42. यीसु रा सवर्गा जो वापस चलणा

जिस दिन परमेसवरा ने यीसुआ जो मरीरे मे ते जिन्दा कितया, तिसरे दो चेले नजदिका रे गावां च जाणे लगीरे थे। जानदे हुऐ से जो यीसुआ कने हुआ। तिते रे बारे च बात करने लगीरे थे, तिना जो यकीन था बई से मसीह था, पर तब बी से मारीता। ओर से ओरता बोलाई बई से दुबारा जिन्दा हुई गा। से नी जाणदे थे बई किसा बाता पर परोसा करीए।

यीसुआ ने तिनै गे आई के तिना कने चलणा सुरु करीता, पर से तिसो पछाणी नी सके। तिने पुछया बई से किस बारे च बात करने लगीरे। तिने तिसो यीसुआ कने जो हुआ से सारी बात बताई। तिने सोचया बई ऐ परदेसी आ जिसो नी पता बई यरुलेसमा च क्या हुआ।

तब यीसुआ ने तिना जो बोलया परमेसवरा रा वचन मसीहा रे बारे च क्या बोला। बोत पेले, भविश्यवक्ता ने बोलया था बई बुरे लोक मसीह जो दुखी करगे ओर तिसो मारी देगे। भविश्यवक्ता ने ऐ बी बोलया था बई से तीजे दिन जीऊदा हुई जाणा।

जब से तिस नगरा च पहुचे जिथी तिने रुकणा था, तब रात हुई गी थी। तिने यीसुआ जो अपु कने रुकने जो बोलया, तब से तिना कने ईक करा च गया। राती रे खाने खतर से बैठीगे। यीसु आ ने ईक रोटीया जो लेई के परमेसवरा रा सुकरीया कितया, ओर तब तिते जो तोडया। ईक दम, तिना जो पता लगया बई ऐ यीसुआ। तिसी समय, से तिना गे ते गायब हुईगा।

तिना दो आदमीया ने ईक दुजे जो बोलया, “ऐ यीसु था! ईते खतर जब तिने असा जो परमेसवरा रा वचन सुणाया तो असे बोत खुस थे!” तिसी समय, से वापिस यरुलेसमा जो चलीगे। जब से पहुचे तब तिने चेलेया जो बोलया, “यीसु जिन्दां! असे तिसो देखया!”

जब चेले बात करने लगीरे थे, यीसु ईक दम तिना सामने आईगा। तिने बोलया, “तुसा जो शान्‍ती मिलो! चेलेया ने सोचया बई से कोई पुता, पर यीसुआ ने बोलया, तुसे कीऊ डराए? तुसे क्‍यु नी सोचदे बई अऊ यीसुआ? मेरे हाथ ओर पैरा जो देखो।” पुता गे ऐडा सरीर नि हुदा जैडा मगेंआ। ऐ बताणे खतर बई से कोई पुत नीआ, तिने खाणे जो मंगया। तिने तिस जो मछली रा ईक टुकडा दितया, ओर तिने से खाईला।

यीसुआ ने बोलया, “मेरे बारे च परमेसवर जो कुछ बोला से हुई जाणा। मै तुसा जो बताईता था बई ईते रा हुणा जरुरी आ।” तब यीसुआ ने तिना जो परमेसवरा रा वचन सुले समजाया। तिने बोलया, “बोत पेले यहुदी पूजारी ने लिखया था बई मिजो, मसीह जो दुख पोगना पडना, मरना हुगा ओर तिजे दिन मरे हुए ते जीन्दा हुणे पडना।”

“तिना भविश्यवकता ने लिखया बई मेरे चेले परमेसवरा रे वचना रा परचार करगे। से हर लोका जो पापा री माफी खतर बतागे। ओर जे से ऐडा कराऐ तो परमेसवर तिना रे पापा जो माफ करगा। मेरे चेले ईस सन्देसा री सुरुआत यरुलेसमा ते सुरु करगे। तब से सब जगह ओर सब जातीया च जागे। तुसे लोक मेरी हर बात ओर कामा रे गवाह हुणे जो मे बोलया ओर कितया, ओर जो मा कने हुआ।”

अगले चाली दिना तक, यीसु अपने चेलेया सामने कई बार आया। ईक बार तो से ईक समय 500 लोका सामने आया! तिने अपने चेलेया पर कई तरीके कने साबित कितया बई से जिन्दा, ओर तिने तिना जो परमेसवरा रे राज्‍य रे बारे च बताया।

यीसुआ ने अपने चेलेया जो बोलया, “परमेसवरा ने मिजो सवर्ग ओर तरती रे हर जना पर राज करने रा अदिकार दितरा। ईते खतर अऊ तुसा जो बोला: जाई के सबीजाता रे लोका जो चेला बनाओ। ऐडा करने जो, तुसे तिना जो पिता, पुत्र, ओर पवितर आत्‍मा रे नामा ते बपतिस्‍मा देणा। जो मै तुसा जो बताया तिना सारी बाता जो तिनाओ सीखाओ ओर सुनो, अऊ सदा तुसा कने रेणा।”

यीसुआ रे मरी के जीन्‍दां हुणे रे चाली दिना बाद, तिने अपने चेलेया जो बोलया, “जब तक मेरा पिता तुसा जो सामर्थ नी देदा तब तक यसुशलेमा च ही रेणा। से तुसा पर पवितर आत्मा पेजीके ऐडा करगा।” तब यीसु स्‍वर्गा जो चलीगा, ओर ईक बदला ने तिसो तिना रे सामने छुपाईता। स्‍वर्गा च यीसुआ ने सासन करने खतर परमेसवरा रे दाहिनी ओर बैठीगा।