16. बचाणे वाल़े

यहोशूए रे मरने ते बाद इस्राएलिए परमेशरो री नि मानी। तिने परमेशरो रिया बिधिया रा पालन नी कित्तेया, ओर तिने तेस वादे रे देशो ते बचे रे कनानी बारे नी निकयाल़े। इस्राएलिए आपणे सच्चे परमेशर, यहोवे खे छाड़ी की कनानिया रे देवतेया री पूजा करनी शुरु करी ती। इस्राएलिया गे कोई राजा नि था, इजी खे जेसखे जो ठीक लगेया तिने सेई कित्तेया।

परमेशरो री आज्ञा नि मानणे रे जरिए इस्राएलिए एक पदति शुरु करी ती जो कई बार दोराई गई। ए पदति ईंया चली: कुछ साला तक इस्राएली परमेशरो री आज्ञा नी मानो थे, तेबे से तिना खे तिना रे दुश्मणा ते अराणे रे जरिए सजा देओ था। ए दुश्मण इस्राएलिया ते तिना री चीजा लई लओ थे, ओर तिना रा खत्मा करी देणा, ओर तिना बीचा ते बऊत काई देणे। फेर जेबे इस्राएलिया रे दुश्मण तिना पांदे कई साला तक अत्याचार करो थे, तिजी ते बाद आपणे पापो री माफी मांगो थे ओर परमेशरो ते तिना खे बचाणे रिया तँईं प्रार्थना करो थे।

हर बार जेबे इस्राएली माफी मांगो थे तेबे परमेशर तिना खे बचाओ था। से एक छुड़ाणे वाल़े रे जरिए ऐड़ा करो था। एक ऐड़ा जणा जो तिना रे दुश्मणा रे खलाफ लड़ो था ओर तिना खे अराओ था। तेबे देशो रे शान्ति ऊणी ओर से छुड़ाणे वाला तिना पांदे ठीक जे राज करो था। परमेशरे तिना लोका खे बचाणे खे बऊत छुड़ाणे वाले पेजे। परमेशरे नेड़ो रे एक दुश्मण जाति, मिद्धानिया रे जरिए इस्राएलिया खे अराणे रे जरिए फेर ऐड़ा ई कित्तेया।

मिद्धानिए साता साला तक इस्राएलिया री फसल लूटी। इस्राएली लोक बऊत डरी गे थे, ओर से गुफा दे लुकी गे ताकि मिद्धानी लोक तिना खे टोल़ी नी सको। तेबे तिनाखे बचाणे रिया तँईं तिने परमेशर बुलाया।

गिदोन नाओं रा एक इस्राएली मर्द था। एकी दिने, से एक गुप्त जगा दे तान चाड़ने लगी रा था ताकि मिद्धानी लोक तिना खे चोरी नि सको। यहोवे रे स्वर्गदूते गिदोनो रे नेड़े आई की तेसखे बोलेया, “ ओ शूरवीर सूरमा परमेशर तां साथे ए। जा ओर इस्राएलिया खे मिद्धानिया ते बचा।”

गिदोनो रे बाओ रे नेड़े मूर्तिया खे समर्पित एक वेदी थी।सबी ते पईली गल्ल जो परमेशरे गिदोनो खे करने खे बोली से तेसा वेदिया खे तोड़ना था। पर गिदोन लोका ते डरो था, इजी खे तिने रात ऊणे रा इंतजार कित्तेया। तेबे तिने से वेदी तोड़ी की टुकड़े- टुकड़े करी ते। तिने परमेशरो खे एक नवीं वेदी बणाई ओर तेस पांदे परमेशरो खे बली चढ़ाई।

आगले दिने लोके देखेया की किने वेदी तोड़ी की टुकड़े – टुकड़े करी राखे, इजी खे से बऊत गुस्से ऊआ। से गिदोनो खे मारने खे तेसरे कअरो खे गया, पर गिदोनो रे बावे बोलेया, “तुसे कऊँ आपणे देवतेया री मताद करने री कोशिश करेया करोए? जे से देवता ए तेबे तेसखे आपणी रक्षा आपु करने देओ।” कऊँकि तिने तेड़ा बोलेया इजी खे लोके गिदोन नि काया।

तेबे इस्राएलिया खे लुटणे खे मिद्धानी लोक फेर आए। से इतने सारे थे की तिना री गिणती नि करी सको थे। गिदोने तिना रे खलाफ लड़ने खे इस्राएली कट्ठे कित्ते। गिदोने परमेशरो ते दो नशाण मांगे ताकि तेसखे विश्वास हुई जाओ की परमेशर सच्ची तेसखे इस्राएलो खे बचाणे खे बोलणे लगी रा।

पईले नशाणो खे, गिदोने पेडा री ऊन जमींना पांदे राखी की परमेशरो खे बोलेया की प्यागा री तेल़ सिर्फ तेसा ऊना पांदे पड़ो ओर जमीना पांदे नि पड़ो। परमेशरे ऐड़ा ई कित्तेया। आगली राती, तिने परमेशरो खे बोलेया की जमींन सीनी हुई जाओ पर पेडा री ऊन सूकी रओ। परमेशरे ऐड़ा बी कित्तेया। इना दुई नशाणा रे कारण, गिदोने विश्वास कित्तेया की परमेशर सच्ची चाओआ की से इस्राएलिया खे मिद्धानिया ते बचाओ।

