19. भविष्य कोरता

परमेश्वर हमेशा इस्राईलोन मानसोनचा भविष्य कोरता काजे मूकलतु होतु. भविष्य कोरता परमेश्वरोनचा गोथू संदेश काजे सोमोवतला एने ओवतेन चू मानसो काजे कोयतू होतु.

जेतार अहाब इस्राईलोन राजा होतु ती तिने टेमे एलिया भविष्य कोरता होतु. अहाब एक भुंडळा विचार वावु माणूस होतु. चू झुटा बाल देवोन पूजा कोरावने कोरता मजबूर कोऱ्यू. एरेन कोरता एलिया अहाब काजे कोयू कि परमेश्वर तीनु मानसोकाजे दोंड आपसे. एने ओवी चू तीनाकाजे कोयू, “जेतार तोक मे पोछू पाणी पोळने नि कोयो तेतार तोक इस्राईलोन राज्यमा पाणी नि पोळे एने नि धुवरो पोळे.” यी वात अहाब काजे घोणी रीस लागी एने चू एलिया काजे मारनेन कोर पोळयु.

कोरीन परमेश्वर एलिया काजे कोयू कि तू बोयळाम जाईन डूकाय जा. एलिया बोयळामा गोयू जा परमेश्वर जाणे कोरीन कोयलु. चा सारीक परमेश्वर एलीयान कोरीन हाळगावा रुटू एने मास लावता होता. इना आखी टेमोमा अहाब एने तेरी सेना एलियान हेर कोरता रोया, बाकून चे तीनाक हेर नि सोक्या.

पाणी नि आवनेसी आखो सुख गोयलो. एरेन कोरता एलिया साते वावा देसमा जात रोयलू. तिना देसमा एक गोरीब रोंडायली बायोर होती तेरु एक पुऱ्यू होतु. तिंदरे जुव बी खानो सोर गोयलो होतो, काहाकी चा बी दाणा-दुनि सोर गोयलो होतो. बाकून तीबी ची बायोर एलिया काजे खानो खावाळी. हिंदरे जुव हिदरे पुरतो होतो ते बी चे तीनाक आप देदा. एरेन कोरता परमेश्वर तिंदरी जरुरत नुसार पुराव्यू. एरे वोजसी तिंदरी पीठान दोब्बो एने तेलोन बोरणी नि सोऱ्यो. इना पुरा कावोमा तिंदरे जु खानो नि सोऱ्यो. एलिया ठुलाक दाहळा चा रोयू.

साडे तीन साल बादमा परमेश्वर एलिया काजे कोयू कि चू पोछू पाणी पाळसे एने एलिया काजे पोछू इस्राईलोन राज्यमा जाईन अहाबसी वात कोरणे कोरीन कोयू. एरेन कोरता एलिया अहाबोनचा गोयू. जेतार अहाब तीनाक देख्यू ती चू कोयू, “वारलू तू छे, मुसिबत काजे पोयदा कोरणे वावु,” एलिया जवाब आप्यू, मुसिबत पोयदा कोरणे वावु ते तू छे, तू योहोवा काजे छुळ देद्लू छे, चूत खोरलु परमेश्वर छे, बाकून तू बालोन आराधना कोरणे बाज रोयू. हिमी तुसेक इस्राईलोन आखा मानसोक कोर्मेल बोयळा पोर लावनो छे.”

आखिर कोर्मेल बोयळा पोर गोया. चे माणसे बी आव्या जे कोयता होता कि आमु बालोन बारामा कोयतला. या बालोन भोविष्य कोरता होता. चे आखा 450 होता. एलिया मानसोकाजे कोयू, “केतार तोक तुमू तुमरा मोनोकाजे होसला राखसू? अगोर योहोवा परमेश्वर छे ती तेरी आराधना कोरु, अगोर बाल परमेश्वर छे ती तेरी आराधना.”

तेतार एलिया बालोन भविष्य कोरता काजे कोयू, “एक बुल काजे मारीन तेरा मास काजे बलिदान कोरणे कोरता एक वेदी पोर मेकू, बाकून आठो घोन लागाळता. तेरे बाद मे बी असोत कोरिस एने एक अलग वेदी पोर मास मेकीस, तेतार अगोर परमेश्वर वेदी पोर आगठो आवे ती तुमु जान लेसू कि चू खोरलु परमेश्वर छे.” तेतार बालोन भविष्य कोरता एक बली काजे तीयार कोऱ्यू बाकून आगठो नि आव्यो.

तेतार बालोन भविष्य कोरता बाल सी प्रार्थना कोऱ्या, “हे बाल आमरी सोमोव,” पुरू दाहळू चे प्रार्थना कोऱ्या एने आयळ्या एने या तोक कि चे खुद काजे चोक्के कोरीन काट लेदा, बाकून बाल जवाब नि आप्यू, एने आगठो बी नि आव्यो.

