23. येसून जन्म

युसूफ नावोन एक धोरमी माणूस साते मरियमोन मंगनी होय गोयली होती. जेतार चू सोमव्यु कि मरियम गर्भवती छे ती चू जानतू होतु कि होयो हेरो पूऱ्यो नि होय. बाकीन चू मरियम काजे बदनाम नि कोरणे हिंडतू होतु. एरेन कोरता चू तेरे पोर दोया कोरने एने चुपचाप छुळ देनेन विचार कोऱ्यू. बाकीन एर गोथा पेहेल कि चू ओसू कोरतू, एक सोरग दूत तेरा सोपनाम आवीन तेरे साते वात कोऱ्यू.

चू सोरग दूत कोयू, “हे युसूफ, मरियम काजे तारी लाळीन रूपमा लावणे मा बिहे. तेरेमा जो पुऱ्यो छे चो पवित्र आत्मानचा गोथो छे. होई एक पुऱ्याक जन्म आपसे. तेरो नाव येसू मेकजी (जेरो मतलब होयतलो, ‘योहोवा वाचाळे’), काहाकी चू मानसो काजे तिंदरा पापोसी वाचाळसे.”

आखरी, युसूफ मरियम साते वियाव कोऱ्यू एने तिनी काजे लाळीन रूपमा घोर लीन गोयू, बाकीन तिना पुऱ्या काजे जन्म आपने तोक चू तेरे साते नि सुव्यू.

जेतार मरियमोन जन्म आपनेन पिळा आव लाग्या ती ची एने युसूफ बैतलहम जाणेन बाज गोया. तीनु काजे चा जाणोत होतो काहाकी रोमी अधिकारी इस्राईलमा रोयनेवावान आखा मानसोन गिनती कोरणे हिंडता होता. चे चाहता होता कि आखा चा जाय जा तिंदरा डाय डाया रोय्ता होता. राजा दाऊदन जन्म बैतलहम होयलो होतो, एने चू मरियम एने युसूफ दुयोन दायलू होतु.

मरियम एने युसूफ बैतलहम गोया, बाकीन चा जानवोरो काजे मेकनेन जागा सीवाय दिसरू जागू नि होतु. चूत जागू होतु जा मरियम पुऱ्या काजे जन्म आपी. ची तिना काजे चरणीमा लुटाळ देदी काहाकि चा तेरेन कोरता खाटलो नि होतो. चे तेरो नाव येसू मेक्या.

तिने राती, चा साते वावा खेतोमा थुलाक गुवाव्या तिंदरा गाडरा काजे चारता होता. अचानक एक चमकदार सोरग दूत तिंदरे पोर आव लाग्यू एने चू कोयू, “बिहू मा, काहाकी मारे जुव तुमरेण कोरता एक वारली खोबोर से, बैतलहममा मसिहन जन्म होय्लो छे.”

जाईन तिना पुऱ्यान हेर कोरु, एने तुमु तिना काजे कापळामा गुंडवायलो एने चरणीमा लुटलो देखसू.” अचानक सी आकाश सोरग दूतसी भोराय गोयो. चे परमेश्वरोन स्तुती कोरता होता. चे कोया, “आखी महिमा सोरगोम रोयन्यापरमेश्वर काजे जुळे. धोरती पोर तीन मानसोमा शांती रोये जिंदरी चू चिंता कोरे.”

तेतार सोरग दूत जात रोया. गुवाव्या बी तिंदरा गाडराक छुळीन तिना पुऱ्या काजे देखणे जात रोया. मामार चे तिना जागा पोर पुग्या जा येसू होतु एने चे तीनात चरणीमा लुटलु देख्या जोसो कि चू सोरोग दूत कोयलू होतु. चे घोणा खुश होता. तेतार चे गुवाव्या पोछा जात रोया जा तिंदरा गाडरा होता. चे जो काय सोमोवला होता एने देख्या तिना अखान कोरता चे परमेश्वरोन बोढाई कोरता होता.

पुरोबमा नांबेत एक देशमा थुलाक माणसे होता. चे चांदण्यान अभ्यास कोरला होता एने चे घोणा बुद्धिमान होता. चे एक असामन्य तारा काजे आकाशमा देख्या. चे कोया कि एरो मतलब छे कि योहुदीन एक राजा जन्म लेदलू छे. एरेन कोरता तिना पुऱ्या काजे देखनेन कोरता तिंदरा देसमा गोथा जाणे फेसलू कोऱ्या. एक नांबी यात्रान बादमा चे बैतलहममा आव्या एने तिना घोरनचा आव्या जा येसू एने तेरा आसी बासा रोय्ता होता.

जेतार चे माणसे येसू काजे तेरी आश साते देख्या ती चे घुटना टेकिन तेरी आराधना कोऱ्या. चे येसू काजे मोहेंगळा भेट चोळाव्या. ओवतेन चे घोर पोछा जात रोया.