37. येसून लाजर काजे जीवाळनो.

लाजर नावोन एक माणूस होतु. तेरा दुय बोहनिशा होता जिंदरा नाव मरियम एने मार्था होता. चे आखा येसून दोस्त होता. एक दाहळे कुदू तोरी येसू काजे कोयो कि लाजर घोणु मान्दलु होतु. जेतार येसू यो सोमव्यू ती चू कोयू, “यी बिमारी लाजरोन मोरनेन साते यी बिमारी खोतोम नि होयी. बाकीन यी माणसो काजे परमेश्वरोन आदर कोरणे कोरता अगवाई कोरसे.”

येसू तेरा दोस्तसी मोंग कोरतू होतु. बाकीन जा चू होतु चा चू दुय दाहळा तोक वाट जुव्यू. तीनु दुय दाहळा बाद, येसू तेरा चेआ काजे कोयू, “आवू, पोछा यहुदीया जाता. चेला जवाब आप्या, “बाकीन हे गुरु, हिमी थुलिक टेमो पेहेल यहुदी तुसेक मार नाखने हिंडता होता.” येसू कोयू, “आपणु दोस्त लाजर सुव गोयलू छे, एने मेसेक तिना काजे उठाळ छे.”

येसून चेला जवाब आप्यू, “हे प्रभू, अगोर लाजर सुव रोयू, ती चू वारू होय जासे.” तेतार येसू तीनुक साफ कोय देदू, “लाजर मोर गोयलू छे. मे खुश छे कि मे चा नि होतु, ताकी तुमु मार पोर भूरसू कोर सोके.”

जेतार येसू लाजरन गावमा पुग्या ती लाजर काजे मोरला चार दाहळा होय गोयला होता. मार्था येसुक भेटनेन कोरता बारथे आवी एने कोई, “ हे प्रभू, ओगोर तू या रोयतू ती मारू भाश नि मोरतू. बाकीन मे भूरसू कोरो कि जो काय तू परमेश्वरसी मांगीस ती चू तुसेक आपसे.”

येसू जवाब आप्यू, “पुनरुथान एने जीवन मे छे. जू कुदू मार पोर भूरसू कोरे अगोर चू मोर बी जाय ती बी जीवसे. जू कुदू मार पोर भूरसू कोरे चू कोबी नि मोरे. काय तू एरेपोर भूरसू कोरे?” मार्था जवाब आपी, “हे प्रभू, मे भूरसू कोरो कि तू परमेश्वरोन पुऱ्यू मसिह छे.”

तेतार मरियम आवी. ची येसून पायो पोर पोळीन कोई, “हे प्रभू, ओगोर तू न्या रोयतू ती मारू भाश नि मोरतू.” येसू तीनुक पुछू, “तुमु लाजर काजे का मेक रोया?” चे तीनाक कोया, “मोळवाट्यामा, आव एने देख ले.” तेतार येसू रोळने बाज गोयू.

चो मोळवाट्यो एक गुफा होती, जेरे झोपला पोर एक दोगळा काजे ढोबवाव्या. जेतार येसू मोळवाट्यापोर पुग्यू ती चू तीनुक कोयू, “दोगळाक ओथा कोरु, तिना मोरलू चार दाहळा होय गोयला होता एने चो गोंदायतो होसे.”

येसू जवाब आप्यू, “काय मे तुमुक नि कोयु कि ओगोर तुमु मार पोर भूरसू कोरसू ती परमेश्वरोन ताकत काजे देखसे?” एरेन कोरता चे दोगळा काजे छेटा कोर देदा.

तेतार येसू उपर सोरगो वोखे देखीन कोयू, “हे बास, मारी सोमवनेन कोरता धन्यावाद कोरो. मे जाणो कि तू मारी हमेशा सोमवे बाकीन मे या उबरोयला अखं मानसोन मदत कोरनेन कोरता कोयू ताकी ये भूरसू कोरे कि तू मेसेक मूकललु छे.” तेतार येसू आयळ्यु, हे लाजर, बारथे निकोव.”

अखरी लाजर बारथे निकविन आव लाग्यू. चू हिमी बी छिंदरामा गुंडवायलु होतु. इना कापळाक निकावे कोरीन मदत कोरु. एने तीनाक आजाद कोरु.” इना चमत्कारोन वजहसी घोणा सोवटा योहुदी माणसे येसू पोर भूरसू कोऱ्या.

बाकीन योहुदिन धोरमी अगवा येसूसी रीस कोरणे बाज गोया, एरेन कोरता चे योजना बोनावनेन कोरता एकठा होया कि कोसा येसू काजे एने लाजर काजे मार देजे.