बालोन भविष्य कोरता प्रार्थना कोरणेमा लगभग पुरू दाहळू लाग गोयलू. आखिर चे प्रार्थना कोरणे बंद कोर देदा. ओवतेन एलिया बुल काजे माऱ्यू एने वेदी पोर मेक्यू. तेरे बादमा मानसोकाजे पाणिन मोटला टाहराकाजे तिना बलीदान पोर जेतार तोक रेचोवने कोरीन कोयू जेतार तोक कि मास, लाकडा एने या तोक कि वेदिन आसपासोन जागू पुरी रीतीसी भिग जाय.

तेतार एलिया प्रार्थना कोऱ्यू, “हे योहोवा, अब्राहम, इसहाक, एने याकुबोन परमेश्वर आमुक देखाळ कि तू इस्राईलोन परमेश्वर छे एने यो कि मे तारू दास छे. मेसेक उत्तर आप जेरेसी कि ये माणसे जान जाय कि तू खोरलु परमेश्वर छे.”

तेतारुत उपोर गोथी आगठो आव्यो एने मास,लाकडा, दोगळा, धुवू एने या तोक कि वेदिन आस्पासोन पाणी काजे बी धोपाळ देदू. जेतार माणसे यो देख्या, एने चे भीमा पोळग्या एने कोया, “योहोवात परमेश्वर छे, योहोवात परमेश्वर छे.”

तेतार एलिया कोयू, “बालोन एक बी भविष्य कोरता वाचीन नि जाय”एरेन कोरता माणसे बालोन भविष्य कोरता काजे धोर लेदा एने तीनुकाजे चा दोखा अलोग लीन जात रोया एने तीनुक मार देदा.

तेतार अहाब राजा काजे कोयू कि, “छाटूस तारे घोर जात रोय काहाकी पाणी पोळन्यू छे.”छाटास वादवो एकठो होय जासे एने पाणी पोडनो चालू होय गोयू. योहोवा टीका सुकला काजे सारेतू होतु इनासी मालूम होयो कि योहोवा खोरलु परमेश्वर छे.

जेतार एलिया तेरा काम काजे सार देदू, तेतार पेमेश्व्र एलिशा नावोन माणूस काजे तेरु भविष्य कोरता कोरीन नेवाळयु. परमेश्वर एलीशान लारे घोणा सोवटा चमत्कार कोऱ्यू. एक चमत्कार नामान साते होयू. चू एक दुश्मनोन सेनान सोरदार होतु. बाकून तेरे चामळान एन घोनी भुंडी बिमारी लागली होती. नामान एलीशान बारामा सोमवलु होतु, एरेन कोरता चू एलिशानचा गोयू एने वारू होयनेन कोरता विनंती कोरणे बाज गोयू. एलिशा नामान काजे कोयू कि यरदन नोदीन पाणीमा सात कावा डुबकी लागाड ले.

नामान रीसवाय गोयू, चू तोसु कोरणे सी मना कोर देदू, काहाकी तिना काजे उद्ळूत लोये लागलो. बाकून ओवतेन चू तेरो मोन बोदलाव लेदू एने यरदोन नदीमा जाईन सात कावा डुबकी लागाळयु. जेतार आखरी कावा चू पानीमा गोथू बारथे आव्यू ती परमेश्वर तीनाक वारू कोर देदू.

परमेश्वर इस्राईल मानसोनचा लोके सोवटा भविष्य कोरता काजे मूकल्यु. चे आखा माणसो काजे मूर्तीन पूजा बंद कोरणे कोरीन कोया. एर वेतीन तीनुकाजे एक दिसरा साते वारू वागनो एने एक दिसरा पोर मोंग कोरनो जुवे. भविष्य कोरता तीनु काजे चेतावनी आप्या कि चे भुंडलो काम कोरणे छुळ देय एने एर वेतीन परमेश्वरोन आग्यान पालोन कोरनो छे. अगोर चे माणसे ओसा नि कोऱ्या ती परमेश्वर तीनुकाजे दोषी मानीन तिंदरु न्याय कोरसे. एने तीनुकाजे दोंड आपसे.

जादा तोर माणसे परमेश्वरोन आग्यान पालोन नि कोऱ्या, हमेशा चे भविष्य कोरता साते भुंडो व्योवहार कोऱ्या एने या तोक कि चे तीनुकाजे मार बी देदा. एक कावा यीर्मयाकाजे सुकला कुवामा नाख देदा एने तिना काजे मोरने कोरीन चा छुळ देदा. चू कुवान कीचळमा धस गोयू. बाकून तेतार राजा काजे तर पोर दया कोऱ्यू एने तेरा सैनिक काजे कोयू कि यीर्मया काजे मोरनेन पेहेल कुवाम गोथा इकाव लेवू.

भविष्य कोरता परमेश्वरोनचा गोथा बुलनो चालू राख्या भोले माणसे तिंदरे सी नोफरोत कोऱ्या. चे तीनुकाजे चेतावनी आप्या कि अगोर चे पश्चाताप नि कोरे ती परमेश्वर तीनुकाजे नाश कोर देसे. चे मानसो काजे यो बी फोम कोराव्या कि परमेश्वर तिंदरेनचा मसिह काजे मुकलनेन वायदू कोऱ्यू.