17. दाऊद तै जोरो परमेश्वर गै वाचा
शाऊल इस्त्राएल गै लरैची राजा निसौ, अती बुग्थै हंग डग्थै निसौ, जसौ अती मी मंग चिन्थै निन्चौ एकदम अतना, इस्त्राएल जा अपीगै शासन गै लरै खई यींन कौ शाऊल तिगै बुदै राजा निसौ, परन्तु निग्म अती तिगै यदै मी क्ब्न जइसै परमेश्वर गै कथा ममान्सौ, खव्की परमेश्वर सै तिगै यकरौ मी जा चुन्सौ कि तिगै ज्या उगै बंग कौ राजा बन्यंग।
परमेश्वर सै दाऊद मिन गै तिगै जोदै इस्त्राएली सिरी जा चुन्गै तिगै ज्या शाऊल गै बंग कौ राजा लैम गै दग्ची तैयार लैम शुरु हुग्सौ, दाऊद बैतलहम सौंग कौ तिगै माला रौक्सिदै निसौ, औल्गं ज्या वासै, दाऊद सै सिंह हंग वंम मी जा ससौ खव्की दाऊद दारा रेखरेख हुग्लंग ब्कतर उगै बा गै माला जा उसीसै हमला हुग्सौ, दाऊद तिगै नम्र धर्मी मी निसौ, उसीसै भगवान जा भरोसा हुग्सौ हंग उगै लुक्सिदै मानसौ।
तब दाऊद इता जोदै सिरी री निसौ, उसीसै बुग्थै-पर्थै गोलियत गै विरुद्ध गैसिसौ , गोलियत तिगै बढिया सैनिक निसौ, अती मथै पक्का हंग लगभग सुम मीटर बुग्थै निसौ, परन्तु परमेशवर सै गोलियत जा संमगै हंग इस्त्राएल जा बचाम गै दाऊद गै मदत हुग्सौ, अइगै निग्म, दाऊद सै इस्त्राएल गै शत्रुओं जा औलंगचौ जित्सौ की, दाऊद तिगै पौदै सैनिक कब्न, हंग उसीसै मथै युध कौ इस्त्राएली सेना गै अगुवाई हुग्सौ, मी मंग सै उसीगै मथै तारीफ हुग्सौ।
मी मंग सै दाऊद सै अइलंग बुत्तचौ कि शाऊल अतीतै कचिड आखिरकार शाऊल उजा समौ चिन्खै निसौ, अइ दग्ची दाऊद उजा हंग उगै सैनिक मंग जा च्यासीम दग्ची शैर फौक्कै पुददै, तिगै ज्या, तब शाऊल हंग उगै सैनिक दाऊद जा मासीगै निन्चौ, ता शाऊल तिगै फौ कौ देसौ, अइ अती फौ निसौ जइकौ दाऊद प्कच्यासीदै निसौ, परन्तु शाऊल सै उजा मितिन्सौ, दाऊद शाऊल गै निम्फन उगै मथै नैरो पुदै हंग उगै खसै पसै सै तिगै तरका दिखासौ , निग्म तब शाऊल अती फौ कौची रासौ ता दाऊद सै उजा गाल्गै कचुम्दै खसै पसै गै तरका जा दिखासौ, अइ रीति सै शाऊल सै कंप्पै कि दाऊद सै राजा बनमौ दग्ची उजा समौ सै मना कसुग्तै।
खइ समय गै निग्म, शाऊल युद्ध कौ प्जंयंग हंग दाऊद इस्त्राएल गै राजा कब्न , अती तिगै बढिया राजा निसौ, हंग मी मंग सै उजा प्रीति तासौ , परमेश्वर सै दाऊद जा आशिर्वाद दासौ, हंग उजा सफल बनासौ, दाऊद सै अलंग युद्ध गैसिसौ, हंग परमेश्वर सै इस्त्राएल गै शत्रुऔ जा हराम कौ उसीगै मदत हुग्सौ| दाऊद सै यरुशलेम सौगं जा जीत गै अतीजा अपीगै राजधानी बनासौ, जइकौ अती ब्ससौ हंग शासन हुग्सौ, दाऊद पिसा यींन वासै राजा निसौ, अइ समय गै दौरान, इस्त्राएल सामर्थी हंग संयग्मी कब्न।
दाऊद तिगै मंदिर बनाम चिन्खै निसौ जइकौ जम्मा इस्त्राएली परमेश्वर गै भक्ति सुगं तरयंग हंग उगै दग्ची बलि चढा तरयंग, लगभग पी सई यींन सै अती मी मंग मूसा गै कब्नासिदै मिलाप वाला डगसो कौ परमेश्वर गै भक्ति सुगै तासौ, हंग उगै दग्ची बलि चढागै तासौ।
