10. दस मुसीबता

परमेशरे मूसा ओर हारुणो खे चेतावनी दिती की फिरौन जिद्दी हुई जाणा जेबे सेयो फिरौनो रे नेड़े गए तेबे तिने बोलेया, “ इस्राएलो रा परमेशर ईंया बोलोआ, ‘मेरे लोका खे जाणे दे” पर फिरौने तिना री नी सुणी ओर इस्राएलिया खे जाणे रिया तंई छाडणे रे बजाए तिने तिना खे ओर कठण मईणत करने खे मजबूर कितेया

फिरौन तिना लोका खे जाणे देणे ते लगातार ना करदा रया, इजी खे परमेशरे मिस्रो पांदे दस कठण मुसीबता पेजीया ईंना मुसीबता रे जरिए, परमेशरे फिरौनो खे दखाया की से फिरौन ओर मिस्रो रे देवतेया ते बऊत शक्तिशाली ए

परमेशरे नील नदिया खे खूनो दे बदलिता, पर फिरौने एबु बी इस्राएली जाणे नी दिते

परमेशरे पुरे मिस्रो दे मिनके पेजे फिरौने मिनके दूर करने खे मूसे खे बोलेया पर सारे मिनकेया रे मरने ते बाद, फिरौने आपणा मन पक्का करी ला ओर इस्राएलिया खे मिस्रो ते निकलणे नी दित्तेया

इजी खे परमेशरे जुंआ री बिपदा पेजी तिजी ते बाद तिने माखा री बिपदा पेजी फिरौने मूसा ओर हारुण बुलाए ओर बोलेया की जे सेयो तेसा बिपदा खे रोकी देओ तो इस्राएली मिस्रो खे छाड़ी की जाई सकोए जेबे मूसे प्रार्थना किती तेबे परमेशरे मिस्रो पांदा ते माखा री बिपदा टाई ती पर फिरौने आपणा मन काठा करी ला ओर लोका खे खुले हुई की जाणे नि दिते

इजी ते आगे, परमेशरे मिस्रिया रे सारे करेलु पशुआ खे बमार हुई की मरणे दिते पर फिरौनो रा मन काठा हुई गा था ओर तिने इस्राएली जाणे नि दिते

तेबे परमेशरे मूसे खे फिरौनो रे सामणे अवा दे स्वा सेटणे खे बोलेया जेबे तिने ऐड़ा कित्तेया तेबे मिस्रो रे लोका रे शरीरा पांदे पीड़ा वाल़े फोड़े निकली गे,पर इस्राएलिया खे कुछ नि ऊआ परमेशरे फिरौनो रा मन काठा करी ता, ओर फिरौने इस्राएलिया खे आजाद हुई की जाणे नि दितेया

इजी ते बाद, परमेशरे ओल़े सेटे ओर मिस्रो री आदी फसल खराब करीती ओर जो कोई बी बारे निकल़ेया से काईता फिरौने मूसा ओर हारुण बुलाये ओर तिना खे बोलेया, “मैं पाप करी राखेया तुसे लोक जाई सकोए” तेबे मूसे प्रार्थना किती, ओर सर्गो ते ओल़े पड़ने रुकी गे

पर फिरौने फेर पाप कित्तेया ओर आपणा मन काठा करी ला तिने इस्राएली आजाद हुई की जाणे नी दिते

पर परमेशरे मिस्रो पांदे टिड्डिया रे चुंड आऊणे दिते इने टिड्डिए से सारी फसल खाई ती जो ओल़ेया ते बची गी थी

फेर परमेशरे नेरा करी ता जो तीऊँ दिना तक बणेया रा रया ए इतना नेरा था की लोक आपणे करो ते नि निकल़ी सके पर जेती इस्राएली लोक रओ थे तेती प्रयासा था

ईंना नौ बिपदा ते बाद बी, फिरौने इस्राएलिया खे खुले हुई की जाणे देणे ते ना करी ती कऊंकि फिरौने नी सुणेया था इजी खे परमेशरे एक आखरी बिपदा पेजणे री योजना बणाई ए फिरौनो रे मनो खे बदली देओगी