21. परमेश्वर मासिहीन वायदू कोरे.

जेतार परमेश्वर संसार काजे बोनाव्यू, चू जंतू होतु कि तीनाक काहने दाहळे मसिह काजे मुकलनो पोळसे. चू आदम एने हव्वा काजे वायदू कोऱ्यू कि ओसू कोरसे. चू कोयू कि हव्वासी एक वारीस जन्म लेसे जो घोळसान मुनकाक कुचरसे. जू घोळसू हव्वा काजे धोकू आप्ळू चू छाचलीन भुतडू होतु. परमेश्वरोन मतलब होतो कि मसिह पुरी रीतीसी भुतडा काजे हाराव देसे.

परमेश्वर अब्राहमसी वायदू कोरलू होतु कि तेरे लारे संसारोन आखी जाती आशिष लेसे. परमेश्वर तेरे बादमा काहना टेमोमा मसिह काजे मुकलनेन लारे इना वायदाक पुरू कोरसे. चू मसिह संसारोन होर एक जातीमासी मानसो काजे तिंदरा पापोसी छुळावसे.

परमेश्वर मुसासी वायदू कोरलू होतु कि भविष्यमा चू मुसा सारखू एक दिसरा भविष्य कोरता काजे मुकलसे. यो भविष्य कोरता मसिह होय्से. इना रीतीसी परमेश्वर पोछू वायदू कोऱ्यू कि चू मसिह काजे मुकलसे.

परमेश्वर राजा दाऊदसी वायदू कोरलू होतु कि तेरु एक वारीस मसिह होयसे. चू राजा होयसे एने परमेश्वर मानसोपोर कायोम राज कोरसे.

परमेश्वर यिर्मयाह भविष्य कोरता साते वात कोऱ्यू एने कोयू कि एक दाहळे चू एक वायदू बांदसे. ची नोवलु वायदू इस्राईल साते सिनाई बोयळा पोर बांदलु ची जुनळा वायदान तोसी नि रोये. जेतार चू मानसो साते नोवलु वायदू कोरसे ती चू तिंदरे पोर एखलातमा प्रकट कोरसे. होर एक जोन तेरेसी मोंग कोरसे एने तेरी नियोम पोर चालनेन मोरजी कोरसे. परमेश्वर कोयू कि यो तिंदरा दिल पोर लिख देनेन सारखो होयसे. चे तेरा माणसे होयसे एने परमेश्वर तिंदरा पाप काजे माफ कोरसे चू मसिह होयसे जो तेरे साते चू नोवलु वायदू कोरसे.

परमेश्वरोन भविष्य कोरता यो बी कोया कि मसिह एक भविष्य कोरता होयसे. एक भविष्य कोरता चू माणूस छे जू परमेश्वरोन वचन काजे सोमवे एने ओवतेन मानसो पोर परमेश्वरोन प्रचारोन घोषणा कोरे. जीनाक मुकल्नेन कोरता परमेश्वर वायदू कोरलू होतु चू मसिह चुखलू भविष्य कोरता होयसे. मतलब चू मसिह परमेश्वरोन प्रचार काजे वारू रीतीसी सोमवाळसे. एने चू मानसो काजे तिना प्रचार काजे वारू रीतीसी सोमजाळसे.

इस्राईली याजक मानसोन कोरता परमेश्वरोन ओगोव बलिदान चोडावनो चालू राख्या. यो बलिदान मानसोन पाप कोरता तीनुक परमेश्वरोन लारे दोंड आपनेन जागे चोळावला होता. याजक मानसोन कोरता प्रार्थना कोऱ्या. बाकीन चू मसिह चुखलू महायाजक होयसे जू परमेश्वर काजे आपनेन कोरता चुखलो बलीन रूपमा खुदो काजे चोळाव देसे. मतलब चू कोबी पाप नि कोरे, एने जेतार चू खुद काजे बली होयनेन कोरता आपसे, ती संसारोन दिस्रो कानलात बलीन गरज नि रोये.

