17. दाऊद साते परमेश्वरोन वायदू

शाऊल इस्राईलोन पेहलू राजा होतु. चू उचुत एने घाटावू होतु, जोसो तीनुक लागतो होतो तोसुत होतु. इस्राईल पोर तेरो शासनोन पेहेल काही सालोमा शाऊल एक वारू राजा होतु. बाकून बादमा होयू एक दूष्ट माणूस बोन गोयलू एने चू परमेश्वरोन वातोक नि मान्यु, एरेन कोरता परमेश्वर दिसरा एक माणूस काजे नेवाळयु जू तेरे जागे राजा बोनसे.

परमेश्वर एक दाऊद नावोन एक इस्राईल पुऱ्या काजे एक दाहळू शाऊलोन जागे राजा होयनेन कोरता तीयार कोरणे बाज गोयू. दाऊद बेथलेहेम गावोन एक गुवाव्यू होतु. दाऊद सिह काजे एने भालू काजे मार देदलु काहाकी हेरा बासोन गाडरा पोर चे हमलू कोरला होता. दाऊद नम्ब्र एने धोरमी होतु. चू परमेश्वर पोर भुरसू कोऱ्यू एने तेरी वातो काजे मान्यु.

दाऊद जुवान्यू पूऱ्यू होतु, तेतार चू एक गोलियत नावोन मोटात मानसो साते लोळाइ होई. गोलियत एक वारू सैनिक होतु. चू घोणु ताकत वावु एने तीन मीटर नांबू होतु, बाकून परमेश्वर गोलियत काजे मारणे एने इस्राईल काजे वाचाळने कोरीन दाऊदन मदत कोऱ्यू. तेरे बादमा दाऊद इस्राईलोन घोणा सोवटा दुश्मन काजे हारावीन जीकलू से. दाऊद एक मोटलु सैनिक बोन गोयू, एने चू घोणा सोवटा लोळायमा इस्राईल सेनान अगवाई कोऱ्यू. माणसे तेरी घोणा वाह वाह कोऱ्या.

माणसे दाऊदसी घोणा मोंग कोऱ्या कोरीन शाऊल दाऊदसी जलन कोरणे बाज गोयू. आखिर शाऊल दाऊदकाजे मारनेन कोऱ्यू एरेन कोरता दाऊद तेरेसी एने तेरे सैनिकसी वाचनेन कोरता बोयळामा जात रोयलू. एक दाहळे शाऊल एने हेरा माणसे दाऊदोन हेर कोरता होता ती शाऊल एक गुफामा गोयू. यी ची गुफा होती जा दाऊद डुकाय रोयू होतु, बाकून शऊल दाऊद काजे नि देख्यू. दाऊद शाऊलोन घोने साते गोयू एने तेरा डोगलान नानोस तुकळो काट लेदू. तेरे बादमा, शाऊल तिना गुफाम गोथू निकव्यू ती दाऊद तिना काटला तुकळा काजे देखाळयु. इना रीतीसी शाऊल जान गोयू कि दाऊद राजा बोननेन कोरता तीनाक मारणेसी मना कोर देदू.

थुलाक दाहळा बाद, शाऊल लोळायमा मोर गोयू, एने दाऊद इस्राईलोन राजा बोन गोयू. चू एक वारलू राजा होतु एने माणसे तेरेसी मोंग राखता होता. परमेश्वर दाऊद काजे आशिषित कोऱ्यू एने सफल बोनाव्यू. दाऊद घोणा सोवटा लोळाय लोळायु एने परमेश्वर इस्राईलोन दुश्मोन काजे हारावने कोरीन मदत कोरलु. दाऊद यरुशलेम गाव काजे जीकीन तिनी काजे तेरी राजधानी बोनाव्यू, जा होयू रोयू एने राज कोऱ्यू. दाऊद चावीस साल तोक राजा रोयू, तिना तेमोमा इस्राईल माणसे घोणा ताकत वावा एने मालदार बोन गोयला होता.

दाऊद एक मंदिर बोनाव्ने कोरतू होतु जा आखा माणसे परमेश्वरो आराधना कोर सोकतला एने तेरेन कोरता बोलीदान चोळाव सोके. लगभग 400 साल सी मुसान बोनावला मेवावनेन तंबूमा आराधना कोरता होता एने तेरेन कोरता बलिदान चोळावता होता.

