36. बोदेलनो

एक दाहळू, येसू तेरा तीन चेला काजे जे पतरस, याकुब एने योहान होता, तेरे साते लीन गोयू. (यु योहान नावोन माणूस नि होय जू येसू काजे बाप्तिस्मा आपलू होतु.) चे प्रार्थना कोरनेन कोरता उचात बोयळा पोर गोया.

जेतार येसू प्रार्थना कोरतू होतु ती तेरो मूय सूर्यान तोसो विजावो होय गोयो. तेरा डोगला विजावान तोसा धोवा होय गोया, जोसा कोवी पोर कुदू कोर सोके तर गोथा बी बोढीन धोव्वो.

तेतार मुसा एने एलिया भविष्य कोरता देखाय पोळ्या. ये माणसे इन धोरती इना टेमोसी सेकळो साल पेहेल रोया कोरता होता. चे येसू साते तेरी मोरने बारामा वात कोरता होता, काहाकी चू छाटूस यरूशलेममा मोर जान्यू छे.

जेतार मुसा एने एलिया येसू साते वात कोरता होता तेतार पतरस येसू काजे कोयू, “आमरेन कोरता न्या रोयनो वारू छे, आमु तीन मंडप बोनावजे, रक तार जुगु, एक मुसा जुगु एने एक एलिया जुगु.” बाकीन पतरस नि जानतू होतु कि ह्यु काय बुल रोयू.

जेतार पतरस वात कोरतू होतु, ती चमकदार वादवो नेचो आवीन तिंदरे पोर आव लाग्यो. ओवतेन चे वादवाम गोथो एक आवाज काजे सोमव्या. चू कोयू, “यु मारू पूऱ्यू छे जेरेसी मे मोंग कोरो. मे हेरोमा खुश छे हेरी सोमवु.” चे तीन चेला बिह गोया एने धोरती पोर लुट गोया.

तेतार येसू तीनुक छीम्यू एने कोयू, “बिहू मा, उठ जावू.” जेतार चे चारू धोळे देख्या, ती जो बी चा होतो चू येसू होतु .

येसू एने चे तीन चेला तिना बोयळा पोर गोथा उतरी गोया. तेतार येसू तीनुक कोयू, “हिमी जो न्या होयलो तेरी चर्चा कुदा काजे घोन कोयता. मे छाटूस मोर जाश एने जीवतु होय जाश. तेरे बाद तुमु कोय सोकतला.”