34. येसू दिसरी काहानीन शिक्षा आपे

येसू परमेश्वरो राज्यन बारामा दिसरा घोणा सोवटा काहान्या सोमवाळ्यु. उदाहरनोन कोरता, चू कोयू, “परमेश्वरोन राज्य एक राईन दाणा सारखो छे जीनाक कुदू तोरी तेरा खेतोमा वेर देदू. तुमु जानतला कि राईन दानू आखा दाणा माईन नानलु दानू रोयतलू.”

“बाकीन जेतार राईन दानू मोटू होय जाय ती चू आखा बगीचान झाडो गोथा आखान मोटू होय जातलू ओतरू मोटू कि चिला आवीन तेरा डाव्या पोर आराम कोरे.”

येसू एक ओवी दिसरी काहानी कोयू, “परमेश्वरोन राज्य खमिरोन सारखो छे जीनाक लीन एक बायोर पीठान टाहारामा भेसकी देय तेतार चो आखा टाहारामा पोसरी जाय.”

“ सोरगोन राज तिना खोजानान सारखो से जीनाक कुदू तोरी खेतोमा लीजाईन डूकाळ देदू. काहना दिसरा माणसो काजे चो खोजानो जूळ गोयो एने चू तीनाक हासील कोरणे कोरता घोनी मोर्जी कोऱ्यू. एरेन कोरता चू तीनाकाजे पोछू गाळ देदू. चू खूशी सी ओतरू भोराय गोयू कि चू जाईन तेरो आखो वेच देदू ताकि चू तिना खेतो काजे वेचातो ली लेये जा चो खोजानो होतो.”

“सोरगोन राज एक गोनी मोहंगीचुखला हिरा सारखो बी छे. जेतार कुदू हिरान व्यापारी तीनाक ली लेय ती चू तीनाक लेनेन कोरता तेरो आखो काहीन वेच देये.”

चा गोणा सोवटा माणसे होता जे सोचता होता कि परमेश्वर तीनुक इनान कोरता मान लेसे काहाकी चे वारला कोर रोया. ये माणसे ओसला माणसो काजे वीटरावा मानता होता जे वारलो काम नि कोरता होता. एरेन कोरता येसू तीनु काजे यी काहानी कोयू, “दुय माणसे होता एने दुयू बी प्रार्थना कोरनेन कोरता मंदिरमा गोया, तिंदरे माईन एक फावू लेणे वावु होतु, एने दिसरू एक धोरमी अगवू होतु.”

“चू धार्मी अगवू एना रीतीसी प्रार्थना कोऱ्यू कि, ‘हे परमेश्वर, तारो धोन्यवाद होये कि मे दिसरा माणसोन तोसु जोसा डाखू, दोया नि कोरणे वावु माणूस, व्यभिचारी एने या तोक कि या सारीक आवलु फावू लेणे वावा सारखू एक पापी नि होय.”

उदाहरनोन कोरता, मे होर हाप्ता उपास राखतलु एने मे मेसेक जूळने वावा पोयशा एने सामानोन दासवू भाग बी तुसेक आपतलु.”

“बाकीन चू फावू लेणे वावु तिना धोर्मी अगवासी नाम्बेत उबरोय गोयू. चू सोरोगो वोखे तेरा डूवा बी उचा नि कोऱ्यू. बाकीन चू तेरी मुठसी तेरी छाती काजे ठुक्यू एने प्रार्थना कोऱ्यू, ‘हे परमेश्वर, दोया कोरीन मार पोर गिन कोर काहाकी मे पापी.’”

ओवतेन येसू कोयू, “मे तुमु काजे छाचलीन कोयो, परमेश्वर तिना फावू लेणे वावान प्रार्थना काजे सोमव्यु एने तीनाक धोर्मी ठेराव्यू. बाकीन परमेश्वर तिना धोर्मी अगवान प्रार्थना पोसोन नि कोऱ्यू. परमेश्वर होर एक घोमोंडीन मुनको नेचो कोरसे, बाकीन चू होर एक काजे आदोर आपसे जो खुदो काजे नम्र कोरे.”