14. शैर कौ कदलसी

परमेश्वर सै इस्त्राएलियों जा अती नियम बताम खत्म हुग्सौ जइगै उसीजा गिगै कौरसौं उगै वादा गै हुग्मौ गे कारण मानमौ इन, हंग उसै सीनै यै कौ लरै उसीगै अगुवाई हुग्सौ, अती उसीगै वादा गै देश कौ कौरमौ चिन्खै निसौ, अइ देश कनान री लुक्तै निन्चौ, परमेश्वर कसा गै खम्भा गै लरै लरै दैसो, हंग अती उसीगै निम्फन निम्फन दिन्नचौ।

परमेश्वर सै अब्राहम, इसहाक हंग याकूब सै वाचा कसुग्दै निसौ, अती वादा गै अती देश उसीगै सन्मंग दयंग, परन्तु अइ समय कौ अतकौ मथै जात गै मी मंग बस्कै निनन्चौ, अती कनानी लुक्तै निन्चौ, अइ कनानी ची मी मंग परमेश्वर गै आदर मुसुग्दै निन्चौ, हंग उगै आदेश री ममान्दै निन्चौ अती झूठी सै गै पुजा सुग्दै निन्चौ हंग मथै यदै लंन सुग्दै निन्चौ।

परमेश्वर सै इस्त्राएलियों जा लुक्सौ, तब गंन अति वाचा गै देश कौ दिनी ता अत्कौ जम्मा कनानियों कौची छुटटकारा तियंग्नौ, उसी तै जूरू सगत मूसुग्मौ हंग अतीसै डामी मुसुग्मौ, नगै उसीगै जम्मा मूर्तियों गै यदै तरीकासै नष्ट हुग्तेया, अगर गन्सै जिगै आदेश ममान्म चंग गंन जिगै वजह सै उसीगै सै मंग गै भक्ति सुगमों सुरू कसुग।

तब इस्त्राएली कनान गै तौक्सा नंब्नैसौ, मूसा सै इस्त्राएल गै जम्मा जाति कौची तिगै तिगै सुग्गै चनै सिरी मंग चुन्सौ, अतीसै उसीजा दैग लंकै अति देश गै दाम गै कथा हुग्सौ की दौब्यौ की अती हंम देश इन, उसीजा अती कनानियों गै स्यारी कौरमौ निसौ की दौब्यौ की अती तरथै निन्चौ की मतरथै निन्चौ।

अती चनै सिरी सै जम्मा कनान राजू कौची देगे पिसा ज्या गै यात्रा हुग्सौ हंग उसी थौक्सिगै पिंरा, उसीसै मी मंग जा बतासौ, अती देश मथै उपजाऊ इन हंग खेती मथै कयुग्दै इन,परन्तु ची स्यारी मंग सै लुक्सौ, उसीगै सौंग सारौ इन हंग अती मी मंग बुग्थै परथै इन्न, अगर इन उसीसै हमला हुग्तन्न, ता निश्चित रूप सै अती इन्जा हरातैयंग, हंग इन्जा सतीयंग्न्न। .

फंट री काबेल हंग यहोशू हंग खमी स्यारी सै लुक्सौ, अइ साचौ लै की कनान गै मी मंग बुग्थै हंग तरथै निन्चौ, परन्तु निश्चित रूप कौ इन उसीजा हरातैयंग, परमेश्वर इन्गै दग्ची गैसियंग।

परन्तु मी मंग गै काबेल हंग यहोशू गै मयंन्नीसौ , अती मूसा हंग हारून जा रूसु हुग्सौ, गन इन्सै अइ जरम्ना बंग कौ खउ रकै रनीसौ, इन्जा मिस्त्र कौ बस्मौ निसौ , यदि इन अती देश कौ दैग्नै ता इन गैसीलंग हिचियंग्न्न, हंग कनान गै मी मंग इन्गै रिथिस्या हंग संन्मंग जा ड़ग्मी बनायंग्नै, अती मी मंग उसीजा थौक्सिगै मिस्त्र कौ कौरगै दैम दग्ची तिगै यकरौ प्रधान जा चुन्मौ चिन्खै निन्चौ।

तब उसी मी मंग सै अइना लुक्सौ ता परमेश्वर मथै रूसु पिरादै निसौ, अती कजुड्तै ड़ग्सौ कौ रासौ हंग लुक्सौ, गनीसै जिगै विरुद्ध कसुग्दै इन, खव्की गंनी जम्मा जा अइ शौर कौ न्यंरम नियंग, जम्मा तिगै मी जइ नंसा यीन या अतीचंग मथै उम्र गै इन अती हिचियंग हंग खजा री अती देश कौ रा मतरीयंग,जइ जिसै गनीजा दातौ, केवल काबेल हंग यहोशू अतीकौ रा तरयंगन्न।

