44. पतरस ओर युहना ईक पिखारीया जो ठीक कराए

इक दिन, पतरस ओर युहना मंदिरा च गे। तिथी ईक लगंडा आदमी पीख मागने खतर दरवाजे पर बैठीरा था।

पतरसा ने तिस लंगडे आदमीया जो देखया ओर बोलया, “मंगे तिजो देने खतर पैसे नीए। पर जो मंगेआ से अऊ तिजो देया। यीसुआ रे नामा ते, ऊठ ओर चल-फिर!”

तिसी समय, परमेसवरा ने तिस लगंडे आदमीया जो ठीक करीता। तिने ओरे परे चलना ओर नाचदे हुए, ओर परमेसवरा री अराधना सुरु करीती। मंदिरा रे आगंना च लोक तिसो देखीके हैरान थे।

तिस समय लोका री पीड तिस आदमीया जो देखने आई जो ठीक हुईगा था। पतरसा ने तिना जो बोलया, “ऐ आदमी ठीक आ, पर ईस बाता पर हैरान नी हुणा। असे ईसो अपणी शकतीया कने ठीक नी कितया, या ईते खतर नी बई असे परमेसवरा रा सम्‍मान कराय। ये, से यीसुआ जिने ईसो ठीक किता, असे यीशुआ पर विसवास कराए।”

“से तुसे ईए जिने रोमी राज्‍यपाला जो यीसुआ जो मारने जो बोलया। तुसे तिसो मारीता जो सबी जो जिवन दे था। पर परमेसवरा ने तिसो मरीरे मे ते जिन्‍दां किता। तुसा जो नी पता था बई तुसे क्या करने लगीरे, पर जब तुसे तिस कामा जो करने लगीरे थे, जो भविश्यवकता ने बोलया था से पुरा हुआ। तिने बोलया था बई मसीह ने दु:ख देखणा ओर मरी जाणा। परमेसवरा ने ईते जो इस तरीके कने हुणे दितया। ईते खतर अब, माफी मंगो ओर परमेसवरा री तरफ जावो, बई से तुसा रे पापा जो तोई के साफ करो।”

जब मंदिरा च यहुदी परदाना ने पतरस ओर युहना जो सुणया, तब से डरीगे। ईते खतर तिने तिना जो बन्दी बणाई के जेला च पाईता। पर जो पतरसा ने बोलया था तिते ओर बहुत लोका ने परोसा कितया। यिसुआ पर विसवास करने वाले लोका री गिणती 5,000 हुई गी।

दुजे दिन, यहुदी अगवे पतरस ओर युहना जो महायावक ओऱ धरमी अगुओ रे सामने लेई आए। से तिस आदमीया जो बी लेई आए जो अपगं था। तिने पतरस ओर युहना जो पुछया, “किस हका कने तुसे इस लगडे आदमीया जो ठीक किता?”

पतरसा ने बोलया, “जो आदमी तुसा सामने खडीरा तिसो यीसु मसीहा रे नामा ते ठीक कितया। तुसे यीसुआ जो कुरुसा पर चडाईता, पर परमेसवरा ने तिसो दुबारा जिदां करीता! तुसे तिसो नी मानया, पर यीसुआ रे नामा रे इलावा उद्धार पाने रा ओर कोई रसता नीआ!”

परधान हैरन थे पतरस ओर युहना ने बहुत हिमता कने बात किती। तिने देखया बई ऐ मामुली आदमी ए जो अनपड़ थे। पर तब तिना जो याद आया बई ऐ आदमी यीसुआ कने रेणे वाले थे। तब तिने तिना जो बोलया, “असे तुसा जो बोत सजा देणी जे तुसे लोका जो यीसुआ रे बारे च ओर कुछ बताया।” ऐडी बोत बाता करने ते बाद, तिने पतरस ओर युहना जो जाने दितया।