43. कलैसीया री सुरुआत हुई

यीसुआ रे सवर्ग जाणे ते बाद, चेले यरुसलेमा च ही रे जैडा यीसुआ ने तिना जो करने जो बोलया था। तिती रे लोक रोज पराथना करने खतर कटठे हुआ थे।

हर साल, फसह रे तेओहारा रे 50 दिना बाद, यहुदी लोक पिन्‍तेकुस्‍त नामा रे जरुरी दिना जो मना थे। पिन्‍तेकुस्‍त से समय था जब यहुदी लोक कनका री कटाई करा थे सारे संसारा रे यहुदी लोक पिन्‍तेकुस्‍त रे दिना जो ईक साथ मनाने यरुसलेम आऐ। ईस साल, पिन्‍तेकुस्‍त मनाने रा समय यीसुआ रे सवर्ग जाणे रे सात दिना बाद आया था।

जिस समय सारे विसवासी लोक ईक जगह कठे थे, जिस करा च थे तिथी इकदम जोरा री हवा चली। तब आगा री लपटा साई दिखने वाला कुछ विसवासीया रे सिरा पर दिखया। से सारे लोक पवित्र आत्‍मा कने परीगे ओर तिने लग लग बोलीया च परमेसवरा री स्‍तुती किती। ऐ सै बोली थी जिना जो बोलने खतर तिना जो पवितर आत्मा ने तेयार किता।

जब यरुसलेमा च रेणे वाले लोका ने तिना री वाजा सुनीया, तब से बहुत सारे लोक कटठे हुई के तिथी देखणे आए बई क्‍या हुणे लगीरा। तिने विसवासीया जो परमेसवरा रे कितरे बडे बडे कामा रे बारे च बतादे सुनया। से हैरान थे बई से तिना कामा जो अपणी बोलिया च सुणने लगीरे थे।

ईना लोका ने बोलया बई चेले नशेचे। पर पतरस खडा हुआ ओर तिना जो बोलया, “मेरी बात सुनो! ऐ लोक नशे च नीए! बलकी, जो तुसे देखने लगीरे सेईआ जो योएल भविश्यवकता ने बोलया था बई हुणा: परमेसवरा ने बोलया, ‘आखरी दिनाच, अऊ अपणा आतमा तुसा पर पागा।’

हे इसरायली आदमीयो, यीसु ईक ऐडा मनुसय था जिने ऐ दखाने खतर बई से कुणा बोत सारे नोखे काम किते। तिने परमेसवरा री शक्‍तिया कने बोत सारे अनोखे काम किते। तुसे ऐ जाणाए, तुसे तिस रे काम देखीरे। पर तुसे तिसो करुसा पर चडाईता!”

यीसु मरी गया पर परमेसवरा ने तिसो मरी के बी जीन्‍दां करीता। ईने तिसा बाता जो पुरा करीता जिते जो ईक भविश्यवकता ने लिखया था; ‘बई तु अपने खरे आदमीया जो कबरा च सडने नी देगा।’ असे ईते बाता रे गवा ऐ बई परमेसवरा ने यीसुआ जो दुबारा जिन्‍दां करीता।”

“परमेसवरा ने अब यीसुआ जो अपणे दाहीनी तरफा जो बठाई के तिसरा आदर कितया। ओर यीसुआ ने असा खतर पवितर आत्‍मा पेजी जितेरी तिने कसम खाई थी बई से पेजगा। पवितर आत्‍मा ई तिना कामा जो करने लगीरा जिते जो तुसे देखने ओर सुनने लगीरे।”

“तुसे तिस आदमीया, जो करुसा पर चडाईता। पर याद रखो परमेसवरा ने यीसुआ जो सबी चीजा पर राज्‍य ओर मसीह दोनो बताया!”

पतरसा री बात सुणी के लोक हैरान हुई गे। ईते खतर तिने पतरस ओर चेलेया ते पुछया, “हे भाई, असा जो क्या करना चाहिए?”

पतरसा ने तिना जो बोलया, “तुसा मे ते हर ईक अपणे पापा री माफी मंगो तब परमेसवर तुसा रे पापा जो माफ करगा, ओर यीसु मसीह रे नामा ते बपतिसमा लो। तब से तुसा जो वरदाना साई पवितर आत्‍मा देगा।”

पतरसा ने जो बोलया तिते पर 3,000 लोका ने परोसा कितया ओर यीसुआ रे चेले बणी गे। तिने बपतिसमा लेया ओर यरुसलेमा री कलीसिया रा हिस्‍सा बनी गे।

जब प्रेरिता ने तिना जो सिक्सा दिती तब बिसवासीया ने तयान लगाई के सुणया। से आपसा च मिलने लगे ओर ईक साथ बैठी के रोटी खाणे लगे, ओर ईक दुजे खतर पराथना करा थे। तिने मिली के परमेसवरा री अराधना किती ओर जो कुछ तिनागे था तिने ईक दुजे कने बडया। नगरा रा हर आदमी तिना जो माना था। रोज, ज्यादा ते ज्‍यादा लोक विसवासी बनणे लगे।