40. येसू काजे ख्रूस पोर चोळावनो

येसून मजाक उळावनेन बादमा, सिपायळा तिना काजे ख्रूस पोर चोळावनेन कोरता लीन गोया. चे येसू काजे ख्रूस काजे हाकलाळ्या जेरेपोर चू मोरसे.

चे सिपायळा येसू काजे तिना जागापोर लाव्या जो “खोपळी” कोवायतली छे एने तेरा हात एने पायो काजे ख्रूस पोर ठूक देदा. बाकीन येसू कोयू कि, “हे बास, इनू काजे माफ कर, काहाकी ये नि जाणता कि ये काय कोर रोया.” चे एक पाटी तेरा मुनका उपोर टांग देदा. तेरेपोर लिखलो होतो कि, “योहुदिन राजा.” पिलातूस तीनुकाजे योत लिखने कोरीन कोयलू.

तेतार सिपायळा येसून छिंदरान कोरता चिठ्या नाख्या. जेतार चे ओसा कोऱ्या ती चे तिनी भविष्य वाणी काजे पुरा कोऱ्या जो कोयती होती, “चे मारा छिंदरा काजे वाट लेदा एने मारा छिंदरान कोरता चिठ्या नाख्या.”

चा सारीक दुय चूटा बी होता, जीनुकाजे सिपायळा तीनेत टेमे ख्रुसपोर चोळावला होता. चे तीनुकाजे येसून दुयू धोळे मेक्या. तिंदरे माईन एक चुटू येसून मजाक उळाव्यू, बाकीन दुसरू कोयू, “काय तू नि बिहतू कि परमेश्वर तुसेक दोंड आपसे? आपणु घोणा सोवटा भून्डला काम कोरनेन गुणावा छे, बाकीन यु माणूस निरदोष छे.” ओवतेन चू येसू काजे कोयू, “जेतार तू तारा राजमा आविस ती विनता कोरो कि मारी फोम राखजी. येसू जवाब आप्यू आजूत तू मार साते सोरगोलोकमा रोयीस.”

योहुदी अगवा एने भिळ मायला माणसे येसून माजक उळाव्या. चे तीनाक कोया, “अगर तू परमेश्वरोन पुऱ्यू छे, ती ख्रूस पोर घोथू उतरी जा एने खुदो काजे वाचाळले. तेतार आमु तारपोर भूरसू कोरसू.”

तेतार आखा देसोन वादवो कावो होय गोयो, भोले चू टेम दिसून टेम होतु. यो दिसून टेमे कावो होयो एने तीन घोनटा तोक ओसोत रोयो.

तेतार येसू आयळीन कोयू, “पुरो होयो, हे बास, मे मारी आत्मा तारा हातोमा सोपो.” तेतार चू तेरा मुनका नेळो कोऱ्यू एने तेरा जीव काजे छुळ देदू. जेतार चू ओर्यू ती एक भूकंप होयो. चो मोटलो पोरदू जो परमेश्वर के उपस्तीतीसी मानसो काजे अलग कोरता होतू, उपर गोथू चू नेचो तक ओवी फाटीन दुय भाग होय गोयो.

तेरी मोतोन लारे, येसू माणसोन कोरता परमेश्वरनचा आवनेन वाट उगाळ देदू. जेतार येसून राखवावी कोरणे वावा एक सिपायळू जो काय होयलो होतो चो आखो देख्यू ती चू कोयू, “छाचलीन यु माणूस निरदोष होतु. यु परमेश्वरोन पुऱ्यू छे.”

तेतार युसुफ एने निकुदेमुस नावोन दुय योहुदी अगवा आव्या. चे भूरसू कोरता होता कि येसू मसिह होतु. चे पिलातूस जुव येसून धोळ काजे मांग्या. चे तेरा धोळ काजे कापळामा गुंडाव्या. तेतार चे तीनाक एक दोगळान बोनावली एक मोळवाट्यामा लीन गोया एने तेरे माही मेक देदा. तेतार चे तिना मोळवाट्यान झोपलू बोंद कोरनेन कोरता एक मोटला दोगळा काजे ढोबवाव देदा.