۴۸. ایسّا وادَه داتگێن مَسیه اِنت

وهدے هُدایا دُنیا جۆڑ کُرت هَر چیزّ شَرّ اَت و هِچّ گُناه نێست‌اَت. آدَم و هئوایا گۆن یکدگرا مِهرَ کُرت و هُدااِش هَم دۆستَ داشت. دُنیایا بیمّاری و مرک نێست‌اَت. هُدایا لۆٹِت که دُنیا اَنچُش ببیت.

بَله چۆ بوت که شئیتانا وَتا مارے کُرت و گۆن هئوایا هَبَری کُرت که رَدی بدَنت. گُڑا هئوا و آدَما هُدائے هِلاپا گُناه کُرت. آیانی گُناهئے سئوَبا زِمینئے سَرا مرک آتک.

آدَم و هئوائے گُناهئے سئوَبا گَنتِرێن چیزّے هَم بوت. آ چه هُدایا دور بوتنت. پَمێشکا آیانی سجّهێن چُکّ و اۆبادگ گُنَهکار بوتنت. هَرکَس چه پێدائِشا گُنَهکارے. هُدا و اِنسانئے نیاما سُهل و وَشّانی نێست. بَله هُدایا سُهل آرگ لۆٹِت.

هُدایا کئول کُرت که چه هئوائے نسلا یَکّے شئیتانئے سَرگا پرۆشیت و شئیتان آییئے پادئے پونزا ڈَنگَ جنت. اے کئولئے مانا اِش اِنت که شئیتان مَسیها کۆشارێنیت، بَله هُدا آییا پَدا زِندگَ کنت. مَسیه، شئیتانئے واک و توانا تان اَبَد هَلاسَ کنت. بازێن سالا رَند هُدایا پێش داشت که ایسّا هَما مَسیه اِنت.

هُدایا گۆن نوها گوَشت که من توپّانے راهَ دئیان و تئو بۆجیگے جۆڑ بکَن و وَتی لۆگئے مردُمان برَکّێن. نوه و آییئے مردُمان هُدائے سَرا باوَر کُرت و هُدایا رَکّێنتنت. هَمے پئیما، هَرکَسا که گُناه کُرت، آییئے سِزا مرک اِنت. بَله هُدایا ایسّا راه دات که هَرکَس که آییئے سَرا باوَرَ کنت، آییئے گُناه بَکشگَ بنت و هُدائے کِرّا اَبَدمانێن زِندے رَسیتی.

سَدان سالا دینی پێشوایان په هُدایا کُربانیگَ کُرت. کُربانیگ کَنگ اے چیزّا پێشَ داریت که مردُمان گُناه کُرتگ و هُدائے سِزایا کَرزنت. اَنگت هئیوانی کُربانیگان اِنسانانی گُناه شُشتَ نکُرتنت. بله ایسّایا هَما کار کُرت که دینی پێشوایان نتوانت بکَننت. آییا وَتا کُربانیگ کُرت که چه هماییئے کُربانیگا سَجَّهێنانی گُناه بَکشگ ببنت. آییا مئے گُناهانی سِزا وَتی سَرا زُرت. ایسّائے کربانیگ کامل اَت و پَمێشکا آ مئے کاملێن مزَنێن دینی پێشوا اِنت.

هُدایا گۆن اِبراهێما گوَشت: «مَن چه تئو دُنیائے سَجَّهێن مردُمان بَرکَتَ دئیان.» ایسّا چه اِبراهێمئے نسلا اَت. گُڑا بزان که هُدایا سَجَّهێن مردُم چه اِبراهێمئے نسلا بَرکَت داتنت پَرچا که هَرکَس که ایسّائے سَرا باوَرَ کنت، هُدا آییا رَکّێنیت. وهدے مردُم ایسّائے سَرا باوَرَ کَننت، هُدا آیان وَتی مَردمَ کنت.

هُدایا گۆن اِبراهێما گوَشت که وَتی چُکّ اِساکا په من کُربانیگ بکَن. بَله کُربانیگ کَنگئے وَهدا هُدایا اِساکئے جاها گوَرانڈے راه دات. اِبراهێما هَما گوَرانڈ کُربانیگ کُرت. مارا سَجَّهێنان وَتی گُناهانی سئوَبا مِرگی اَت، بَله ایسّایا مئے جاها وَتا کُربانیگ کُرت. پَمێشکا، ما ایسّایا هُدائے گوَرانڈَ گوَشێن.

وهدے هُدایا آهِری اَزاب مِسرئے سرا راه دات، گۆن اِسراییلیان گوَشتی که اِنشَپی هَر لۆگئے مستِرێن مردێن‌چُکَّ مِریت، بَله شُما په وَتی رَکّێنگا هَر لۆگا گوَرانڈے بکُشێت. گوَرانڈا هِچّ ائیب مان مبیت. پَدا شُمارا گوَرانڈئے هۆن وَتی دَروازگانی بُرزئے و کَشئے تَهتگان جَنگی اِنت. وهدے هُدایا اے هۆن دیستنت هَما لۆگی سَرگوَز کُرت و اۆدا هِچّ چُکّ نمُرت. رندا اے رۆچ سَرگوَزئے ائیید زانگ بوت.

ایسّا سَرگوَزئے گوَرانڈئے پئیما اِنت. ایسّایا هِچبَر گُناه نکُرتگ و پَمێشکا آییا هِچّ ائیب مان نبوتگ. سَرگوَزئے ائییدئے وَهدا ایسّااِش کُشت. هَرکَس که ایسّائے سَرا باوَرَ کنت، ایسّائے هۆن آییئے گُناهانَ شۆدیت. بزان اے پئیما هُدا آییا سَرگوَزَ کنت و سِزا ندَنت.

هُدایا گۆن اِسراییلیان اَهد و پئیمانے کُرت که شُما منی هاسێن و گِچێن کُرتگێن مَهلوکَ بێت. بَله رَندا هُدایا نۆکێن اَهد و پئیمانے کُرت و اے اَهد و پئیمان گۆن دُنیائے سَجَّهێن مردُمان اِنت. اَگَن کَسێا اے اَهد و پئیمان منِّت، آ گۆن هُدائے مَهلوکا هۆر و همگرنچَ بیت، بِلّ تُرے چه هَر کئوم و کَبیلها ببیت. ایسّائے سَرا باوَرَ کنت و پَمێشکا هُدائے مَهلوکا هۆرَ بیت.

موسّا اَنچێن نبیے اَت که هُدائے پئیگام گۆن مزَنێن واک و زۆرێا په مردُمانَ رسێنتی. بَله ایسّائے واک و زۆر اَنگَت باز گێشتِر اِنت. آ هُدا اِنت، پَرچا که هَر چیزّے که کُرتگی و هَر هَبَرے که گوَشتگی، آ هُدائے کار و لَبز بوتگ‌اَنت. پَمێشکا پاکێن کِتاب ایسّایا «هُدائے گالَ» گوَشیت.

هُدایا گۆن داوود بادشاها زُبان کُرت که چه تئیی نسلا یَکّے منی مهلوکئے سَرا دائِما بادشاهیَ کنت. ایسّا مَسیه چه داوودئے نسلا اِنت و آ تان اَبَد بادشاهیَ کنت.

داوود بَسّ اِسراییلئے بادشاهے اَت، بَله ایسّا سَجَّهێن جَهانئے بادشاه اِنت. ایسّا پَدا کئیت و گۆن اِنساپ و اێمِنیا تان اَبَد بادشاهیَ کنت.