33. खेती कोरनेवावान काहानी

एक दाहळे, येसू नोदीन काठान साते होतु, चू माणसोन एक घोनी मोटी भिळ काजे शिक्षा आपतू होतु. तीनाक सोमोवनेन कोरता ओतरा सोवटा आव्या कि येसू काजे वात कोरनेन कोरता जागू नि वाच्यू. एरेन कोरता चू पाणीमा उबरोयली ढोंड्या पोर चोळ गोयू. चू चा बोठ गोयू, एने माणसोकाजे शिक्षा आप्यू.

येसू तीनुक यी काहानी सोमवाळ्यु, “एक खेती कोरणे वावु बीज वेरणे कोरीन निकव्यु. जेतार चू हाते कोरीन बीज वेरतू होतु ती थूलाक वाटीपोर पोळ्या, बाकीन चिल्ला आवीन चूट खाय गोया.”

थूलाक बीज चाफऱ्या वावी जागामा पोळ्या जा धुवू कोम होतु. तिना जागा मायला बीज छाटास उग गोया, बाकीन तिन्दारा मुवे जादा उंडे जाणे जागू नि होतु, ती जेतार दाहळू निकव्यू एने तोप्यू एने झाडे चीमाय गोया एने मोर गोया.

थुलाक बीज झळकामा पोळ्या. चा बीजे वोद्या बाकीन काटा तीनुक वोदने नि देदा. ती नि वोदनेन वोजहसी चे वारू फोव नि लाव सोक्या.

थुलाक बीज वारली जागे पोळ्या, चे मोटा होया एने जोतरा बीज वेरला तिंदरे गोथा 30, 60 एने या तोक कि 100 गुना फोव पाक्यो. जू कुदू परमेश्वर पोछोव चालने हिंडे, चू तिनी वात पोर ध्यान देये जो मे कोयने बाज रोयू.

जी काहानी चेला काजे भोंगलाळ देदी. एरेन कोरता येसू काहानीन फोळ कोऱ्यू, “चो बीज देवोन वचन छे. ची वाट एक ओसलू माणूस छे जू देवोन वचन सोमोवतलु छे. बाकून तीनाक सोमोजतला नि. तेतार भुतडू तेरे जीव गोटू चो वचन चूर लेतलू. मतलब भुतडू तिना वचन काजे सोमोजने सी नाम्बे राखतलू.

“ची दोगळाट्या वावी जागा ओसलू माणूस छे जू परमेश्वरन वचन काजे सोमवे एने खुशी-खुशी तीनाक मान लेतलू छे. बाकीन खातही टेम आवे एने दिसरा माणसे तीनाक विताळे ती चू परमेश्वर सी नांबे जात रोयलु छे. मतलब चू परमेश्वर पोर भूरसू कोरनो बोंद कोर देय.

चू काटा वावु जागू ओसलू माणूस छे जू परमेश्वरन वचन काजे सोमोवतलु छे. बाकीन चू लोके सोवटा वातोन बारामा चिंता कोरणे चालू कोर देय, एने चू घोणा सोवटा पोयशा कोमायने कोशीस कोरे, एने चू घोणा सोटा चीजो काजे हासील कोरणे कोरता कोशीस कोरे .थुलिक टेम बाद हिमी चू परमेश्वर काजे मोग करणे मा योग्य नि होय .एरेन करता जो चू परमेश्वर म वचन सिकलु होतु चू तीनाक देवो काजे खुश कारनेमा योग्य नि होय. चू गोहून चुखा सारखू छे चू फोव नि लावतलो.”

बाकीन वारलू जागू चू माणूस जू परमेश्वरोन वचन काजे सोमोवतला एने तीनापोर भूरसू कोरतला एने फोव लावतला छे.”