तेबे गिदोने सैनिक आपु गे बुलाए ओर 32,000 मर्द आए। पर परमेशरे तेसखे बोलेया की ए बऊत जादा ए। तेबे गिदोने से सब 22,000 कअरे वापस पेजी ते जो लड़ने ते डरो थे। परमेशरे गिदोनो खे बोलेया की ए मर्द एबु बी बऊत जादा ए। इजी खे गिदोने 300 सैनिका खे छाडी की से सब कअरे पेजी ते।

तेसा राती परमेशरे गिदोनो खे बोलेया, “मिद्धानिया री छावनी दे जा ओर तिना खे गल्ला करदे ऊए सुण। जेबे तू सुणे की से क्या गल्ला करने लगी रे तेबे तू तिना पांदे अमला करने ते नी डरोगा।” इजी खे तेसा राती, गिदोन थाले तेसा छावनिया दे गया ओर तिने एक मिद्धानी सैनिको खे आपणे दोस्तो खे से गल्ल बतांदे ऊए सुणे जो तिने सुफने दे देखी थी। तेस सैनिको रे दोस्ते बोलेया, “ऐते सुफने रा मतलब ए की गिदोनो री सेना आसा मिद्धानीया री सेना खे अराई देणा।” जेबे गिदोने ए सुणेया तेबे तिने परमेशरो री स्तुति किती।

तेबे गिदोन आपणे सैनिको गे वापस आया ओर तिना बीचा ते हर एकी खे रड़सिंगा, एक माटिया रा पान्ड़ा, ओर एक मशाल दिती। तिने से छावनी केरी ली जेती से मिद्धानी सैनिक सुते रे थे। गिदोनो रे 300 सैनिके आपणी सारिया मशाला पान्ड़े की टकी रिया थिया इजी खे मिद्धानी लोक तिना मशाला रा प्रयासा देखी नी सके थे।

तेबे गिदोनो रे सबी सैनिके आपणे पान्ड़े एकी ई बखते तोड़ी की तेबु ई मशाला रे आग पैदा करी ती। तिने आपणे रड़सिंगे बजाए ओर जोरे की चींगे, “यहोवे री तरफा ते गिदोनो री तलवार।”

परमेशरे मिद्धानी डराई दिते, इजी खे सेयो एकी दुजे खे मारने – कुटणे लगे। तेबु ई, गिदोने से संदेशा पेजेया कि सब इस्राएली मिद्धानिया रा पीछा करने खे ओर तिना री मदत करने खे आओ। तिने तिना बीचा ते बऊत काईते ओर बाकिया रा पीछा करी की सेयो इस्राएलो रे देशो ते बारे निकाल़ी ते। तेस दिने 1,20,000 मिद्धानी काईते। ईंया परमेशरे इस्राएली बचाए।

से लोक गिदोनो खे आपणा राजा बनाणा चाओ थे, पर गिदोने तिना खे ऐड़ा नी करने दित्तेया, पर तिने तिना ते से सुईने रे ज्योर मांगे जो तिना बीचा ते हर एकी मिद्धानिया ते लूटी ले थे। तिने लोके बऊत जादा गिदोनो खे सुईना दित्तेया।

तेबे गिदोने तेस सुईने ते एक नऊखा टाल्ला बनाया जेड़ा की बड़ा पुरोईत पईनो था। पर लोके तेसरी पूजा करनी शुरु करी ती जिंयाँ की से मुर्ति ओ। तेबे परमेशरे फेर इस्राएलो खे सजा दिती कऊंकि तिने मूर्तिया री पूजा किती थी। परमेशरे तिना रे दुश्मणा खे तिना ते अराणे खे पक्के किते। तेबे तिने फेर परमेशरो ते मताद करने खे प्रार्थना किती, ओर परमेशरे तिना गे तिना खे बचाणे रिया तंई एक ओर छुड़ाणे वाला पेजेया।

ए गल्ल कई बार हुई: इस्राएली लोक पाप करो थे, परमेशर तिना खे सजा देओ था, से माफी मांगो थे, ओर परमेशर तिना खे छुड़ाणे खे केसी खे पेजो था। कई साला तक, परमेशरे बऊत छुड़ाणे वाले पेजे जिने इस्राएली तिना रे दुश्मणा ते बचाए थे।

तेबे, तिने लोके ओर देशो री तरह परमेशरो ते आपणिया तँईं एक राजा मांगेया।से एक ऐड़ा राजा चाओ थे जो लांबा ओर ताकतवर ओ, ओर जो लड़ाईया दे तिना री अगुवाई करी सको। परमेशरो खे ए विनती पंसद नि आई, पर तिने तिना खे तेड़ा राजा दित्तेया जेड़ा तिने तेसते मांगेया था।