26. यीशु आपणी सेवकाईए शुरुआत करो।

शैतानै परीक्षा का मुखरणै का बाद, यीशु वापस गलील जिलै लै आया। एही स जगहा आसी जिंदे स रहो थिया। पवित्र आत्मा तेसलै हैन सामर्थ दैंदा लागादा थिया। होर यीशुए एकी जगहा का दूजी जगहा लै जायेकेरे, लोगा लै शिक्षा दैये। सभिए तेसरै बारे दे बांकी गला बोली।

तेखा यीशु नासरत नगरा लै डेया। जिंया स माठा शोरो थिया, तै स एस ही ग्रांवा दे रहो थिया। यहूदी लोगै आरामा करणै धैड़ै, स अराधना करणै जगहा लै डेया अगुवै तेसलै यशायाह भविषयदव्कता सन्देशै एक किताब दैये। सिंयो चाहो थिए कि स तेत मेंझा का पढ़ो। तै यीशुए तैसा किताबा खोलैकेरे तेता एक भाग लोगै कठै पढ़ा।

यीशुए एड़ेकेरे पढ़ा, “परमेश्वरै मूलै आपणा आत्मा दैयादा ताकि हाँ दरिद्र लोगा मेंझ सुसमाचार प्रचार करे सकू। तिनी हाँ एतिकठै भेजा कि हाँ कैदी आजाद करु, कांणै लै भी का हैरणै नजर दैउ, होर जूण दूजै लोगै दरडणै लायैदै तिन्हा लै छुटकारा दैउ। एही समा आसी, जिंया परमेश्वरा हाँमा गैश दया करणे होर महारे मदद करणे।’’

तेखा यीशु बैठे गौआ। सब लोग तेस हैन धैनै केरे हेरदै लागैदै थिये। सिंयो जैणो थिये कि पवित्र शास्त्रा जुण हिस्सा तिनी एबै पढ़ा थिया स मसीहै बारै दे था। यीशुए बोला, “जुण गला मौं थारै कठै ऐबै पढ़ी, सिंयो सच्ची लै एस समै घटदी लागीदी। “सभ लोग हैरान थिए तिन्है बोला, “किजै ए यसूफा शोरो नी आथी?’’

तिंया यीशुए बोला, “ए सच आसी कि लोग कसी तेस भविषयदव्कता कभै भी नी अपनांदी जुण तिन्है क्स्बै दे पला–बड़ा हो। एल्लियाह भविषयवक्ते समै दे, जिंया साढै चन साला तिक पांणे नी होई तिंया इस्राएला देशा दे हैन सारी विधवा थी। पर परमेश्वरै एल्लियाह इस्राएला देशा दे कसी भी विधवै मदद करणै कठै नी भेजी। एताका बजाय, तिनी एल्लियाह कस होरी देशी विधवा गोलै भेजा।’’

यीशुए बोलणा जारी डा, “होर एलीशा भविष्यदवक्तै समै दे, इस्राएल देशा दे हैन सारै लोग चमड़ी दाए केरे बमार थिये। पर एलीशै तिन्हा मेंझा का कोए भी चंगा नी की। तिनी सिर्फ इस्राएली लोगा दुश्मन सेनापति नामान चंगा किया। “पर जुण लोग शुणदै लागैदै थिए सिंयो यहूदी थिये। एतिकठै जिंया तिन्है स ए बोलदा शुंणा तिंया सिंयो सब तेस गैश गुस्सै होए।

नासरतै शहरै लोगै यीशु पाकड़ा होर स आराधनै जगहा गो का घसीटे केरे बाहरा लै निंया। होर तिन्है स एकी जानै टीलै गैशा लै निंया, ताकि तेस तिंदा का उन्दै शोटेकेरे मारे सको। पर यीशु भीड़ा मेंझा का निकड़े गोआ होर नासरत शहरा छाडेकेरे डे गोआ।

तेखा यीशु सारै गलील जिलै दे डेया, होर हैन सारै लोग तेस गोलै आयै। तिन्है एड़ै हैन सारै लोग तेस गो लै आंणै जुण बीमार होर अपंग थिये। तिन्हा मेंझा का एखो कांणै थिये, होर एखो लैंगड़ै, टौंणै या गूंगै थिये। होर यीशुए सिंयो चंगै कियै।

एताका अलावा, हैन सारै एड़ै लोग यीशु गो लै आंणै जिन्हा दे दुष्टात्मा थी। यीशुए दुष्टात्मा लै तिन्हा मेंझा का निकड़े जांणैया हुक्म दैया, होर सिंयो निकड़े गोई। सिंयो दुष्टात्मा बार-बार राढ़ुइ, “तू परमेश्वरा शोरो आसी!’’ भीड़ै लोग हैरान थियै, होर तिन्है परमेश्वरै महिमा कियै।

तेखा यीशुए बारहा मर्द छांटै जसलै तिनी आपणै प्रेरित बोला। इन्है प्रेरितै तेस सागे यात्रा किये होर तेसका शिक्षा ग्रहण किये।