8. परमेसवरा रा युसुफ ओर तिसरे परिवारा जो बचाया
कई साला बाद, जब याकुब बुडा हुई गया, तब तिने अपने बेटे युसुफा जो अपने पाईया री देख पाल करने पेजया जो जानवरा री देख पाल करा थे।
युसुफ रे पाई तिस कने जला थे इते खतर की तिसरा पिता तिस कने बहुत प्यार करा था ओर ईते खतर कि युसुफा ने ईक सुपना देखया था से तिना रा राजा हुई जाणा। जब युसुफ आपने पाईयागे आया तो तिने से केद करी ला ओर गुलामा रा काम करने वाले बपारीया जो बेची ता।
करा जो आवणे ते पैले युसुफा रे पाईया ने तिसरे कपडे फाडे ओर बकरीया रे खुना च रंगीते। तब तिने से कपडे अपने पिता जो दखाए ईते खतर की से सोचो की युसुफा जो कोई जंगली जानवर खाई गा। याकुब बहुत दुखी हुआ।
गुलामा रा काम करने वाले से लोक युसुफा जो मिसर लेई गे।नदीया रे कनारे बसीरा से देस बहुत बडा ओर महान था।तिना गुलामा ने युसुफा जो ईक अमीर बपारीया जो गुलाम बनाई के बेचीता। युसुफा ने अपणे मालिका री बहुत सेवा किती, तब परमेसवरा ने युसुफा पर किरपा किती।
तिसरे मालिका री करआलिया ने युसुफा कने नाजायज रिसता बनाने री कोसिस किती, तब युसुफा ने परमेसवरा रे खिलाफ एडा पाप करने जो ना करीती। तब से गुस्सा हुई गी। ओर युसुफा पर चुठा इलजाम लगाया। ईते खतर तिसो बन्दी बनाई के जेलाच पेजीता। जेलाच बी युसुफ परमेसवरा रे खतर वफादार रेया, तब परमेसवरा ने तिस पर किरपा दिती।
दो साला बाद अबु बी युसुफ जेला च था, पर से बे कसुर था। इक राती, फिरोन, जिया की मिसरी लोक राजाओ जो बुला थे,ने दो सुपने देखे जिने तिसो बहुत बेचेन करीता। तिसरा कोई बी सला देने वाला तिसो ईते सुपने रा मतलब नी बताई सकया।
परमेसवरा ने युसुफा जो सुपने रा मतलब बताने री विद्या दिती री थी, इते खतर फिरोना ने युसुफा जो जेली ते अपुगे बुलाया युसुफा ने तिसो सुपने रा मतलब बताया ओर बोलया, “बई सारे मिसर देसा च परमेसवर जयादा फसल देने रे सात साला बाद अगले सात साल अकाल पेजणे वाला।”
फिरोन तिस ते इतना खुस हुआ की तिने युसुफा जो मिसरा रा दुजा महान आदमी बनाइता।
युसुफ ने लोका जो सुणी फसल सात साला च कठी करने जो बोलया। जब सात साला रा अकाल आया तब युसुफा ने से लोका जो से फसल बेची ईते खतर की लोका गे खाणे री कमी न ओ।
से अकाल मिसरा च ईनी पडयां, बल्कि कनाना च बी बहुत बूरा था जिथी याकुबा रा परिवार रेया था।
ईते खतर याकुबा ने अपणे सबी ते बडा बेटा मिसर देसा च अनाज खरीदने पेजया। जब से अनाज खरीदने खतर युसुफा रे सामणे खडे तब तिने पाईया ने युसुफा जो नी पछाणा। पर युसुफा ने तिना जोपछाणी ला।
ऐ जाणने खतर की क्या से बदली गेरे तिना जो परखणे खतर ,युसुफा ने तिना जो बोलेया, “अऊ तुसा रा पाई युसुफ आ, डरो मत। जब तुसे मिजो गुलामा जो बेचया था तब तुसे मा कने बुरा किता था। पर परमेसवरा ने तिते जो अच्छेच बदली ता। तुसे सब जणे ईथी आई जाओ ओर मिसरा च रेओ तब आऊ तुसा रे ओर तुसा रे परिवारा जो अनाजा रा ईतजाम करु।”
जब युसुफा रे पाई करे आए तब तिने अपणे पिता जो बोलेया बी युसुफ अबु जिंदा तब से बहुत खुस हुआ।
ईते खतर की याकुब बहुत बुडा था पर तब बी अपणे पुरे परिवारा जो लेई के मिसर देसा जो चली गया, तब से तिथी बसी गे। याकुबा रे मरने ते पेले, तिने अपणे सारे बेटे पर कीरपा किती।
वादे री जो बात परमेसवरा ने अबराहमा कने किती थी से इसहाक, ओर तिते बाद याकुब, ओर तिते बाद तिसरे बारह बच्चे ओर तिना रे परिवारा पर आई गी। से बारा बच्चे इसराईला रे बारह कुल बणी गे।
उत्पति पाठ 37-50 ते ईक बाईबला री काणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।