28. मालदार जुवान पुढारी

एक दाहळे, एक मालदार जुवान पुढारी येसूनचा आव्यू एने तीनाक पुछ्ने बाज गोयू, “हे मोटला गुरु, ओमोरर्काइन जीवनोन कोरता मेसेक काय कोरनो जुवे?” येसू तीनाक कोयू, “तू मेसेक मोटला गुरु काहा कोये? निसटू एकुत मोटलु छे एने चू से परमेश्वर. बाकीन ओगोर तू ओमोरकाईन जीवोन लेणे चाहतलु ती देवोन नियोम शास्त्रान पालन कोर.”

चू पुछु कि, “मेसेक कानली कानली आग्यान पालन कोरनो पोळसे?” येसू जावाब आप्यू, “ हत्या नि कोरनो, व्यभिचार नि कोरनो, झूट नि कोयनो, आसी बासान आदर कोरनो, एने आपणा सातेवावासी आपने सारखा मोंग कोरु.”

बाकीन चू जुवान माणूस कोयू, मे ते नानला पासून इनू आखा आग्यान पालन कोरतू आव रोयू. मेसेक कायमोन कोरता जीवतेलु रोयनेन कोरता काय कोरनो पोळसे?” येसू तेर वोखे भाव्यु एने मोंग कोऱ्यू.”

येसु जोवाब आप्यू, “ओगोर पाकु होणे हिंडे ती जाईन तारजू जो काय से चो आखो वेच दे एने पोयशा गरीब काजे आप दे ती तुसेक सोरगोमा धोन जुळसे, तेतार तू मार पोछोव आव लाग.”

यो सोमवीन चू मालदार जुवान माणूस घोणु दुखी होय गोयू, काहाकी चू घोणु मालदार होतु एने चू तेरी आखी धोन संपती आपने नि चाहतू होतु. चू येसुनचा गोथू जात रोयू.

तेतार येसु तेरा चेला काजे कोयू कि, “ देवोन राजमा मालदार मानसोन जाणो जुदो काठो छे. हाव, एक मालदार मानुसोन देवोन राजमा जाणो एक उटळान, सुयीन नाकमा गोथो जाणो सोपो रोयसे.”

जो येसु कोयू चो सोमवीन चेला नेवलाय कोरणे बाज गोया. चे कोया, “ओगोर ओसो होय्से ती देव कुणीक वाचाळसे?”

येसु तेरा चेला वोखे भाव्यु एने कोयू, “माणसोन कोरता खुदोन कोरता छुटकारु कोरनो असंभव छे. बाकीन देवोन कोरता काय बी असंभव नि होय.”

पतरस येसुकाजे कोयू, “आमु आखो छुळीन तार पोछोव आवला छे, ती आमरो इनाम काय छे?”

येसु जवाब आप्यू, “होर एक जोन जे मार वोजहसी घोर, भाश, बास, आश, पुऱ्या एने आखो धोन काजे छुळला से, चू तिंदरेसी 100 गुना जादा हासील कोरसे एने ओमोरकाईन जीवन काजे बी ली लेसे. बाकीन घोणा सोवटा से जा पेहेला छे चे पोछ्ला होयसे, एने जे घोणा सोवटा से जे पोछ्ला से चे पेहला होयसे.