41. परमेसवर यीसुआ जो मरीरे मे ते जिंदा करा

सैनिका रे यीसुआ जो कुरुसा पर चडाने ते बाद, यहुदी परदान ने पिलातुसा जो बोलया, “तिस चुठे यीसुआ ने बोलया था बई से तीन दिना बाद मरीरे मे ते जीऊदा हुई जाणा। किसी जो ऐ देखणे खतर कबरा री चोकीदारी करनी पडनी बई तिसरे चेले तिसरे सरीरा जो ना चोरी लो। जे तिने ऐडा कितया तो तिने बोलना बई से मरीरे मे ते जीऊदा हुई गया।”

पिलातुसा ने बोलया, “कुछ सैनिका जो लेई के, कबरा पर नजर रखो।” ईते खतर तिने कबरा रे दरवाजे पर ईक मोर लगाईती। ओर सैनिका जो तिथी बठाईता बि कोई तिसरे सरीरा जो चोरी ना करी लो।

यीसुआ रे मरने ते दुजा दिन सब्‍त रा दिन था। कोई बी तिस दिन काम नी करी सकदा था, ईते खतर यीसुआ रा कोई बी दोसत कबरा पर नी आया। पर दुजे दिन, सबेरे, कुछ ओरता यीसुआ रे कबरा पर जाने लगी। से तिसरे सरीरा पर ओर मसाले लगाणा चा थी।

तिनै ओरता रे पहुचणे ते पेले, कबरा पर ईक बहुत बडा तुफान आया। सवर्गा ते ईक दुता ने तिस पतथरा जो कनारे करीता जो कबरा रे दरवाजे पर लगीरा था ओर तिते पर बेठीगा। सचर्गदुत तेज रोसनी साई चमकने लगीरा था। कबरा पर जो सैनिक थे तिने तिसो देखया। से डरीगे ओर बेहोस हुईगे।

जब से ओरता कबरा पर पहुचीया तब तिने सवर्ग दुता ने तिना जो बोलया, “मत डरो। यीसु ईथी नीआ। से मरीरे मे ते जीऊदा हुई गया, जैडा तीने बोलया था से हुई गा! कबरा च देखो।” तिना ओरता ने अन्दर जाई के देखया जिथी यीसुआ रा सरीर रखीरा था से तिथी नी था!

तब तिस सवर्ग दुता ने तिना ओरता जो बोलया, “जाकर तिसरे चेलेया जो बताओ, ‘यीसु मरीरे मे ते जीऊदा हुई गया ओर से तुसा रे आगे आगे गलीला जो जाणा।’”

से ओरता हैरान हुई गी ओर बहुत खुस हुई। से चेलेया जो ऐ खुसखबरी सुनाने जो दोडी गीया।

जब से ओरता चेलेया जो ऐ खुसखबरी सुणाने खतर रसते च थी, तब यीसु तिना सामने आया। से तिसरे पैरा पर पडी गीया। तब यीसुआ ने बोलया, “डरो मत। मेरे चेलयाजो गलील जाने जो बोलो। से तिथी मिजो देखगे।”