30. यीशु पाँज ह्जार लोका खे रोटी खुल़ाओआ

यीशुए आपणे प्रेरिता खे प्रचार करने ओर लोका खे शिक्षा देणे खे बऊत जे लग-लग गांवांदे पेजे जेबे सेयो तेती आये जेती यीशु था तेबे तिने तेसखे बोलेया कि तिने क्या कितेया था तेबे यीशुए तिना खे पाणिए री चिला रे दुजे कनारे तेस साथे एक शांत जगा दे जाई कि कुछ बखतो तक अराम करने खे बुलाया पर सेयो एकी किस्तिया पांदे चढ़ी गे ओर पाणिए री चिला रे दुजे कनारे चली गे

पर तेथी बऊत जे ऐड़े लोक थे जिने यीशु ओर चेलेया खे किस्तिया रे जादे ऊए देखेया था सेओ लोक तिना ते आगे चिला रे दुजे कनारे जाणे खे चिला रे कनारे-कनारे पांदे नठिगे पर जेबे यीशु ओर चेले पऊँचे तेबे लोका रा एक बड़ा चुँड तिना रा इंतजार करदे ऊए तेथी पईले तेई था

तेसा पीड़ा दे जवाणसा ओर बच्चेया री गिणतिया रे बिना 5,000 ते जादा मर्द थे यीशुए तिना लोका पांदे बड़ा पारी तरस खाया यीशुए रिया तँईं सेयो लोक बिना ग्वाल़ेया रिया पेडा जेड़े थे ईजीखे तिने तिनाखे शिक्षा दिती ओर तिना रे बीचे जो लोक बमार थे तिनाखे ठीक कितेया

दिनो रे अंतो रे, चेलेया यीशुए ते बोलेया, “ऐबे देर ऊईगी ओर नेड़े तेड़े कोई शईर नि ए इना लोका खे पेजी दे ताकि सेयो जाई की खाणे खे कुछ लई लो”

पर यीशुए चेलेया ते बोलेया, “तुसे तिनाखे खाणे खे कुछ देयो” तिने उतर दितेया, “आसे ऐड़ा किंयाँ करी सकुँए? आसा गे कुल पाँज रोटीया ओर दो छोटिया मछलिया ए”

यीशुए आपणे चेलेया ते बोलेया कि सेयो पीड़ा रे लोका खे काओ पांदे पंजा-पंजा रे चुंडो रे बईठणे खे बोलो

तेबे यीशुए पाँज रोटिया ओर दो मछलिया खे लई की स्वर्गो रिया तरफा खे देखेया, ओर तिना रोटिया लई कि परमेशरो खे तन्यावाद दितेया

फेर यीशुए रोटी ओर मछलिया खे टुकड़ेया रे तोड़ेया तिने लोका खे देणे खे आपणे चेलेया खे सेयो टुकड़े देईते चेले तिना रोटिया खे बांडदे रए, ओर से कदीबी खत्म नि ऊआ सेयो लोक खाई कि रजी गे

तेसते बाद, चेलेया से रोटी कट्ठी किती जो बचीगी थी ओर तिना ते बारा टोकरिया परी गिया से सारा खाणा तिना पाँज रोटिया ओर दो मछलिया ते आया था