बाकून चा सारीक एक नातं नावोन भोविष्य कोरने वावू होतु. परमेश्वर तीनाकाजे दाऊदोनचा यो कोयने मूकल्यु कि, “ तू घोणा सोवटा लोळाया लोळायलु छे, एरेन कोरता तू मारेन कोरता मंदिर घोण बोनावे. तार पुऱ्यू इनाक बोनावसे. तीबी मे तुसेक घोनी सोवटी आशिष आपीस. तारो वंश कायमोन कोरता मारा मानसोपोर राज कोरसे.” कायमोन कोरता राज कोरणे वावु दाऊदोन पीढीन येसू मसिह होतु. येसू मसिह परमेश्वरोन निवाळलु होतू. जू संसारन मानसोकाजे तिंदरा पापोसी वाचाळसे.

जेतार दाऊद नातानोन संदेश काजे सोमव्यू ती चू परमेश्वरोन धन्यवाद कोऱ्यू एने तेरी बोढाई कोऱ्यू. परमेश्वर तेरी इच्छा काजे वाळावतू होतु एने तिना काजे घोणु आशिष आपतू होतु, दाऊद नि जानतु होतु कि परमेश्वर इन वातो काजे केतार कोरसे. इन टेमोमा आपणु जानजे कि नाम्बा टेमतोक, लगभग 1000 साल तोक येसू मसिहन आवनेन वाट जुवनो पोळसे.

दाऊद घोणा साल तोक वारू रीतीसी राज कोरलु, एने परमेश्वरोन वातो काजे मान्यु एने परमेश्वर तीनाकाजे आशिषित कोऱ्यू. बाकून चू तेरा जीवनमा परमेश्वरोन विरुद्धमा मोटूत पाप कोर लेदू.

एक दाह्ळू दाऊद महलमा गोथू बारथे आव्यू देख्यू कि एक घाटावी बायोर उंगवने बाजरोय, चू तीनिक नि जंतू होतु बाकीन चू मामुमात कोऱ्यू एने जान्यू कि तेरो नाव बेतशेबा होतो.

तेरा देखणाकाजे बोद्लाव्ने रोयनेदिन दाऊद हेरेनचा लावणे कोरीन कोय देदू एने लेणे मुकली देदू. चू तेरे साते सुव्यू एने पोछू तेरे घोर मुकली देदू, एने थूलाक दाहळा बादमा बेतशेबा यो कोयीन मुकली कि होई भारीस (गर्भवती) छे.

बेतशेबान घोरवावू जेरो नाव उरीय्याह होतो, चू दाऊदोन वारला सैनिक माईक एक होतु. तिने टेमे चू लोळायने कोरीन जाय रोयू होतु. दाऊद युद्धमा गोथू बुलावीन लाडी साते रोयने कोरीन कोयू, बाकून दिसरा सैनिक लोळायमा होता कोरीन उरीय्याह जाणेसी मना कोर देदू. आखिर दाऊद उरीय्याह काजे पोछू जाणेन कोरता कोय देदू एने सेनान सेनापती काजे कोयू कि उरीय्याह काजे ओसला जागापोर मेक्जी जा दुस्मोन जादा ताकद वावा होसे टाकी चे तीनाक मार देय एने तोसोत होयो कि उरीय्याह मोर गोयू.

उरीय्याहन मोरनेन बादमा दाऊद बेतशेबा साते वियाव कोर लेदू. तेरे बादमा ची दाऊदोन एक पुऱ्या काजे जन्म आपी. दाऊद जो कोऱ्यू तेरेसी परमेश्वर घोणु रीसवाय रोयू होतु. एरेन कोरता नातान भविष्य कोरता काजे दाऊदोनचा यो कोयने मुकल्यु कि हेरु पाप कोतरू भुंडू छे. दाऊद हेरा पापोन पोछ्तावू कोऱ्यू एने परमेश्वर तीनाकाजे माफ कोऱ्यू. हेरा जीवोनमा एने कठीन टेमोमा बी दाऊद परमेश्वरोन पोछोव चालतू रोयू एने तेरी वातोकाजे मान्यु.

तेरे बदमा दाऊदोन पूऱ्यू मोर गोयू, इना रीतीसी परमेश्वर दाऊद काजे दोंड आप्यू, एरगोथा ओवी दाऊदोन मोरने तोक, हेरा परिवार मायला हेर विरुद्ध लोळाय कोऱ्या एने तिने टेमे दाऊदोन ताकत कम होय गोयली होती. बाकुन परमेश्वर विश्वास योग्य होतु एने हिमी बी चोत कोरु जो दाऊद साते कोरनेन वायदू कोरलु होतु कि चू कोरसे. भोले दाऊद पाप कोरलु ती बी तेरे बादमां दाऊद एने बेतशेबान दिसरू पुऱ्यू होयू एने तेरो नाव सुलेमान मेक्या.