9. परमेशर मूसे खे बुलाओआ

यूसुफो रे मरने ते बाद तिना रे सारे रिश्तेदार मिस्रो दे बसी गे से ओर तिना रे वंश कई साला तक मिस्रो रे ई रए ओर तिने बऊत बच्चे पैदा किते तिना खे इस्राएली बोलेया जाणे लगेया

कई सौ साला ते बाद, इस्राएलिया री संख्या बऊत बढ़ी गी थी ओर मिस्री लोक ऐते गल्ला खे आभारी नि थे की तिना री मताद करने खे यूसुफे बऊत कुछ कितेया था से इस्राएलिया ते डरी गे कऊंकि सेयो संख्या दे तिना ते बऊत जादा थे इजी खे तेस बख्ते मिस्रो पांदे राज करने वाल़े फिरौने इस्राएलिया खे मिस्रया रा दास बणाई ता

मिस्रिए इस्राएलिया खे बऊत जी मंजिला ओर एथो तक की कई शईर बनाणे खे मजबूर कितेया तेसे कठण मईणते तिना रे जीवनों खे बऊत दुखी बणाई दित्तेया, पर परमेशरे तिना खे आशीष दिती ओर तिना रे ओर बच्चे पैदा ऊए

फिरौने देखेया की इस्राएलिया रे बऊत बच्चे पैदा ऊणे लगी रे थे, इजी खे तिने आपणे लोका खे इस्राएलिया रे सारे माठेया खे नील नदिया रे सेटी की काणे रा ऊकम दित्तेया

एक इस्राएली जवाणसे एकी पाऊए खे जन्म दित्तेया तेसे ओर तेसारे लाड़े जितना हुई सकेया से बच्चा लकोई की राखेया

जेबे तेस बच्चे रे माए- बाओ तेसखे ओर जादा नि लकोई सके, तेबे तिने काए जाणे ते बचाणे रिया तंई एक तरने वाल़ी टोकरिया दे नील नदिया रे कनारे पांदे सरकंडेया बीचे राखी ता तेसा री बड़ी बईणे ए देखणे खे तेसारी निगरानी किती की तेस साथे क्या ऊणां?

फिरौनो री मुनिए तेसा टोकरिया खे देखी की तेते पीतरे चाँकेया जेबे तेसे एक बच्चा देखेया तेबे तेसे से आपणे बच्चे रे रुपो दे लई ला तेसे एक इस्राएली जवाणसा खे तेसखे दूध प्ल़याणे खे कामो पांदे राखी ला, बिना ए जाणे की से तेस बच्चे री असली माए थी जेबे से बच्चा इतना बड़ा हुई गा की ऐबे तेसखे आपणी माया रे दूधो री जरुरत नि थी, तेबे तेसे से फिरौनो री मुनिया गे वापस करी ता, तेसरा नाओं मूसा था

एकी दिने, जेबे मूसा बड़ा हुई गा था, तेबे तिने देखेया की एक मिस्री एक इस्राएलिये खे कुटणे लगी रा था मूसे आपणे साथी इस्राएलिये खे बचाणे री कोशिश किती

जेबे मूसे सोचेया की तेसखे कोई नि देखणे लगीरा तेबे तिने से मिस्री काईता ओर तेसरा शरीर दबाई ता पर मूसे जो कित्तेया था से किने देखी ला था

फिरौनो खे पता लगी गा था की मूसे क्या कित्तेया था तिने तेसखे काणे री कोशिश किती, पर मूसा मिस्रो ते जंगलो खे नठी गा फिरौनो रे सिपाई तेसखे तेती टोल़ी नी सके

मिस्रो ते दूर बणो दे मूसा एक चरवाह बणी गा था तिने तेती एकी जवाणसा साथे ब्या करी ला ओर दो पाऊ पैदा किते

मूसा आपणे सऊरे रे पेडा रे चुंडो री देखपाल करो था एकी दिने, तिने एक बल़दा ऊआ डाल़ देखेया जो राख ऊए बिना बल़ने लगी री थी तेस देखणे खे से तेस डाल़ो नेड़े गया जेबे से तेते रे बऊत नेड़े था तेबे परमेशरे तेस साथे गल्ल किती तिने बोलेया, “ओ मूसा, आपणे बूट खोली दे तू एक पवित्र जगा दे खड़ी रा”

परमेशरे बोलया, “मैं आपणे लोका रा दु:ख देखी राखया मां तू फिरौनो गे पेजणा ताकि तू इस्राएलियों खे मिस्रो रे दासो ते निकाली की लयाओ मां तिना खे कनान देश देणा, से देश जेतेरी मैं अब्राहम, इसहाक ओर याकूबो साथे वायदा कितया था”

मूसे पूछेया, “जे लोक जाणना चाओ की आऊं किने पेजी राखेया तेबे मां क्या बोलणा?” परमेशरे बोलेया, “जो आऊं अया से आऊं अया तिनाखे बोलो, “आऊं अया ने आऊं तुसा रे नेड़े पेजी राखेया’ तिना खे ए बी बोलणा, ‘आऊं तुसारे बुजुर्ग अब्राहम, इसहाक ओर याकूबो रा परमेशर यहोवा ए’ मेरा ए नाओ सदा रा ए”

मूसा डरो था ओर फिरौनो रे नेड़े जाणा नि चाओ था कऊंकि तिने सोचेया की से ठीक तरआ ते नि बोली पाणा, इजी खे परमेशरे मूसे रे पाई हारुणो खे तेसरी मताद करने खे पेजेया