19. भविष्यवक्ता

परमेशर सदा इस्राएलियागे भविष्यवक्तेया खे पेजदा रओ था भविष्यवक्ता परमेशरो रे संदेशो खे सुणदे रओ थे ओर फेर से लोका खे बताओ थे

ऐबे अहाब इस्राएल राज्य पांदे राजा था तेबे तेस बखते एलिय्याह भविष्यवक्ता था आहाब एक बुरा आदमी था तिने चुठे बाल देवतेया री पूजा करवाणे रिया तंई लोक मजबुर किते थे इजी खे एलिय्याहे आहाबो खे बोलेया की परमेशर तिना लोका खे सजा देणे जाणे लगी रा था तिने तेसखे बोलेया, “जदुए तक आंऊ फेर बरखा ऊणे खे नी बोलू तदुएतक इस्राएलो रे राज्य दे बरखा नी ऊणी ओर ना ई तेल़ पड़णी”ऐसे गल्ले की आहाब इतना गुस्से ऊआ कि तिने एलिय्याहो खे काणे रा फैसला कित्तेया

इजी खे परमेशरे एलिय्याहो खे बोलेया की से बणो दे जाई की अहाबो ते लुकी जाओ एलिय्याह बणो दे तेस चरने गे गया जेती जाणे खे परमेशरे तेसखे बताया था हर प्यागा ओर हर सांजा, पंछी एलिय्याहो खे रोटी ओर मास लई की आओ थे एस पूरे बखतो देआहाब ओर तेसरी सेना एलिल्याहो री खोज करदे रए, पर सेयो तेसखे टोल़ी नी सके

बरखा नी ऊणे ते कुछ बखतो ते बाद से चरना सुकी गा इजी खे एलिय्याह नेड़े रे एक देशो दे चली गा तेस देशो दे एक गरीब बिधवा थी जेसा रे एक पाऊ था तिना गे रोटी लगबग खत्म हुई चुकी री थी कऊँकि तेती कोई बी फसल नी ऊई थी पर फेर बी, तेसे जवाणसे एलिय्याहो री देखपाल किती, इजी खे परमेशरे तेसारी ओर तेसारे पाऊए री जरुरता पुरिया कितिया, इजी बजा ते तेसारा आटे रा पान्ड़ा ओर तेलो री कुप्पी कदी खाली नी ऊई तेस पूरे अकाल़ो ते बाद तिना गे रोटी थी एलिय्याह कुछ साला तक तेती रया

साड़े तीन सालाते बाद, परमेशरे एलिय्याहो खे बोलेया की से फेर बरखा करोगा तिने एलिय्याहो खे वापस इस्राएलो रे राज्य दे जाई की आहाबो ते गल्ला करने खे बोलेया इजी खे एलिय्याह अहाबो रे नेड़े गया जेबे अहाबे से देखेया तेबे तिने बोलेया, “अच्छा तू ए, मुसीबत पईदा करने वाला” एलिय्याहे जवाब दित्तेया, “मुसीबत पैदा करने वाला तो तू ए तैं यहोवा छाडी ता रा सेई सच्चा परमेशर ए, पर तू बालो री पूजा करने लगी रा ऐबे ताखे इस्राएल राज्य रे सब लोका खे कार्मेल पाह्ड़ो पांदे लई की आऊणा ए”

तेबे सब लोक कर्मेल पाह्ड़ो खे गए से मर्द बी आए जो बोलो थे की से बालो रे संदेशो खे बोलोए ए बालो रे भविष्यवक्ता थे से सब 450 थे एलिय्याहे लोका खे बोलेया, “कदुए तक तुसे आपणे मनों खे फिराए राखोगे? जे यहोवा परमेशर ए तेबे तेसरी आराधना करो जे बाल परमेशर ए तेबे तेसरी आराधना करो”

तेबे एलिय्याहे बालो रे भविष्यवक्ता खे बोलेया, “एक बल़दो खे बली करी की तेसरे मासो खे बलिदान ऊणे खे एकी वेदीया पाँदे राखो, पर आग नि लगाणी तेसते बाद मां बी तेड़ा ई करना, ओर एक लग वेदिया पांदे मां से मास राखणा तेबे जे परमेशर वेदिया पाँदे आग लटोगा तेबे तुसे जाणी लओगे की से सच्चा परमेशर ए” तेबे बालो रे भविष्यवक्ते एक बली त्यार किती ओर आग नि लगाई

तेबे बालो रे भविष्यवक्ते बालो ते प्रार्थना किती, “ओ बाल, मारी सुण” सारा दिन तिने प्रार्थना किती ओर चींगे ओर ऐथो तक की आपु खे छुरिया साथे बाड़ी ला, पर बाले ज्वाब नि दित्तेया, ओर तिने कोई आग नी सेटी