मानसोन पोर राजा एने प्रधान याजक राज कोरता होता. एने कोबी कोबी चे गलती कोरता होता. राजा दाऊद निस्तु इस्राईल पोर राज कोरलू बाकीन राजा दाऊदोन पीढीन मसिह पुरा संसार पोर राज कोरसे, एने चू कायोमोन कोरता राज कोरसे. ओवी चू हमेशा नियोमोन अन्सारे राज कोर्से, एने सही फैसला लेसे.

परमेश्वरोन भविष्य कोरता मसिहन बारामा घोणा सोवटा वातो काजे कोया. उदाहरोनोन कोरता, मलाकी कोयू कि मसिहन आवनेन पेहेल एक दिसरू भविष्य कोरता आवसे. चू भविष्य कोरता घोणु महोत्वान रोयसे. इरे अलावा यशयाह भविष्य कोरता बी लिखलु कि मसिह एक कुवारीसी जन्म लेसे. एने मिका भविष्य कोरता नि कोयू कि मसिह बैथलेहेमगावमा पोयदा होयसे.

यशयाह भविष्य कोरता कोयू कि मसिह गलीलोन जागामा आवसे. जे माणसे घोणा दुखी छे मसिह तीनुक शांती आपसे. चू कैदी काजे आजाद कोरसे. मसिह मांदळा काजे एने जे नो सोमोव सोकतला, नि देखतला, एने नि बुल सोकतला एने नि चाल सोकतला तीनुक बी वारू कोरसे.

यशयाह भविष्य कोरता यो बी कोयू कि माणसे मसिह सी नफरत कोरसे एने तीनाक स्वीकार कोरणे सी मना कोरसे. दिसरा भविष्य कोरता बी कोया कि मसिहीन एक साथी तेरे विरुद्ध उबरोयसे. जखर्या भविष्य कोरता बी कोयू कि तेरु यु साथी ओसो कोरनेन कोरता दिसरा मानसोनचा गोथू चांदीन थिस सिक्का लेसे. इरे अलावा, काहनास भविष्य कोरता बी कोया कि माणसे मसिह काजे मार देसे, एने यो बी कि तेरा छिंदरान कोरता छोटू खेलसे.

भविष्य कोरता यो बी कोयला कि मसिह कोसू मोरसे. यशयाह भविष्य वाणी कोऱ्यू कि माणसे मसिह पोर थूपसे, तेरो मजाक उळावसे एने तीनाक ठूकसे. चे तीनाक छेद देसे एने चू मोटली पिळा एने दुखमा मोर जासे, जबकी चू काय बी गलत नि कोऱ्यू.

भविष्य कोरता बी कोया कि मसिह पाप नि कोरे. चू सिद्ध होयसे. बाकीन चू एरेन कोरता मोरसे कि परमेश्वर तीनाक दिसरा मानसोन पापोन वोजेसी दोंड आपसे. तेरे मोरने सी माणसे परमेश्वर साते मेल कोरणेमा योग्य होयसे. एरेन कोरता परमेश्वर चाहतलु कि मसिह मोरे.

भविष्य कोरता यो बी कोयला कि परमेश्वर मसिह काजे मोरलाम गोथू जीवाळसे. यो देखाळे कि यो आखो नोवला वायदा काजे बांदनेन परमेश्वरोन योजना होती, टाकी चू तीनु मानसो काजे वाचाळ सोके जे तेरे विरुद्ध पाप कोरला छे.

परमेश्वर भविष्य कोरता पोर मसिहन बारामा घोणा सोवटा वाते प्रकट कोऱ्या बाकीन मसिह तीनु भविष्य कोरतान काहनात जीवन कालमा नि आव्यू. इनू भविष्यवाणी आपनेन 400 साल बादमा सही टेम पोर, परमेश्वर मसिह काजे एनी संसारमा मुकलसे.