20. इसराईला रा गुलाम बणाई के लेई जाणा ओर वापस आऊणा

इसरायल ओर यहुदा रे राजया च सबी ने परमेसवरा रे खिलाफ पाप किता। तिने तिसा वादे जो तोडीता जो परमेसवरा ने तिना कने सीने परवता पर किता था। परमेसवरा ने तिना जो पाप ना करने ओर दुबारा परमेसवरा पर विसवास करने खतर तिनागे अपना भविशयवक्‍ता पेजया, पर तिना लोका ने तिना री बात मानने जो ना करीती।

परमेसवरा ने तब तिना जो सबक सखाने खतर तिना रे दुसमना जो पेजया। अश्‍शूर जो दुजा राज्‍या था ओर बहुत शीक्‍ति शाली था। से दुजे राज्‍य खतर बहुत बुरे थे। तिने इसरायला जो खतम करीता। अशूरियो ने तिना रे बहुत लोक मारीते,ओर लुटिला,ओर तिना रे कई गावां जो फुकीता

अशुरीया ने तिना रे सारे बडे परदाना, जो पैसे वाले थे कारीगर थे तिना सबी जो कटठा करी के अपणे देसा जो लेइगे। इसराईला च अब थोडे जे गरीब लोक थे।

अशुरी लोका ने इसराईला च रेणे खतर बारले लोका जो लयाए। तिना लोका ने दुबारा तिस नगरा जो बनाया। जो थोडे इसरायली तिथी बचे थे तिने तिना कने ब्या किता। इना लोका रे कुला रा नाम सामरी पडया।

यहुदा राज्‍य रे लोका ने देखया की परमेसवरा री बात ना मनने ओर तिस पर बिसवास ना करने पर इसरायला जो किया दडं दितया। पर तिते बाद बी तिने कनानीया रे देवता री मुरतीया री पुजा किती। परमेसवरा ने तिना जो दुबारा समजाणे खतर भविश्‍यवकता पेजे, पर तिने बात सुनने ते ना करीती।

तकरीबन 100 साला बाद अश्‍शुरियो ने इसराईला जो खतम करीता। परमेसवरा ने बेबीलोना रे राजा, नबुकदनेसर जो यहुदा पर अमला करने खतर पेजया। बेबीलोन इक बलवान राज्‍य था। यहुदा रा राजा नबुकदनेसरा गुलाम बनने खतर ओर तिसो हर साल लगान देने जो तैयार हुई गया।

पर कुछ साला बाद, यहुदा रे राजा ने बेबीलोना रे खतर लडने री सोची। तब तिने वापस आई के यहुदा रे राजय पर चडाई करीती। तिने यरुशलेमा पर अपना हक जमाईला, ओर मंदिरा जो तोडीता, ओर सारे सहर मंदिरा रा खजाना लुटीला।

बगाबत करणे रे खतर यहुदा रे राजा जो दडं देने जो, नबूकदनेसरा रे सैनिका ने राजा रे बेटे जो तिस रे सामने मारीता ओर अंधा करीता। ईते बाद, से राजा जो बेबीलोना री जेलाच मरने जो लेई गे।

नबूकदनेसर ओर तिसरी सेना यहुदा रे सारे लोका जो बेबीलोन लेइ गी, कुछ गरीब लोका जो छडी के ईते खतर बई से बागटिया च नाज ऊगाओ। इस समय जो बधुंआई बोलया गया से वादे रा देस जो परमेसवरा ने लोका जो रेणे खतर दितया था।

ने अपने लोका जो गुलाम बनाई के तिना जो पाप करनेरा दडं दितया, तब बी अपने भविशय वक्‍ता जो पेजीके तिना रा खयाल रखया। तिने वादा किता बई से सतर साला बाद, अपने देसा च दुबारा परमेसवरा वापिस आवणे।

साला बाद, फारसा रे राजा कुसतरु ने बेबीलोना जो हराया, ईते खतर फारसा रे राज्‍य ने कई देसा पर राज कितया। इसरायली लोका जो अब यहुदी बोला थे। तिना मे ते कई लोका ने अपनी सारी सतर जिनदगी बेबीलोना च बताईती। कुछ बुडे लोका जो ई अब यहुदा रा देस याद था।

फारसी लोक बहुत शकिती शाली थे,तिने अपने गुलामा पर दया किती। फारसी लोका रा राजा बनने ते कुछ समय बाद, कुरीसिआ ने बोलया बई जो कोइ यहुदी अपने देसा जो जाणा चा, से फारसा ते अपने देसजाई सका। तिने यहुदीया जो मनंदर बनाने जो पैसा बी दितया। अब सतर साला बाद, तब यहुदिया रे कुछ लोक यरुसलेमा जो आईगे।

जब से लोक यरुशलेमा च आए तब तिने मंदिर ओर नगरा री चारो तरफा री दवाल बणाई। फारसी लोक अबु बी तिना पर राज करा थे पर अब से वादे रे देसा च थे ओर मंदिरा च अराधना करा थे।