परन्तु अती नातान मिंन गै तिगै भविष्यदक्ता निसौ, परमेश्वर सै उजा दाऊद सै अइ लौम दग्ची लाइसौ, गन्सै मथै युद्ध कगिसीदै इन्न, खव्की गंन जिगै दग्ची अइ मंदिर जा मब्नायंग, नगै सिरी अइ बनायंग, तौभी, जै नगै मथै आशिर्वाद दायंगौ, नगै तिगै सन्तान हमेशा दग्ची जिगै मी मंग जा राजा गै रुप कौ शासन सुग्यंग, हमेशा गै दग्ची शासन सुग्दै वाला अती दाऊद गै तिगै मात्र सन्तान मसीह निसौ, मसीह परमेश्वर गै कचुन्सिदै जन निसौ, जइ दुनिया गै मी मंग जा उसीगै पाप सै बचायंग।
तब दाऊद से नातान गै जबाब यन्सौ ता उसे परमेश्वर गै धन्वाद हुग्सौ हंग उगै स्तुति हुग्सौ, परमेश्वर उसगै सम्मान कौ पूदै हुंगै तासौ हंग उसै मथै आशिर्वाद दागै तासौ, बेशक दाऊद मप्तै निसौ कि परमेश्वर अइ कथा औलंग पजा सुग्यंग, कि इस्त्राएलियों जा पौदै समय वासै लगभग तीगे हजार यींन वासै मसीह गै रामौ गै इन्तजार सुग्मौ पढियंग।
दाऊद सै औलंग यींन वासै अपीगै मी मंग जा शासन हुग्सौ, उसै पौदै निष्ठा सै परमेश्वर गै कथा मान्सौ हंग परमेश्वर सै उजा आशिर्वाद दासौ, खव्की अपीगै जीवन कौ अंत जै उसीगै विरूध ज्यरमना पाप कसुग्दै निसौ।
तिगै ज्या दाऊद सै अपीगै महल गै छम्पंग दौब्सौ हंग तिगै बढिया खुतिस्या जा यरसीदै तिन्सौ, अतीसै उजा मिसितै निसौ, लेकिन उसै पता लगासौ की उसीगै मिंन बतशोबा निसौ।
अपीगै दिृष्टि कौ फन्सिम गै बजाए दाऊद सै उजा अपीगै नैरौ कौरमौ दग्ची खमी जा लाइसौ, अती उतै जोरो यासौ हंग उजा वापिस चिम्जा लाइसौ, दुमा समय गै निग्म बतशोबा सै अइ लुकै दाऊद गै नैरौ जबाब लाइसौ की अती गर्भवती इन।
बतशोबा गै रिथी ऊरिय्यार गै तिगै मी निसौ, अती दाऊद गै बदिया सैनिक कौची तिगै निसौ, अइ समय अती युद्ध दग्ची छम्पंग पुदैद निसौ, दाऊद सै ऊरिय्यार जा युद्ध कौची थौक्सीगै गाल्गै उजा अपीगै रिथीस्या तै जोरौ बस्मौ दग्ची लुक्सौ, परन्तु खमी सैनिक युद्ध कौ निन्चौ, खव्की ऊरिय्यार सै चिंम्जा दैम सै मना कसुग्तै, अंत दाऊद सै ऊरिय्यार कौची थौक्सीगै युद्ध कौ क्लाइतै हंग सेनापति सै उजा युद्ध कौ अइना बंग कौ ताम दग्ची लुक्सौ जइकौ शत्रु लचंग शक्तिशाली लैलो खव्की औ हिचिलौ, ता अइना लिच्चौ की ऊरिय्यार युद्ध कौ पंज्यंग।
ऊरिय्यार गै युद्ध कौ हिचिम गै निग्म दाऊद सै बतशोबा तै डामी कसुंग , निग्म उसै दाऊद गै सिरी जा जन्म दासौ, दाऊद सै जइ हुग्सौ अतीतै परमेश्वर मथै रुसु पिरादै निसौ, खव्की उसै नातान भविष्यदक्ता जा दाऊद जा अइ बताम दग्ची लाइसौ की उसीगै पाप औलंग यदै निसौ, दाऊद सै अपीगै पाप गै पश्राताप हुग्सौ, हंग परमेश्वर सै उजा क्षमा कसुग्तै, अपीगै शेष जीवन कौ अपगै कठिन समयों कौ री दाऊद परमेश्वर गै निम्फन निम्फन दैसौ हंग उगै कथा मान्सौ।
परन्तु दाऊद गै सन्दै पज्यंग, अइ रीति सै परमेश्वर सै दाऊद जा सजा दासौ, अइगै अलावा दाऊद गै हिचिम वासै, उसीगै अपी चुकौचिमंग गै खमी मंग सै उसीगै विरूध गैसीसौ, हंग दाऊद गै अपीगै शक्ति चिथै कल्तै निसौ, परन्तु परमेश्वर विश्वासयोग्य निसौ हंग थन री उसीसै अती हुग्सौ जइ उसै दाऊद जा हुग्मौ गै वादा हुग्सौ, भले ही दाऊद सै उसीगै कथा म्मासौ, निग्म री दाऊद हंग बतशोहा गै दसरो संन्मंग पैदा लिन्नचौ, हंग उसीसै उगै मिंन सुलैमान तासौ।
1 शमूएल बाइबल गै लिबिन 10; 15-19; 24; 31; 2 शमूएल5; 7; 11-12 कौची तिगै बाइबल गै कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।