8. परमेशर युसूफ ओर तेसरे परिवारो खे बचाओआ
कईया साला बाद, जेबे याकूब स्याणा हुई गा था, तेबे तिने आपणे प्यारे पाऊ यूसुफो खे तेसरे पाईया री जाच करने खे पेजेया जो पशुआ रे चुंड़ो री देखपाल करेया करो थे।
यूसुफो रे पाई तेसते कृणा करो थे कऊंकि तिना रा बाओ तेसते बऊत प्यार करो था ओर इजी खे बी की यूसुफे सुपना देखेया था की से तिना रा राजा ऊई जाणा। जेबे यूसुफ आपणे पाईया गे आया तेबे तिने से बंदी बणाई ला ओर से दासा रा व्यापार करने वाल़ेया खे बेची ता।
करो खे वापस आऊणे ते पईले यूसुफो रे पाईए यूसुफो रे टाल्ले फाड़ी की बाकरिया रे खूनो दे सीने करी ते। फेर तिने से टाल्ले आपणे बाओ खे दखाए ताकि से ऐड़ा सोचो की केसी जंगली जानवरे यूसुफ काई राखेया। तेबे याकूब बऊत दु:खी ऊई था।
दासा रा व्यापार करने वाल़े सेयो लोक यूसुफो खे मिस्रो खे लेई गे। नील नदिया रे कनारे पांदे बसेया रा मिस्र एक बऊत बड़ा ओर शक्तिशाली देश था। दासा रा बपार करने वाल़ेया यूसुफो खे एक तनी सरकारी अधिकारिए खे दासो रे रुपो दे बेची ता। यूसुफे आपणे मालको री ठीक तरआ ते सेवा किती, ओर परमेशरे यूसुफो खे आशीष दिती।
तेसरे मालको री लाड़िए यूसुफो साथे सऊणे री कोशिश किती, पर यूसुफे ईंया परमेशरो रे खलाफ पाप करने ते ना करी ती। से गुस्सा हुई गी ओर यूसुफो पांदे चुठा आरोप लगाईता, इजी खे से पकड़ी की जेला रे पेजी ता। एथो तक की जेला रे बी, यूसुफ परमेशरो रे प्रति सच्चा रया, ओर परमेशरे तेसखे आशीष दिती।
दो साल बाद, यूसुफ एबु बी जेला रे था, चाए से निर्दोष था। एक राती, फिरौने, जेड़ा की मिस्री लोक आपणे राजेया खे बोलो थे, तिने दो सुफने देखे जिने से बऊत विचलित करी ता। तेसरा कोई बी सलाकार तेसखे तिना सुफनेया रा मतलब नि बताई सकेया।
परमेशरे यूसुफो खे सुपने रा मतलब बताणे री शक्ति परदान किती थी, इजीखे फिरौने यूसुफो खे जेला ते आपु नेड़े बुलाया। यूसुफे तिना सुफनेया रा मतलब बताया ओर बोलेया, “परमेशर भरपूरी री फसला वाल़े साता साला ते बाद अकाल़ो रे सात साल पेजणे वाला ए।”
फिरौन यूसुफो ते इतना खुश हुआ की तिने तेसखे मिस्रो रा दुजा सबी ते शक्तिशाली मर्द बणाई ता।
यूसुफे लोका खे ठीक फसला वाल़े सात साला ते बाद बड़ी मात्रा दे खाणा जमा करने खे बोलेया। जेबे साता साला रा अकाल़ आया तेबे यूसुफे लोका खे से खाणा बेचेया ताकि तिना गे खाणे खे पुरा ओ।
से अकाल़ सिर्फ मिस्रो दे नि, पर कनानो दे बी बऊत था जेती याकूब ओर तेसरा परिवार रओ था।
इजी खे याकूबे आपणे सबी ते बड़े पाऊए खे रोटी खरीदणे खे मिस्रो दे पेजेया। जेबे सेयो रोटी खरीदणे खे यूसुफो रे सामणे खड़े ऊए तेबे तिने पाईए से यूसुफ नी पछयाणेया। पर यूसुफे सेयो पछयाणी ले।
ए पता करने खे की सेयो बदली गे दे तिना री जाच करने ते बाद, यूसुफे तिना खे बोलेया, “आऊं तुसा रा पाई यूसुफ आ। डरो नि। जेबे तुसे आऊँ दासो रे रुपो दे बेचेया था तेबे तुसे बुरा करने री सोची थी, पर परमेशरे तेसा बुराइया खे पलाई करने खे इस्तेमाल कितेया। आओ ओर मिस्रो रे रओ ताकि आऊँ ताखे ओर तेरे परिवारो खे रोटिया रा इतंजाम करी सकूं।”
जेबे यूसुफो रे पाई करे वापस आए ओर आपणे बाओ याकूबो खे बताया की यूसुफ एबु बी जिऊंदा ए तेबे से बऊत खुश हुआ।
पर याकूब एक स्याणा आदमी था तेबे बी से आपणे पूरे परिवारो साथे मिस्रो खे चली गा, ओर सेयो तेती बसी गे। याकूबो रे मरने ते पईले, तिने आपणे हर एकी पाऊए खे आशीष दिती।
वायदे री प्रतीज्ञा जो परमेशरे अब्राहमो साथे किती थी से इसहाको पादें ओर तेसते बाद याकूब, ओर तेसते बाद तेसरे बारा पाऊआ ओर तिना रे परिवारो पांदे आई गी थी। तिना बारा पाऊआ रे वंश इस्राएलो रे बारा गोत्र बणी गे।
उत्पति पाठ 37-50 तक ते एक बाइबला री कआणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।