तब मी मंग सै परमेश्वर जा अइना लुकतै यन्गसौ, ता अती दुखु लिच्चौ खव्की उसीसै पाप हुग्न्नचौ, उसीसै कनान गै मी मंग जा हमला हुग्मौ गै फैसला हुग्सौ, मूसा सै उसीजा मलाइमौ दग्ची चेतावनी दासौ खव्की परमेश्वर उसीतै जोरौ मुदैयंग, परन्तु उसीसै उगै मयंन्सौ।

परमेश्वर अइ लडाई कौ उसीतै जोरो मुदैदै निसौ, खव्की कनानियों सै उसीजा क्हरातै हंग अत्कौ ची मथै मंग पंच्यंगतै, तब इस्त्राएली मी मंग कनान कौची वापिस क्फनसी , लरै पिसा यीन वासै अती शैर कौ तमौ दिमौ न्यरंग।

इस्त्राएली मी मंग शैर कौ न्ंयरम गै पिसा यीन गै निग्म, परमेश्वर सै उसगै चिन्थै बथौ पूरा हुग्सौ, उसीसै उसीजा स्वर्ग कौ मन्ना लुक्तै वाला कटौ दासौ, उसै चिप्च गै बिडं कौ जइ गुन्दा रूप गै चिप्च निग्न्नं, उसीगै डेरा कौ लाइनी ताकि उसीजा जाम दग्ची स्या लैलौ, अती जम्मा समय, परमेशवर सै उसीगै खसै पसै हंग पौला पेंम सै बचागै तासौ।

अइकौ वासै की परमेश्वर सै उसी तुग्मौ दग्ची चमत्कारी रूप सै उंग कौची ती निकाल्सौ, परन्तु अइ जम्मा गै उपरान्त, इस्त्राएली मी मंग सै परमेश्वर गै विरूध हंग मूसा गै विरूध बौबी हुग्सौ हंग निब्सिदै, तौभी परमेश्वर विश्वास हुग्दै निसौ, उसै जइ वादा हुग्सौ की अती अब्राहम, इसहाक, हंग याकूब गै संन्मंग गै दग्ची हुग्यंग अतीसै अती हुग्सौ।

तिगै हंग समय तब उसी मी मंग गै खास्या कौ ती मुनिसौ, परमेश्वर सै मूसा जा लुक्सौ, बै तै फायौ,हंग अत्कौ ची ती निकाल्यंगनौ, परन्तु मूसा सै बै तै मफासौ, अइ गै अलावा , अतीसै दुली सै बै कौ निच्चौ लुब्सौ, अइ रीति सै अतीसै भगवान गै इज्त मुसुग्सौ , जम्मा गै ती दग्ची बै कौची ती ता वंखै रासौ, परन्तु परमेश्वर मूसा तै रूसु पिरादै निसौ, उसै लुक्सौ खव्की गन्सै अइना हुग्नीसौ खव्की गंन वादा गै देश कौ रा मतरीयंगनौ।

तब इस्त्राएली मी मंग पिसा यीन वासै शैर कौ पिन्यंरतै निसौ, तब खमीसै परमेश्वर गै विरूध बलवा कयुग्दै निसौ, अती जम्मा पज्यंतै निन्चौ, तब परमेश्वर उसी मी मंग जा दसरौ अती कसम गै देश गै टम्यर वासै कौरगै पुदै, थन मूसा मथै सयंग्तै क्लतै निसौ, खव्की परमेश्वर सै मी मंग गै अगुवाई हुग्मौ गै मदत हुग्मौ दग्ची यहोशू जा चून्सौ, परमेश्वर सै मूसा सै अइ कसम री क्सुग्दै निसौ की तिगै ज्या अती मी मंग गै नैरो मूसा तै जौरो तिगै भविष्यदक्ता लाइयंगौ।

तब परमेश्वर सै मूसा जा तिगै यै गै दंग कौ दैम दग्ची लुक्सौ, ताकि अती कसम गै देश तिंन तरसीयंग, मूसा सै अती कसम गै देश जा दौब्सौ परन्तु परमेश्वर सै उजा अत्कौ राम दग्ची मना कसुग्तै, तब मूसा पज्यंग, हंग इस्त्राएलियों सै सुमसा ज्या वासै शोक बनासौ, यहोशू उसीगै नूद प्रधान कब्न यहोशू तिगै बढिया प्रधान निसौ, खव्की उसै परमेश्वर जा भरोसा हुग्सौ हंग उगै कथा मान्सौ।