پَدا آییا گۆن ایسّایا گوَشت: «وهدے تئو وَتی بادشاهیا سَرَ بئے، منی هئیالا بکَپ.» ایسّایا گوَشت: «مَرۆچی تئو گۆن من بَهِشتا کائے.»

یَهودی رَهبَر و مُچّیئے اے دِگَه مردُمان ایسّا کَلاگ بَست و ملَنڈ کُرت. ایسّااِش گوَشت: «اَگَن تئو هُدائے چُکّ ائے، گُڑا چه سَلیبا اێر کَپ و وَتا برَکّێن. آ وهدی ما تئیی سَرا باوَرَ کَنێن.»

پَدا سَجَّهێن دَمَگا آسمان تَهار بوت، بِلّ تُرے وَهد نێمرۆچ اَت. هَما نێمرۆچئے وهدا پَه سئے ساهَتا تَهاریا مان شانت.

رندا ایسّایا کوکّار کُرت و گوَشت: او منی پِت! کار هَلاس بوت، من وَتی روها تئیی دَستا دئیان.» پَدا آییا وَتی سَر جَهل کُرت و ساهی دات. وهدے ایسّا مُرت زِمین‌چَنڈ بوت. مَزَنێن پَرستِشگاهئے دراجێن پَردَه که مردُمی چه هُدایا جِتا کُرتگ‌اتنت، بُرزا بگِر تان جَهلا دِرت و دو کَپّ بوت.

ایسّایا گۆن وَتی مرکا په مردُمان راه پَچ کُرت که هُدائے کِرّا بیاینت. سِپاهیگے که سلیبئے نزّیکّا اۆشتاتگ‌اَت و ایسّایا نِگَهپانی کَنگا اَت، سَجَّهێن سَرگوَستی دیست و گوَشتی: «دِلجَم آن که اے مرد بێمئیار اَت. هُدائے چُکّ اَت.»

یَهودی کئومئے دو رهبر که آیانی نام «ایسُّپ» و «نیکودیموس» اَت، پیلاتوسئے کِرّا آتکنت و دَزبَندی‌اِش کُرت که ایسّائے جۆنا مارا بدئے. آیان باوَر اَت که ایسّا مَسیه اِنت. ایسّائے جۆنِش گُدێا پَتات و تراشتگێن تَلارێئے تَها کَبر کُرت. پَدا کَبرئے سَرا مزَنێن سِنگے داتِش که کَبرئے دَپ بَند ببیت.