25. भुतडू येसून पारख कोरे

येसून बाप्तिस्मा होयनेने बादमा, पवित्र आत्मा येसू काजे बोयळामा लीन गोयू. येसू चा चावीस दाहळा एने रात रोयू. तिने टेमे चू उपास राख्यू एने भुतडू येसुनचा आवीन पाप कोराव्नेन कोरता तेरी पारोक कोऱ्यू.

पेहेल भुतडू येसू काजे कोयू, ओगोर तू देवोन पुऱ्यू होय ती इना दोगळा काजे रुटू बोनाव दे टाकी तू खाय सोके.“

बाकीन येसू भुतडा काजे कोयू, “देवोन वचनमा लिखलो छे, “जीवतला रोय्नेन कोरता मानसो काजे निसतो रुटासी नि बाकीन देवोन मुखसी निकोवली वातोन गोरोज छे जो देव तीनुक कोये.”

तेतार भुतडू येसू काजे मंदिरोन उपोर लीन गोयू एने कोयू कि, “ओगोर तू देवोन पुर्यू छे ती न्या घोठू कुड जा, काहाकी लीखलो छे, ‘देव तुसेक हाकलनेन कोरता तेरा दुतो काजे आग्या आपसे कि तारा पायो काजे दोगळा सी काय ठेस नि लागे.’”

बाकीन येसू तोसो नि कोऱ्यू जो भुतडू तीनाक कोरणे कोयल. बाकीन चू उलटू कोयू, “देव होर एक काजे कोये कि, ‘तू प्रभू तारा देवोन पारख मा कोरे.”

ओवतेन भुतडू संसारोन आखा राज्य देखाड्यू. चू देखाड्यू कि चे कोतरा ताकत वावा होता, एने चे कोतरा पुरा छे. चू येसू काजे कोयू, “मे तुसेक यो आखो आपीस ओगोर तू मार ओगोव मांडा तेकीस एने मारी आराधना कोरिस.”

येसू जावाब आप्यू, “हे भुतडा, मार ओगोव गोथू जात रोय. देवोन वोचनोमा चू आग्या आपे कि, ‘निस्तू तू तारा देवोन आराधना कोर एने देवोन रूपमा तिनान आदोर कोर.”

येसू भुतडान पारखसी हार नि मान्यु, एरेन कोरता भुतडू तेरेनचा गोथू जात रोयू, तेतार सोरोग दूत आव्वीन येसुन सेवा कोरणे बाज गोया.