18. दुय भाग होयलो राज्य

दाऊद राजा चावीस साल तोक राज कोरलू, ओवतेन चू मोर गोयू एने तेरेबादमा हेर पुऱ्यू सुलेमान इस्राईल पोर राज कोरणे चालू कोऱ्यू. परमेश्वर सुलेमान साते वात कोऱ्यू एने पुछु कि सबसे जादा तू काय चाहतलु कि परमेश्वर हेरेन कोरता कोरे. सुलेमान परमेश्वर जू मांग्यू कि होयू घोणु बुद्धिमान बोनाव देय. जी वात परमेश्वर काजे खुश कोर देदू, एरेन कोरता परमेश्वर सुलेमान काजे दुनीयामा आखान मोटलु बुद्धिमान माणूस बोन गोयलू.

सुलेमान यरुशलेममा एक मंदिर बोनाव्यू जो हेर बाबू बोनावनेन कोरता योजना बोनावलू होतु एने सामान काजे एकठा कोरलू होतु. हिमी मेवावनेन तंबूमा नि बाकून मंदिरमा परमेश्वरोन आराधना कोरणे बाज गोया एने तेरेन कोरता बली चोळावने बाज गोया. तेरे बादमा परमेश्वर चा आवीन रोया कोरतू होतु एने चा चू तेरा मानसो साते रोयतू होतु.

ओवतेन, बादमा सुलेमान दिसरा देसोन पुरायटा साते प्यार कोऱ्यू. एने चू 1000 पुरायटा सी वियाव कोऱ्यू. एरेमा घोणा सोवटा बायरा पारका देसोन होता, एने चे तिंदरे साते तिंदरा देवे बी लाव्या एने आराधना कोरणे चालू राख्या. जेतार सुलेमान डायू होय गोयू ती चू बी तिंदरा देवोन आराधना कोरणे बाज गोयू.

इनान वजेसी परमेश्वर सुलेमानसी रीसवाय गोयू. चू कोये कि होयू इस्राईल देस काजे दुय भाग कोरीन हिनाक दोंड आपसे. चू सुलेमानोन मोरनेन बादमा कोरसे.

सुलेमानोन मोरनेन बादमा रहबाम राजा बोन गोयू. इस्राईल आखा माणसे हिनाकाजे राजा बोनावने एकठा होया. चे रहबाम काजे कोया कि सुलेमान आमुकाजे घोणु मेहनत कोरावलु एने घोणा सोवटा फावू वसूल कोरलू होतु. चे रहबाम काजे कोया कि कोम काम कोरावे.

बाकून रहबाम तीनुकाजे घोणु मूर्खतासी कोयू, “तुमु मोये कि मारू बास सुलेमान तुमुकाजे कठीन काम कोरावलु, बाकून मे तुमुकाजे तेरेसेबी जादा कठीन काम कोरावीस, एने मे तुमुकाजे तेरेसे बी जादा वेला पाळावीस.”

जेता माणसे यो सोमव्या ती तिंदरे माईन घोणा सोवटा जोना तेरे विरुद्धमा बुल्या. दस गोत्र तीनाकाजे छुळ देदा, एने तेरे साते दुय गोत्र वाचला होता. एने या दुय गोत्र खुदो काजे योहुदान राज्य कोया.

जा दस गोत्र होता चे यारोबाम नावोन एक माणूस काजे तिंदरु राजा बोनाव लेदा. ये गोत्र उत्तरी एने पूर्वी भागमा होता. एने चे खुदो काजे इस्राईलोन राज्य कोया.

बाकून यारोबाम बी परमेश्वरोन विरुद्ध बलवा कोऱ्यू एने मानसोक पाप कोराव्यू. चू हेरा मानसोन लारे आराधना कोरनेन कोरता दुय मुर्त्या बोनाव मांग्यू. हिमी चे यरूशलेममा याहुदान राज्य परमेश्वरोन मंदिरमा तेरी आराधना कोरनेन कोरता नि गोया.

इस्राईल एने योहुदा दुय दुश्मन बोन गोया एने हमेशा एक दिसरा साते लोळायने बाज गोया.

इस्राईलोन नोवला राज्यमा आखा दुष्ट माणसे होता. इंदरे माईन घोणा सोवटा राजा तिना जागा पोर राजा बोननेन इच्छा राखणे वावा दिसरा इस्राईलोन लारे माराय गोया.

इस्राईलोन आखा राजा एने जादातर माणसे मूर्तीन पूजा कोऱ्या. जेतार चे ओसा कोऱ्या तेतार चे वैश्या साते सुव्या एने या तोक घोणा कावा मूर्तीन ओगोव पुऱ्या काजे बली कोऱ्या.

योहुदा राज्यन राजा, दाऊदोन वंशमा गोथो होतो. तीनु राजा माईन थुलाक वारला माणसे बी होता जा वारू रीतीसी राज कोऱ्या एने परमेश्वरोन आराधना कोऱ्या. बाकून योहुदा मायला लोकेत राजा दुष्ट होता. चे दुष्टतासी राज कोऱ्या, एने मूर्तीन पूजा कोऱ्या. या तोक कि थुलाक राजा झुटा देवो ओगोव तिंदरा पुऱ्याकाजे बली कोर देदा. योहुदा मायला जादातोर माणसे परमेश्वरोन विरुद्ध बलवा कोऱ्या एने दिसरा देवोन पूजा कोऱ्या.