27. मोंगावा सामरीन काहानी

एक दाहळे, यहुदी नियोम शास्त्रा काजे जानने वावू एक माणूस येसूनचा आव्यू. चू आखा काजे यो देखाळणे चाह्तु होतु कि येसू गलत रीतीसी सिकाळने बाज रोयू, इनान कोरता चू कोयू, “हे गुरु, ओमोरर्काइन जीवनोन कोरता मे काय कोरो?” येसू तीनाक कोयू, “ देवोन नियोम शास्त्रामा काय लीखलो से?”

चू माणूस कोयू, “नियोम शास्त्र कोये कि तारा देवोसी तारा पुरा मोनोसी, जीवोसी, ताकतसी एने बुद्धीसी मोंग कोर. एने तुमरा सातेवावा साते बी तुमरे तोसुत मोंग कोरु.” येसू जवाब आप्यू, “तू छाचलीन कोय रोयू, अगोर तू ओसुत कोरिस ती तुसेक ओमोरर्काइन जीवन जूळ जासे.”

बाकीन चू नियोम शास्त्र जानने वावू मानसो काजे देखाळने हिंडतू होतु कि तेरो जीवनेन तरीकू वारू होतो. इनान कोरता चू येसू काजे पुछु, “ठीक से, ती मारू सातेवावू कुन छे?”

येसू तिना नियोम शास्त्र जानने वावाक एक काहानी कोयू. “कि एक योहुदी माणूस होतु जू एक वाटे-वाटे यरूशलेम गोथू यरीहो गावमा जातु होतु,”

बाकीन वाटे तीनाकाजे गुंडा माणसे रुक्या एने तेरपोर हमलु कोर देदा. चे तेरे जुव जो काय होतो चू आखो हापकी लेदा एने तीनाकाजे मोर्ने तोक देदा. एने ओवतेन चे जात रोया.”

इना घोटनान लोगेच, एक योहुदी पुजारू तिने वाटे माईन जातु होतु, चू तिना माणूस काजे वाटीपोर पोळ रोयलू देख्यू, जेतार चू देख्यू ती चू चा दोखू टोवीन जात रोयू. चू तिना माणसो काजे नि देख्यू ओसू कोवाळयु.”

तेरे बादमा थुलिक वारमा, एक लेवी माणूस तीनेत वाटे गोथू जातु होतु (लेवी एक योहुदिन जात होती जे मंदिरमा पुजारान मदत कोरला होता) चू लेवी बी चा दोखू टोवीन जात रोयू. चू बी तिना माणूस काजे नि देख्यू ओसू कोवाळयु.”

एने तेरे बादमा एक ओवी माणूस आव्यू एने चू एक सामरी जातीन होतु. (सामरी एने योहुदी एकदिसरा पोर रीस कोरता होता) चू सामरी माणूस बी तिना माणसो काजे देख्यू. चू देख्यू कि यु माणूस ते योहुदी से, बाकीन तेबी चू तेर पोर घोणु मोंग देखाळयु. आखरी चू तेरे साते गोयू एने लागला पोर पोट्टी बांद्यू.”

“ओवतेन चू सामरी माणूस तिना माणसोकाजे गोदळा पोर मेक्यू एने तीना काजे एक डाक्टरोनचा लीन गोयू, जा चू तेरी देख रेख कोऱ्यू.”

दिसरे दाहळे, तिना सामरी माणूस काजे ओगो जाणो होतो. चू तिना डाक्टर काजे थुलाक पोयशा आप्यू कि चू तिना योहुदी माणूस काजे वारू कोरे. चू तीनाक कोयू, “इना मानसोन देखरेख कोरजी. ओगोर एर गोठा जादा खोरचू लागे ती कोय देजी मे पोछू आवीन चो आप दिस.”

ओवतेन येसु तिना नियोम शास्त्राक जानने वावाक पुछू, “ तू काय सोचे? इनू तीनु माईन कानलु माणूस तेरु सातेवावू होसे जिना देदला एने तेरे जुव होतु चो आखो हापकी लेदला?” चू जवाब आप्यू, “चू जू तेरे पोर मोंग कोऱ्यू.” येसु तीनाक कोयू, जा तूबी ओसुत कोर.”