26. येसू तेरी सेवान चालू कोरे

भूत्दान पारख वात जुवनेन बादमा, येसू पोछू गलीलोन जागामा आव्यू. यो चू जागू छे जा होयू रोयतू होतु. पवित्र आत्मा तीनाक घोनी ताकद आपटू होतु, एने येसू एक जागे गोथू दिसरे जागे गोयू एने मानसो काजे सिकाड्यू. आखा जोना तेरे बारामा वारली वात कोया.

येसू नासरत गावमा गोयू. यो चो गाव छे जा येसू हेरो बचपोनमा रोयतू होतु. सब्बातोन दाहळे, चू आराधना कोरनेन जागे गोयू. जे अगवा होता चे तिना काजे याशयाहन किताब काजे भोनने कोरता आप्या. चे चाहता होता कि होयू चा दोखू भोणे. आखिर येसू तिनी किताब काजे उगाडीन तेरा एक भाग काजे मानसोन कोरता भोन्यु.

येसू भोन्यु, “परमेश्वर मेसेक तेरी आत्मा आपलु छे ताकि मे कंगाल मानसोमा वारली खोबोरोन प्रचार कोर सोको. चू मेसेक एरेन कोरता मुकललु छे कि बंदी काजे आझाद कोरो, आंदवा काजे पोछू देखाडो, एने तीनुक छुटकारु आपो जीणूक दिसरा माणसे कुचरी रोया. यो चू टेम छे जेतार परमेश्वर आपने उपोर दोयावू होयसे एने आपने मोदोत कोरसे.”

ओवतेन येसू बोठ गोयू. आखा माणसे ध्यानसी येसू काजे देखता होता. चे जाणता होता कि पवित्रशास्त्रन जू भाग चू हिमी भोन्यु चो मसिहन बारामा होतो. येसू कोयू, “जे वाटे मे हिमी तुमरेन कोरता भोनलु छे, चे इने टेमे घाटीत होयने बाज रोया.” आखा माणसे चकित होय गोया. चे कोया, “ काय यु युसुपोन पुऱ्यू नि होय?”

तेतार येसू कोयू यो छाचलीन छे कि माणसे ओसला भविष्य कोरता काजे कोबी स्वीकार नि कोरतला जे तिन्दरा गावमा मोटा होयला छे. एलिया भविष्य कोरतान टेमे, इस्राईलमा घोणा सोवटा रोंडायला होता. बाकीन जेतार साडे तीन साल तक पाणी नि आव्यू ती परमेश्वर एलिया काजे इस्राईलमा कानी रोंडालीन मदत कोरणे नि मुकल्यु. बाकीन चू एलिया काजे काहनास दिसरा देसोन रोंडायलीनचा मुकल्यू.”

येसू कोयने चालू राख्यू, “एने एलिशा भविष्य कोरतान टेमोमा, इस्राईलमा घोणा सोवटा माणसे चामडान बिमारीसी बिमार होता. बाकीन एलिशा तिन्दरे माईन कुदाक वारू नि कोऱ्यू. चू निस्तु इस्राईलोन दुश्मोन सेनापती नामान काजे वारू कोऱ्यू.” बाकीन जे माणसे येशू काजे सोमोव्ता होता चे योहुदी होता. एरेन कोरता जेतार चे तीनाक यो कोयतलु सोमव्या ती चे तेरेपोर रीसवाय गोया.

नासरतोन माणसे येसू काजे धोर लेदा एने तीनाक आराधनान जागापोर गोठा घीसळीन बारथे लीन गोया. चे तीनाक मार नाखनेन कोरता नेचा नाखानेन कोरता बोयळा पोर लीन गोया. बाकीन येशू भिळमा निकवी गोयू एने नासरत गाव काजे छुडीन जात रोयू.

ओवतेन येसू आखी गलीलोन जागामा गोयू, एने मोटली भिळ तेरेंचा आवी. चे ओसला घोणा सोवटा मानसो काजे लीन आव्या जे बिमार होता एने विकलांग होता. तिन्दरे माईन काहनास देख, चाल नीती बुल नि सोक्ता होता, एने येसू तीनुक वारू कोऱ्यू.

एरे अलावा, घोणा सोवटा ओसला माणसे येसूनचा लाव्या जिंदरेमा दुष्टात्मा होता. येशू दुष्टात्मा काजे तिन्दरेमा गोथू निकवनेन आदेश आप्यू. चे दुष्टात्मा आयळ्या, “तू परमेश्वरोन पूऱ्यू छे,” भिळ मायला माणसे चकित होता, एने चे परमेश्वरोन स्तुती कोऱ्या.

ओवतेन येसु बारा मानसो काजे नेवाड्यू जीणूक चू प्रेरित कोयू. चे प्रेरित तिन्दरे साते गोया एने तेरेंचा गोथा शिक्षा लेदा.