34. यीशु दुजिया काअणिया री शिक्षा देओआ

यीशुए परमेशरो रे राज्य रे बारे दे ओरी बऊत जिया काअणिया सुणाईया उदारणो खे, तिने बोलेया, “परमेशरो रा राज्य एक आऊरिया रे बिऊए जेड़ा ए जेसखे किने आपणे डोरूआ दे बाई राखेया तुसे जाणोए की आऊरिया रा बिऊ सारे बिऊआ बीचा ते सबी ते छोटा ओआ”

पर जेबे आऊरिया रा बिऊ बड़ी जाओआ तेबे से बगीचे रेया सारे ड़ाला बीचे सबी ते बड़ा ऊई जाओआ, इतणा बड़ा की पंछी आई की तेसरीया ड़ाल़िया पांदे अराम करोए”

यीशुए एक ओर काअणी बताई, “परमेशरो रा राज्य खमीरो जेड़ा ए जेसखे लई की एक जवाणस आटे रे पेड़े दे मिलाई देओई तेबे से सारे पेड़े दे मिली जाओआ”

“स्वर्गो रा राज्य तेस खजाने जेड़ा ए जेसखे किने डोरूआ दे लकोई राखेया ओ केसी ओर आदमीये खे से खजाना मिली गा ओर तिने तिजी री बऊत ईच्छा किती ईजी खे तिने से फेर दबाई ता से खुशिया ते इतना परेया रा था कि तिने जाई की आपणा सब कुछ बेची ता ताकि से तेस डोरुए खे खरीदी सको जेती से खजाना था”

“स्वर्गो रा राज्य एक बऊत कीमती शुद्ध मोतीया जेड़ा बी ए जेबे कोई मोतिया रा बपारी तेसखे पाई लओआ तेबे से तेसखे खरीदणे रिया तंई आपणा सब कुछ बेची देओआ”

तेती कुछ लोक थे जो सोचो थे कि परमेशर तिनाखे ईजी खे मानोआक्योंकि से पले काम करने लगी रे ये लोक ऐड़े लोका खे तुच्छ मानो थे जो तिना पले कामा खे नी करदे थे ईजी खे यीशुए तिना खे ये काअणी बताई: “दो आदमी थे ओर दोनों ई प्रार्थना करने खे मंदरो दे गए तिना बीचा ते एक रिश्वत लेणे वाला था, ओर दुजा एक तर्मी अगुवा था”

“तिने तार्मिक माणूंए इयां प्रार्थना किती, ‘ओ परमेशर, तेरा धन्यवाद हो कि आऊं ओरी लोका जेड़ा जिया डाकू, न्याय ना करने वाला आदमी, व्यभिचारी, या एथो तक कि एती जो आये तेस रिश्वत लेणे वाले जेड़े एक पापी नि ए”

उदारणा रिया तंई, आऊं हर अफ्ते दे दो बार बरत राखुँआ, ओर माखे मिलणे वाले तअन ओर समानो रा दसवाँ ईस्सा ताखे देऊँआ”

“पर से रिश्वत लणे वाला तेस तर्मी अगुवे ते बऊत दूर खड़ा ऊई गा तिने ऊबे स्वर्गो रिया तरफा खे आखी बी नी चकीया एते रे बजाए, तिने आपणीया मुट्ठी साथे आपणी छातीया खे बाईया ओर प्रार्थना किती की, ‘ओ परमेशर, किरपा करी की मां पांदे दया कर कऊंकि आऊं एक पापी ए”

फेर यीशुए बोलेया, “आऊं तुसा ते सच बोलुआ, परमेशरे से रिश्वत लणे वाल़े री प्रार्थना खे सुणेया ओर तेसखे तर्मी ठराया पर तिने तेस तार्मिक माणुंए री प्रार्थना खे पसंद नी कितेया परमेशर हर एक कमंडीये रे सिरो खे निठा करोआ, पर तेस हर जणे खे आदर देणा जो आपणे आपू खे नम्र करोआ”