41. परमेश्वर येसू काजे मोरलाम गोथू जीवाळे

सिपायळान लारे येसू काजे ख्रूस पोर चोळावनेन बादमा, योहुदी अगवा पिलातूस काजे कोया कि, “होयू झुटू येसू कोयलू होतु कि होयू तीन दाहळामा मोरलाम गोथू जीवतु होय जासे. कुदा काजे यो छाच्लीन छे कि नि होय तोपास लागाळनेन कोरता मोळवाट्यान राखवावी कोरनो पोळसे कि तेरो डील कुदू चुरीन नि लीजाय सोके. अगर चे ओसा कोरे ती चे कोयसे कि चू मोरलाम गोथू जीवतु होय गोयू.”

पिलातूस कोयू, “थुलाक सिपायळाक लीन जावू, एने जोसा तुमु कोर सोकतला तोसा मोळवाट्यान राखावावी कोरु.” एरेन कोरता चे तिना मोळवाट्यान झोपलान दोगळा पोर एक सिक्कू लागाळ देदा. चे यो छाचलीन मालूम कोरनेन कोरता चा सिपायळा काजे बोठाळ देदा कि कुदू तेरा डील काजे चुरी नि सोके.

येसून मोरनेन बाद मायलू दाहळू शब्बातोन दाहळू होतु. कुदूबी शब्बातोन दाहळे काम नि कोर सकतो होतो, एरेन कोरता येसून काहनुत दोस्त मोळवात्यापोर नि आव्यू. बाकीन शब्बातोन दिसरे दाहळे सोन्दारे वेगात थुलाक बायरा येसून मोळवाट्या पोर जाणे तीयार होय गोया. चे तेरा डील पोर ओवी बी मसालु लागाडने चाहता होता.

तीनु बायराण पुगनेन पेहेल, मोळवाट्या पोर एक मोटलु भूकंप होयो. सोरगोम गोथू एक सोरग दूत आविन तिना दोगळाक ढोबवाव देदू जो मोळवाट्यान झोपला काजे ढाकलो होतो एने तेरे पोर बोठ गोयू. यु सोरग दूत विजावान तोसु चोमकतू होतु. मोळवाट्यापोर जे सिपायळा होता चे तीनाक देख्या. चे ओतरा बिह गोया कि मोरलान तोसा भीमा पोळ गोया.

जेतार चे बायरा मोळवाट्या पोर पुग्या ती चू सोरग दूत तीनुक कोयू, “बिहू मा. येसू न्या नि होय. चू मोरलाम गोयू जीव उठलू छे. जोसो कि चू कोयलू होतु कि चू जीव जासे. मोळवाट्यामा हेरु एने देखू.” चे बायरा मोळवाट्यामा गोया एने जा येसून धोळ मेक्लो होतो चा हेर कोऱ्या एने देख्या कि हेरो डील न्या नि होय.

तेतार सोरग दूत बायरा काजे कोयू, “जाईन तेरा चेला काजे कोयू, ‘येसू मोरलाम गोथू जीवतू होय गोयलू छे एने चू तुमरे ओगोव ओगोव गलील काजे जासे.’”

चा बायरा वाहराय होया एने घोणा खुश होय गोया. चे चेला काजे वारली खोबर सोमवाळने कोरीन दौवळीन गोया.

जेतार चे बायरा चेला काजे यो वारली खोबोर सोमवाळनेन कोरता वाटेत होता, ती येसू तिंदरे ओगोव देखाय पोड्यू. चे तेरे पोयो पोर पोळ गोया. तेतार येसू कोयू, “बिहू मा, जाईन मारा चेला काजे गलील जाणे कोरीन कोयू. चे मेसेक चा देखसे.”