17. दाउदा कने परमेसवरा री वाचा

शाऊल इसराइला रा पैला राजा था। से लम्‍बा ओर सुणा था, जेडा से चा थे तेडाई। इसराइला पर राज करने ते पैले से ईक अच्‍छा आदमी था। पर बादा ते से ईक बुरा आदमी बनीगा तिने परमेसवरा री बात नी मानी, ईते खतर परमेसवरा ने ईक दुजा आदमी देखया जो तिस री जगह राजा बनो।

परमेसवरा ने दाऊद नामा रा ईक इसरायली आदमी देखया ओर तिसो शाऊला री जगह राजा बनाने जो तैयार करने लगया दाऊद बैतलहम नगराच ईक चरवाह था। कई बार, दाऊदा ने सैर ओर पालुआ जो मारया था ईते खतर की तिस रे पिता रिया पेडा पर तिनै हमला कितया था। दाऊद ईक अच्‍छा ओर ईमानदार आदमी था। तिने परमेसवरा पर परोसा कितया ओर तिसरी बात मानी

दाऊद जब जवान हुआ, तिने हटटा कटटा आदमी गोलियता कने लडाई लडी। गोलियत ईक अच्छा सैनिक बहुत ताकतवर ओर तिन मीटर लम्‍बा था। परमेसवरा ने गोलियता जो मारने ओर इसराइला जो बचाने खतर दाऊद री मदद किती। इते बाद, दाऊदा ने इसराइली रे दुशमना जो कई बार हराया। दाऊद ईक बडा सैनिक बणी गा था, तिने बहुत सारी लडाईया लडी। ओर लोका ने तिसरा मान बडाया।

दाऊदा कने लोका ने इतना प्‍यार किता कि शाऊल तिस कने जलने लगया। ओर शाऊला ने तिसो मारनै री सोची, दाऊद शाऊल ओर तिस रे सैनिका ते बचने खतर जगंला च चलीगा। ईक दिन, जब शाऊल ओर तिसरे सैनिक दाऊदा जो टोलने लगीरे थे तब शाऊल ईक गुफा च गया। दाऊद तिते चि लुखीरा था,पर शाऊला नै तिसो नी देखया। दाऊद तिसरे पिछे बहुत नेडे चलीगा ओर तिसरे कपडे रा ईक टुकडा कटीला। जब, शाऊल तिस गुफा ते निकलया तब दाऊदा ने तिसो अवाज मारी ओर से कपडे रा टुकडा तिसो दखाया। तब, शाऊल समजी गा बई दाऊदा ने राजा बनने खतर तिसो मारना नी चादा था।

कुछ समय बाद, शाऊल युदा च मरी गा, ओर दाऊद इसराइला रा राजा बनी गया। से ईक अच्‍छा राजा था, ओर लोक भी तिसो प्‍यार करा थे। परमेसवरा ने दाऊदा पर किरपा किती ओर तिसो कामयाब किता। दाऊदा ने कई लडाईया लडी, ओर परमेसवरा ने इसराइला रे दुसमना जो हराने च तिना री मदद किती। दाऊदा ने यरुशलेम नगरा जो जीती के अपनी राजधानी बणाया, जिते से रेया ओर शासन किता। दाऊद चाली साला तक राजा रेया इस समय तक इसरायल ताकतवर ओर धनवान बनीगे।

दाऊद ईक मन्दर बनाना चा था जिथी सारे लोक परमेसवरा रा गुनगान कर सके ओर बली कर सके। तकरीबन 400 साला ते, से लोक मुसा रे बनाई रे मिलाप वाले तमबुंआ च परमेसवरा री अराधना ओर बलि करा थे ।

पर तिथी नातान नामा रा ईक भविष्यवक्ता था। परमेसवरा ने तिसो दाऊदा गे पेजया, बई ते बहुत सारी लडाईया लडीरी, ईते खतर ऐ मनदंर तु नी तेरा बेटा बनागा। तब बी, अऊ ता पर बहुत सारी किरपा करगा। तेरा ईक कुला रा आदमी सदा मेरे लोका पर राज करगा। सदा खतर राज करने वाला दाऊदा रा वशंज मसीह था। मसीह परमेसवर रा चुनीरा जन था जो सारे ससांरा जो तिना रे पापा ते बचागा।

दाऊदा ने जब नातान रा सन्देस सुणाया तब तिने परमेसवरा रे हाथ जोडे ओर प्राथना किती। परमेसवर तिस रा काम बडाने लगीरा था ओर तिस पर बहुत किरपा करा था। जब कि, दाऊदा जो पता नी था बइ परमेसवर ऐ काम कदी करगा। इस समय असे जाणाए बइ इसराइला जो बहुत समय तक, तकरीबन 1,000 साला तक मसीह रे आणे रा ईन्‍तजार करना पङना।

दाऊद ने बहुत साला तक ईमानदारी कने अपने लोका पर राज कितया। तिने बहुत दिला ते परमेसवरा री बात मानी ओर परमेसवरा ने तिस पर किरपा किती। जब कि तिने, अपने जिवना रे आखिरा च परमेसवरा रे खिलाफ बडा पाप किता।

इक दिन दाऊदा ने अपने महला ते बारा जो देखया तिथी ईक सुणी ओरत नाणे लगीरी थी। से तिसा जो नी जाणदा था,पर तिने तिसा रे बारे च पता किता तिसा रा नाम बतशेबा था।

अपनी नजरा फेर लेणे री वजय तिने तिसा जो अपुगे बुलाणे जो कोइ पेजया। से तिसा कने रेया ओर बादाच तिसाओ करे पेजीता। कुछ समय बाद बतशेबा ने दाऊद जो ईक सदेंश पेजया बई से पेटा तेइ ।

बतशेबा रा घराला ऊरिय्‍याह था। से दाऊदा रा ईक अच्‍छा सैनिक था। इस समय से लडाई करने खतर गईरा था। दाऊदा ने तिसो बुलाया ओर अपनी घरवालीया कने रेणे जो बोलया। पर सारे सैनिक लडाईया च थे इते खतर तिने घरा जाणे जो ना करीती। तब दाऊदा ने तिसो वापस लडाईया च पेजीता ओर सेनापतीया जो बोलया बी इसो एडी जगह रखना जिथी दुसमन सबी ते ज्यादा हो ओर ऐ मर जाओ। ओर तब ऊरियाह तिस लडाईया च मरी गा।

ऊरिय्‍याह रे लडाईया च मरी जाणेते बाद दाऊद ने बतशेमा कने ब्या करीला। तिते बाद, तिसा रे दाऊदा रा बेटा हुआ। दाऊदा ने जो कितया तिते ते परमेसवर बहुत नराज हुआ, तब परमेसवरा ने तिस गे नातान जो दाऊदा गे पेजया बी तेरा पाप बहुत बुरा। तब दाऊदा ने अपने पापा खतर माफी मागीं तब परमेसवरा ने तिस जो माफ करीता। अब अपने बाकीया रा जीवन, तिने परमेसवरा री बात मानी ओर तिसरे पिछे चलया।

दाऊदा रा बेटा मरीगा। ईया परमेसवरा ने दाऊदा जो सिख दिती। तब, दाऊदा रे मरने तक, तिसरै लोका ने तिसरे खिलाफ लडाई किती, अब दाऊद कमजोर हुई गया था। पर परमेसवरा ने तिसरा साथ दितया तिनै अपना वादा निभाया, जब की दाऊदा ने परमेसवरा रे खिलाफ काम कितया था। तिते बाद, दाऊद ओर बतशेमा रे दुजा बेटा हुआ तिने तिसरा नाम सुलेमान रखया।