20. गुलामी एने छुटकारु

इस्राईलोन राज्य एने योहुदान राज्य परमेश्वरोन विरुद्ध पाप कोऱ्या. चे तिनी वायदाकाजे तुळ्या जी परमेश्वर तिंदरे साते सिनाई बोयळापोर कोरलू होतु. परमेश्वर तेरा भविष्य कोरता काजे मुकल्यू ताकि चे कोय सोके कि पश्चाताप कोरु एने परमेश्वरोन आराधना कोरु. बाकू चे हिंदरी नि सोमव्या.

आखिर परमेश्वर तिंदरा दुश्मनोन लारे तीनुकाजे नाश कोऱ्यू एने दुयू राज्य काजे दोंड आप्यू. अश्शूर एक दिसरू देस होतो जो घोनो ताकत वावो बोन गोयलो होतो. अश्शूरोन माणसे इस्राईल राज्यमा आवीन घोणा सोवटा मानसोकाजे मार देदा. हिणूक लाग्यो तोसो हापकीलेदा एने देसोन घोणा सोवटा भाग काजे धोपाळ देदा.

अश्शूर देसोन माणसे आखा अगवा काजे, मालदार मानसोक, एने ओसला मानसोक जे मोहोंगला चीजे बोनावतला तीनुक एकठा कोऱ्या एने चे तीनुक तिंदरा देसमा लीग्या. इस्राईल देसमा थोलाक गरीब इस्राईलोन पुऱ्या वाचला होता.

ओवतेन अश्शुरीन माणसे हिंदरा देसमा रोयनेन कोरता बाहार देसोन मानसोक लाव्या, एने चे विदेशी माणसे तिना गाव काजे बोनाव्या . जे इस्राईल चा वाचला होता तिंदरे साते चे वियाव कोऱ्या, एने इंदरी पिढी सामरी कोवायी.

योहुदा राज्यान माणसे देख्या कि परमेश्वरोन आग्या नि माननेसी एने भुरसू नि कोरणेसी इस्राईल राज्यांन मानसोकाजे कोसू दोंड आपलु होतु. बाकून तीबी चे कणांनी देवोन पूजा कोरता रोया. परमेश्वर तीनुकाजे चेतावनी आपनेन कोरता भविष्य कोरता काजे मुकल्यू, बाकून चे सोमोवनेसी मना कोर देदा.

लगभग 100 साल बाद अश्शूरोन माणसे इस्राईलोन राज्य काजे नाश कोर देदा. परमेश्वर बेबिलोनोन राजा, नबूकदनेस्सर काजे योहुदा राज्य पोर हमलू कोरणे मुकल्यू. बेबिलोन एक ताकतवावो देस होतो. योहुदान राजा नबूकदनेस्सरन दास बोननेएने होर साल तिना काजे घोनो सोवटो धोन आपने कोरता मान गोयू.

बाकून काही साल बाद, यहूदान राजा बेबिलोनोन विरुद्ध बलवा कोऱ्या. आखिर बेबिलोनिया पोछा आवीन योहुदान राज्य पोर हमलु कोर देदा. चे यरुशलेम गावपोर ताबू कोर लेदा. मंदिर काजे नाश कोर देदा एने गाव, एने मंदिर काजे लुट लेदा.

बलवा कोरनेन वजहसी योहुदा राजा काजे दोंड आपने कोरीन, नबूकदनेस्सरोन सैनिक राजान पुऱ्या काजे तेरे सामने मार देदा एने ओवतेन तिना काजे आंदवू कोर देदू एरेबाद, चे राजा काजे लीन गोया ताकि होयू बेबिलोनोन जेलमा मोर जाय.

नबूकदनेस्सरोन एने तेरा माणसे योहुदा राज्यन लगभग गरीब काजे छुळीन आखा माणसोकाजे बेबिलोन लीन जात रोया, ताकी चे आखा खेतमा धोन उगाळ सोके. इना टेमोकाजे गुलामीन टेम कोवायलो होतो जेरोमा परमेश्वरोन माणसे वायदान देसमा होथा निकोवने कोरीन मजबूर कोरलू होतु.

भोले परमेश्वर तिंदरा पापोन कोरता गुलामीमा लीजाईन तीनुक दोंड आप्यू, तीबी चू तीनुक एने तेरा वायदा काजे नि वीसऱ्यू. परमेश्वर हेरा मानसे हेर निगरानिमा होता एने भविष्य कोरतान लारे परमेश्वर तिंदरे साते वात कोरतू होतु. चू वायदान सत्तर साल बाद चे पोछा वायदान देसमा आवसे.

लगभग सत्तर साल बादमा फारोसोन राजा कुस्रू बेबिलोन काजे हाराव देदा, एरेन कोरता बेबिलोनोन राज्यन बजाय फारोसोन राज्य घोणा देसोपोर राज कोरणे बाज गोयू. इस्राईल माणसे योहुदी कोवायनेबाज गोया. तिंदरे माईन घोणा सोवटा बेबिलोनमा तिंदरो जीवन बिताव देदला होता. घोणा ठुलाक योहुदी काजे योहुदा देस फोम होतो.

फरीसी माणसे घोणा ताकतवावा होता. बाकून चे जिकला मानसोपोर दोया कोरला होता कि फारसी माणसोन राजा बोननेन थुलाक टेमोबाद बादमा, क्रुसू एक आदेश आप्यू कि कुदू बी योहुदी जू योहुदा जाणे हिंडे, चा फारसमा गोथा जाय सोकतल. या तोक कि चू तीनुक मंदिर बोनावने पोयशा बी आप्यू. आखीरमा गुलामीन सत्तर साल बाद, योहुदीन एक नानुस टुवू योहुदामा यारुशलेम गावमा आव लाग्या.

जेतार चे यरुशलेम पुग गोया ती मंदिर काजे एने गावोन चारू धोळे एक भीतळो बोनाव्या. फारसी माणसे तेतार बी तिंदरे पोर राज बाकून एक कावा पोछा एक कावा पोछा चे वायदान देसमा जाता होता एने मंदिरमा आराधना कोरता होता.