38. येसू काजे धोरावनो

हर साल, यहुदी माणसे वलांडनोन तिहीवार मनावता होता. यो एरे बारामा एक तिहीवार होतु कि घोणा साल पेहेल परमेश्वर तिंदरा डाह डाहा काजे मिस्रीन गुलामीमा गोथू छुळावलु होतु. लगभग तीन साल बाद येसू आखा काजे प्रचार कोरनो एने शिक्षा आपनो चालू कोऱ्यू. येसू तेरा चेला काजे कोयू कि चू तिंदरे साते यरूशलेममा वलांडनोन तिहीवार काजे मानने चाहतू होतु, एने यो बी कि तिना चा मार देसे.

येसून चेला माईन एक योहुदा नावोन एक माणूस होतु. योहुदा प्रेरीतोन पोयशान थोयली राखनेन होतु, बाकीन हमेशा चू तिनी थोयली मा गोथू पोयशा निकाव लेतू होतु. येसू एने चेलान येरुशलेममा पुगणेन बादमा योहुदा योहुदी अगवानचा गोयु. चू पोयशान बोदले मे येसू काजे धोरावने प्रस्ताव मेक्यू. तीनाक मालोम होतो कि योहुदी अगवा स्वीकार नि कोरता होता कि येसू मसिह छे. चू जानतू होतु कि चे तीनाक मारणे हिंडता होता.

मोटला पुजारान कोयनने पोर योहुदी अगवा येसू काजे धोरावने कोरता योहुदा काजे तीस चांदीन सिक्का आप्या. यो इना रीतीसी होयो जोसो कि भविष्य कोरता कोयला होता कि होयसे. योहुदा मान गोयू एने पोयशा लीन जात रोयू. चू येसू काजे धोरनेमा तिंदरी मदत कोरनेन कोरता एक टेम हेरेने बाज गोयू.

यरुशलेममा, येसू चेला साते वलांडनोन तिहीवार मोनाव्या. वलांडनोन खानो खानेन टेमे, येसू रुटू लीन तूळ्यु. चू कोयू, “इनाक लेवू एने खावू. यो मारो डील छे जो तुमरेण कोरता आपो. इनाक मारा फोममा राखजू.” इना रीतीसी, येसू कोयू कि चू तेरेन कोरता मोर जासे. मतलब तिंदरेन कोरता चू तेरा डीलो काजे बली चोळाव देसे.

ओवतेन येसू एक आंगुरोन रोस गिलासमा लेदू एने कोयू, “इनाक पी लेवू. यो नोवला वायदान मारो लुय छे जो कि मे आपीस टाकी परमेश्वर तुमरा पापो काजे माफ कोरे. होर कावा इनाक पिनेन टेमे मारी फोम कोरनेन कोरता इनाक कोऱ्या कोरजू.”

तेतार येसू तेरा चेला काजे कोयू, “तुमरे माईन एक जन मेसेक धोरावसे.” चेला वाहराय गोया एने पुछने बाज गोया कि कुन ओसलो काम कोरसे. येसू कोयू, “मेसेक धोरव्ने वावु माणूस चू से जीनाक मे रुटान भुकरू आपो.” तेतार चू योहुदा काजे रुटू आप्यू.

तिना रुटा काजे लेनेन बादमा योहुदामा भुतडू भोराय गोयू. योहुदा निकविन येसू काजे धोरावने कोरीन योहुदी अगवान मदत कोरनेन कोरीन जात रोयू, यो रातीन टेम होतु.

खानो खानेन बादमा येसू एने तेरा चेला जेतून बोयळा पोर जात रोया. येसू कोयू, “तुमु आखा आज राती मेसेक छुळ देसे. यो लीखलो छे, ‘मे गुवाव्याक मारिस एने आखा गाडरा वेरा-वेर होय जासे.”

पतरस जवाब आप्यू, “भोले दिसरा तुसेक छुळ देसे बाकीन मे तुसेक कोबी नि छुळो.” तेतार येसू पतरस काजे कोयू, “भुतडू तुमु आखाक ली जाणे हिंडे बाकीन हे पतरस मे तार जुगु प्रार्थना कोरलू छे कि तू भूरसासी चूक नि जाय तेबी, आजून रात, कुकळू वासनेन पेहेल तू मेसेक तीन कावा इंकार कोरिस कि तू मेसेक नि जानतलु.”

तेतार पतरस येसू काजे कोयू, “भोले मे मोर जाश, बाकीन मे कोबी बी तारू इंकार नि कोरो.” दिसरा आखा चेला बी योत कोया.

तेतार येसू तेरा चेला साते गतसमनी नावोन एक जागापोर गोया. येसू तेरा चेला काजे प्रार्थना कोरनेन कोरीन कोय देदू, टाकी भुतडू तिंदरी परीक्षा नि लेये. तेतार येसू खुद प्रार्थना कोरणे जात रोयू.

येसू तीन कावा प्रार्थाना कोऱ्यू, “हे मारा बास, ओगोर होय सोके ती दोया कोरीन यो दुखोन प्यालू पिनेन कोरता मेसेक मा आपे. बाकीन ओगोर मानसोन पाप माफ कोरणे कोरता दिसरी वाट नि होसे ती तारी मोर्जी पुरी होये.” येसू घोणु उदास होतु एने तेरो घाम लुयोन टिपका सारको होतो. तीनाक ताकत आपनेन कोरता परमेश्वर एक सोरगो दूत काजे मुकल्यू.

होर कावा प्रार्थानान बादमा, येसू तेरा चेलानचा पोछू आव्यू, बाकीन चे सुव गोयला होता. जेतार येसू तिसरी कावा पोछू आव्यू ती येसू कोयू, “जाग जावू, मेसेक धोरावने वावु आव लाग्यू.”

योहुदी अगवा, सिपायळा एने एक मोटली भिळ साते योहुदा आव्यू. चे तलवारे एने डेंगा ली रोया होता. योहुदा येसूनचा आवीन तीनाक कोयू, “हे गुरु नमस्कार,” एने तेरे गुवू देदू. चू येसू काजे योहुदी अगवा काजे देखाळनेन कोरता ओसू कोरलू होतु. तेतार येसू कोयू, “हे योहुदा, काय तू एक गुवासी मेसेक धोरावने बाज रोयू?”

जेतार सिपायळा येसू काजे धोरता होता, ती पतरस तेरी तलवार निकाव्यू एने माहायाजकोन एक सेवकोन कानटो काट देदू. येसू कोयू, “तलवार काजे छेटू कोर, मे मारा बास सी मारा बचाओं कोरता सोरगो दुतोन एक सेना कोरता विनता कोर सोकतलु. बाकीन मेसेक मारा बासोन वात माननो छे.”तेतार येसू तिना मानसोन कानटो वार कोर देदू. तेतार आखा चेला ढास गोया.