बालो रे भविष्यवक्ते बालो ते प्रार्थना करने दे पूरा दिन बिताई ता तेबे तिने प्रार्थना करनी बंद करीती तेबे एलिय्याहे दुजे बल़दो रे मासो खे परमेशरो री वेदिया पांदे राखेया तिजी ते बाद, तिने लोका खे पाणिए रे बड़े पान्ड़ेया खे तेस बलिदानो पांदे तेबुए तक लटणे खे बोलेया जदुए तक की मास, लकडिया, ओर एथो तक की वेदीया रे ओरे पोरे री जमींन सारी पाणिये की तर नी ऊई गी

तेबे एलिय्याहे प्रार्थना किती, “ ओ यहोवा, अब्राहम, इसहाक,ओर याकूबो रे परमेशर, आसा खे दखाओ की तुसे इस्राएलो रे परमेशर ए ओर ए की आऊं तुसारा दास ए माखे जवाब देओ जेतेते कि ए लोक जाणी लओ की तुसे ई सच्चे परमेशर ए”

तेबू ई, सर्गो ते आग गिरी ओर तेसे मास, लकड़िया, पाथर, माटी ओर ऐथो तक की वेदिया रे ओरे पोरे पाणी बी फूकी ता जेबे लोके ए देखेया, से जमींना पांदे रुड़ी गे ओर बोले, “यहोवा ई परमेशर ए यहोवा ई परमेशर ए”

तेबे एलिय्याहे बोलेया, “ बालो रा एक बी भविष्यवक्ता बची की नी जाणा चाईयो” इजी खे लोके बालो रे भविष्यवक्ता पकड़ी ले ओर तिना खे तेथा ते लग लेई गे ओर से काईते

तेबे एलिय्याहे अहाब राजे खे बोलेया, “छोड़ आपणे कअरो खे नठी जा, कऊँकि बरखा ऊणे वाल़ी ए” छोड़ बादल़ कणे ऊई गे, ओर बऊत बरखा लगी गी यहोवा तेस सूके खे खत्म करेया करो था इजी ते पता लगोआ की यहोवा ई सच्चा परमेशर ए

जेबे एलिय्याह आपणा काम खत्म करी चुकेया, तेबे परमेशरे एलीशा नाओं रे एक आदमीए खे आपणा भविष्यवक्ता ऊणे खे चुणेया परमेशरे एलीशा रे जरिए बऊत जे चमत्कार किते एक चमत्कार नामानो साथे बी ऊआ से एक दुश्मना री सेना रा सरदार था, पर तेसखे शरीरो रा एक बुरा रोग ऊई गा था नामाने एलीशा रे बारे दे सुणेया था, इजी खे से एलीशा गे आया ओर तिजी ते तेसखे ठीक करने खे विनती किती एलीशे नामानो खे बोलेया की जाई की यरदन नदिया रे पाणिए दे सात बार डुबकी लगाई लो

नामान गुस्सा ऊई गा तिने ऐड़ा करने ते ना करीती, कऊंकि ए तेसखे मुर्खता रा काम लगो था पर बादो ते तिने आपणा मन बदली ता ओर जाई की यरदन नदिया रे पाणिए दे सात बार डुबकी लगाई जेबे आखरी बार से पाणिए ते बारे निकल़ेया तेबे से परमेशरे ठीक करीता था

परमेशरे इस्राएलो रे लोका गे ओर बऊत जे भविष्यवक्ता पेजे तिने सबी लोका ते मूर्तिया री पूजा करनी बंद करने खे बोलेया इजी री बजाए, तिना खे एक दुजे साथे न्याय साथे व्यवहार करना चाईयो ओर एक दुजे पांदे दया करनी चाईयो तिने भविष्यवक्ते लोका खे चतौणी दिती की तिना खे बुरे काम करना बंद करी देना चाईयो ओर इजी री बजाए परमेशरो री गल्ल मानणी चाईयो जे तिने लोके ऐड़ा नी कित्तेया तेबे परमेशरो तिना खे दोषी मानी की तिना रा न्याय करोना, ओर तिना खे सजा देणी

काफी बखतो तक, तिने लोके परमेशरो री आज्ञा रा पालन नी कित्तेया तिने भविष्यवक्तेया साथे बुरा बर्ताव कित्तेया ओर एथो तक की कदी कदी से काईते एक बार, तिने यिर्मयाह भविष्यवक्ता सूके कुएं दे पाईता ओर से तेती मरने खे छाड़ीता से कुएं रे तल़ो रे चीकड़ो दे तसी गा पर तेबे राजे खे तेस पांदे दया आई ओर तिने आपणे सैनिका खे ऊकम दित्तेया की यिर्मयाहो रे मरने ते पईले तेसखे कुएं ते बारे खींजी लो

भविष्यवक्ते परमेशरो री तरफा ते बोलना शुरु कित्तेया चाए लोके तिना ते नफरत किती तिने लोका खे चतौणी दिती की जे तिने पश्चाताप नी कित्तेयातो परमेशरोसेयो खत्म करी देणे तिने लोका खे ये बी याद कराया की परमेशरे तिना गे मसीह खे पेजणे री प्रतिज्ञा किती