22. योहानोन जन्म

अतीतमा परमेश्वर तेरा भविष्य कोरता साते वात कोरलू होतु एरेन कोरता चे मानसो साते वात कोर सोकता होता. बाकीन तिने टेमे गोथू लीन ओवतेन 400 साल जाणे तोक चू तीनु साते वात नि कोऱ्यू. तेतार परमेश्वर जखर्या नावोन एक भविष्य कोरतानचा एक सोरग दूत काजे मुकल्यू. जखर्या एने तेरी लाळी एलीशिबा परमेश्वरोन आदोर कोरता होता. चे घोणा डाया होय गोयला होता, एने तिंदरा पुऱ्या नि होता.

चू सोरग दूत जखर्या काजे कोयू, “तारी लाळी एक पुर्या काजे पोयदा कोरसे. तू तेरो नाव योहान मेकजी. परमेश्वर तीनाक पवित्र आत्मा सी पुरो कोरसे. एने योहान मसिह काजे ग्रहण कोरनेन कोरता तीयार कोरसे.” जखर्या जवाब आप्यू, “मे एने मारी लाळी पुऱ्या पोयदा कोरनेन कोरता घोणा डाया छे, मे कोसू जाणो कि तू मेसेक छाचलीन कोय रोयू?”

चू सोरग दूत जखर्या काजे जवाब आप्यू, “तारे जुव इनि वारली खोबर काजे लावनेन कोरता मे परमेश्वरोनचा गोथू मुकलू छे. काहाकी तू मारे पोर भूरसू नि कोऱ्यू ए रेन कोरता इना पुऱ्याक जन्म लेन तोक तू नि बुल सोके.” तेतारुत जखर्यान बुलनो बोंद होय गोयो. तेतार चू सोरग दूत जखर्यानचा गोथू जात रोयू. तेरे बादमा जखर्या घोर जात रोयू एने तेरी लाळी गर्भवती होयी.

जेतार एलीशिबा छोव मोयनान गर्भवती होती, ती चूत सोरग दूत अचानक एलीसिबान रीस्तेदार पोर आव्यू जेरो नाव मरियम होतो. मरियम छोल्ली होती एने वियाव होयनेन कोरता युसूफ नावोन मानसो साते सोगाय होय गोय्ली होती. सोरग दूत कोयू, “तू गर्भवती होयीश एने एक पुऱ्याक पोयदा कोरिस. तुसेक तेरो नाव येसू मेक्नो छे. चू सर्व शक्तिमान परमेश्वरोन पुऱ्यू होयसे एने कायोमोन कोरता चू राज कोरसे.”

मरियम जवाब आपी, “यो कोसो होयसे, काहाकी मे ते कुवारी छे?” चू सोरग दूत सोमजाळ्यु, “पवित्र आत्मा तार पोर आवसे एने परमेश्वरन ताकत तारपोर आव्या कोरसे. एरेन कोरता चो पुऱ्यो चुखलो रोयसे, एने चो परमेश्वरोन पुऱ्यू होयसे.” जो चू सोरग दूत कोयलू तर पोर मरियम भूरसू कोरी.

यो होयनेन तेतारुत मरियम एलीशीबा सी भेट कोरी. जोसी मरियम तीनि काजे नमस्कार कोरी एलीशिबान पुऱ्यो पेटोमा उछव्यो. तिंदरेन कोरता परमेश्वर जो कोरलू होतु तेरे बारामा चे बायरा एकठा खुश होया. एलीशिबा साते तीन मोय्ना रोयनेन बाद मरियम घोर जात रोयी.

तेरे बाद, एलीशिबा तेरा पुऱ्या काजे जन्म आपी. जखर्या एने एलीशिबा तिना पुऱ्यान नाव योहान मेक्या जोसो कि चू सोरग दूत कोयलू होतु. तेतार परमेश्वर जखर्या काजे बुलने कोरता मूय उगाळ देदू. जखर्या कोयू, “परमेश्वरोन बोढाई होये, काहाकी चू तेरा मानसोन मदत कोरनेन कोरता फोम राख्यू. हे मारा पुऱ्या तू सर्व शक्तिमान परमेश्वरोन भविष्य कोरता होयीस, तू मानसो काजे कोयीस कि कोसा तिंदरा पापे माफ होय सोकतला.