27. दया करने वाल़े सामरिए री कआणी

एक दिन, यहूदी व्यवस्था रा एक तर्म गुरू यीशुए रे नेड़े आया से सबी खे ये दखाणा चाओ था कि यीशु गल़त तरिके ते शिक्षा देया करो था इजिखे तिने बोलेया, “ओ गुरु, अनन्त जीवन पाणे खे आऊं क्या करूँ?” यीशुए उतर दितेया, “परमेशरो रे बिधानो रे क्या लिखी राखेया?”

तिने आदमिये बोलेया, “से बोलोई कि आपणे परमेशरो ते आपणे सारे मन, प्राण, सामर्थ, ओर बुदिया ते प्यार राख ओर आपणे पड़ोसिये साथे आपु जेड़ा प्यार राख” यीशुए उतर दितेया, “तू बिलकुल ठीक ए जे तू ऐड़ा करे, तो ताखे अनन्त जीवन मिलणा”

पर से बिधानो रा गुरू लोका खे दखाणा चाओ था कि तेसरा जीवन जीणे रा टंग ठीक था इजीखे तिने यीशुए ते पूछेया, “ठीक ए, तेबे मेरा पड़ोसी कुण ए?”

यीशुए तेस बिधानो रे गुरूए खे एक कआणी बताणे रे जरिये उतर दितेया “एक यहूदी आदमी था से एक सड़का रिये ऊई की यरूशलेमो ते यरीहो री यात्रा करेया करो था”

पर कई डाकुऐ से देखेया ओर तेस पांदे अमला करीता तिने तेसरा सब कुछ लई ला ओर से मरने तक कुटेया तेबे से चली गे”

तिजीते थोड़ी देर बाद, एक यहूदी पुरोईत तेते सड़का रिये ऊई की गया तिने पुरोईतेसे आदमी सड़का दे पड़ेया रा देखेया जेबे तिने तेसखे देखेया तेबे से सड़का री दुजिया तरफा खे जाई की आगे चली गा तिने तेस आदमिये खे पूरीया तरआ ते अनदेखा करी ता”

ईजी ते बाद कुछ बखत बितणे पांदे, एक लेवी तेसा सड़का रिये आया (लेवी यहूदिया रा एक गोत्र था जिने मन्दरो रे पुरोईता री मताद किती थी) से लेवी बी सड़का री दुजीया तरफा खे निकल़ीगा तिने बी तेस आदमीये खे अनदेखा करिता”

“आगला जणा जो तेसा सड़का रिये आया से सामरिया रा एक मर्द था (सामरी ओर यहूदी एक दूजे ते नफरत करो थे) तिने सामरीये सड़का दे से आदमी देखेया कि से यहूदी था, पर फेर बी तिने तेस पांदे बऊत तरस खाया से तेस नेड़े गया ओर तेस रे काओ दे पटियाँ बानीयाँ

फेर तिने सामरीये तेस आदमिये खे आपणे गधे पांदे राखेया ओर तेसखे तेसा सड़का ते एकी सराई दे लेई गा जेती तिने तेसरी देखपाल़ करेया किती”

दुजे दिन, तेस सामरिये खे आगे जाणा बऊत जरूरी था तिने तेस सराई रे मालको खे कुछ तअन दितेया तिने तेसखे बोलेया, “ऐस आदमिये री देखपाल़ करना जे ऐते तअनो ते अलावा तेरा कुछ ओर तअन खर्च ओ तो वापस आऊणे पांदे मां तेरे तेस खर्चे रा पुगतान करी देणा”

फेर यीशुए तेस बिधानो रे गुरूए ते पुछेया, “तुसे क्या सोचोए? इना तीऊँ लोका ते कुण तेस आदमिये रा पड़ोसी आ जेसखे लूटेया ओर कुटेया गया था?” तिने उतर दितेया, “सेई जो तेस पाँदे दया करने वाल़ा था” यीशुए तेसते बोलेया, तू जा ओर ऐड़ा ई कर”