42. यीशु स्वर्गो खे चली जाणा

जेस दिने परमेशरे यीशुए खे मरे रेया बीचा ते जिऊंदा कितेया था, तेसरे दो चेले नेड़े रे गाँव दे जाणे लगी रे थे। चलदे ऊए से यीशुए साथे जो ऊआ था। तेसरे बारे दे गल्ला करेया करो थे, तिना खे आशा थी की से मसीह था, पर तेबे बी से मारेया गया था। ऐबे से जवाणसा बोलोईया की से फेर जिऊँदा हुई गा रा। से नी जाणो थे की केसा गल्ला पांदे विश्वास करना ए।

यीशुए तिना रे नेड़े आई की तिना साथे चलणा शुरु कितेया, पर से तेसखे पछयाणी नी सके। तिने पुछेया की से केते बारे दे गल्ला करने लगी रे। तिने तेसखे पिछले दिना दे यीशुए साथे ऊई री सारी कटना रे बारे दे बताया। तिने सोचेया की से केसी परदेशिया रे बारे दे गल्ला करने लगी रे थे जो नी जाणो था की यरुशलेमो दे क्या ऊआ था।

तेबे यीशुए तिना खे समजाया की परमेशरो रा वचन मसीह रे बारे दे क्या बोलोआ। बऊत पईले, भविष्यवक्ते बोलेया था की बुरेया लोका मसीहे खे दु:ख देणा ओर से काणा। पर भविष्यवक्ते ए बी बोलेया था की से तीजे दिने जीऊंदा ऊई जाणा।

जेबे से तेस शईरो दे पऊंचे जेती से दो जणे रुकणा चाओ थे, तदुए तक सांज हुई गी थी। तिने यीशुए खे तिना साथे रुकणे खे बोलेया, तेबे से तिना साथे एकी कअरो दे गया। आपणी सांजा की रोटी खाने खे से बईठी गे। यीशुए एक रोटी लई की तिजी खे परमेशरो रा तन्यावाद कितेया, ओर फेर से तोड़ी। तेबु ई, तिने जाणी ला की से यीशु था। पर तेसी बखते, से तिना रिया आखी ते राची गा।

तिने दुईं जणे एकी दुजे खे बोलेया, “से यीशु था। इजी खे जेबे तिने आसा खे परमेशरो रा वचन समजाया था तेबे आसे बऊत खुश थे। तेबुई, से निकल़ी की वापस यरुशलेमो खे गए। जेबे से पऊँचे तेबे तिने चेलेया खे बोलेया, “यीशु जिऊंदा ए। आसे से देखी राखेया।”

जेबे चेले गल्लाणे लगी रे थे, यीशु तेबुई तेस कमरे दे तिना साथे प्रकट ऊआ। तिने बोलेया, “तुसा खे शान्ति मिलो।” चेलेया सोचेया की से कोई पूत था, पर यीशुए बोलेया, “तुसे कऊं डरोए? तुसे ए कंऊ नी सोचदे की ए सच्चो दे आंऊ यीशु ए? मेरे आथो ओर पईरा खे देखो। पूतो गे एड़ा शरीर नी ऊंदा जेड़ा मांगे ए।” ए दखाणे खे की से पूत नी था, तिने खाणे खे कुछ मांगेया। तिने तेसखे मछलिया रा एक टुकड़ा दितेया, ओर तिने से खाई ला।

यीशुए बोलेया, “मेरे बारे दे परमेशरो रा वचन जो कुछ बी बोलोआ से पूरा ऊणा। मैं तुसा खे बताईता था की ऐते रा ऊणा जरुरी ए।” तेबे यीशुए तिना खे परमेशरो रा वचन ठीक टंगो ते समजाया। तिने बोलेया, “बऊत पईले भविष्यवक्ते लिखेया था की माखे, मसीहे खे दुख उठाणा पड़ना, मरना पड़ना ओर फेर तीजे दिने मरेया रे बीचा ते जीऊदा उणा पड़ना।”

“तिने भविष्यवक्ते ए बी लिखेया था की मेरे चेलेया परमेशरो रे वचनो री घोषणा करनी। तिना हर एकी खे पश्चाताप करने खे बताणा। जे से ऐड़ा करोगे तेबे परमेशरो तिना रे पाप माफ करने। मेरे चेलेया ऐस संदेशो रा प्रचार करना यरुशलेमो ते शुरु करना। तेबे से सबी जगा सबी जातिया बीचे जाणा। तुसे लोक मेरी हर एक गल्ल ओर कामो रे गवाए जो मैं बोलेया ओर कितेया था, ओर तिजी सबी रे बी जो मां साथे ऊआ।”

आगले चाल़िया दिना रे दौरान, यीशु आपणे चेलेया पांदे कई बार प्रकट ऊआ। एक बार तो से एकी बखतो पांदे 500 ते जादा लोका पांदे प्रकट ऊआ। तिने आपणे चेलेया पांदे कई तरीकेया साथे साबित कितेया की से जिऊंदा था, ओर तिने तिनाखे परमेशरो रे राज्य रे बारे दे शिक्षा दिती।

यीशुए आपणे चेलेया खे बोलेया, “ परमेशरे माखे स्वर्ग ओर तरतीया रे अर एक जणे पांदे राज करने रा अक्क देई राखेया। इजी खे ऐबे आऊं तुसा खे बोलुंआ: जाई की सबी जातिया रे लोका खे चेला बणाओ। ऐड़ा करने रिया तंई, तुसा तिना खे पिता, पुत्र, ओर पवित्र आत्मा रे नाओं ते बपतिस्मा देणा ए। जो कुछ बी मैं तुसा खे आज्ञा देई राखी तिना सबी गल्ला खे मानणा बी तुसा तिना खे सिखाणा ए। याद राखो, आऊं सदा खे तुसा साथे रऊंगा।”

यीशुए रे मरे ऊए बीचा ते जीऊंदा ऊणे रे चाल़िया दिना ते बाद, तिने आपणे चेलेया खे बोलेया, “जदुए तक मेरा पिता तुसाखे सामर्थ नी देंदा तदुए तक यरुशलेमो दे ठईरे दे रओ। तेस तुसा पांदे पवित्र आत्मा पेजणे रे जरिए ऐड़ा करना।” तेबे यीशु स्वर्गो दे चली गा, ओर एकी बादल़े से तिना रिया नजरा ते लकोई ला। स्वर्गो दे यीशु सबी चीजा पांदे राज करने ओर परमेशरो रे दाणे कनारे बईठी गा।