27. दयावान सामरियै कथा

एकी धैड़ै, मूसै ब्यवस्थै शिक्षा दैणै आड़ै मेंझा का एक बड़ा परोहत यीशु गोलै आया। स सभी लै ए दसणा चाहो थिया कि यीशु गलत ढंगै केरे शिक्षा दैंदा लागादा थिया। एतिकठै तिनी बोला, “ओ गुरुआ सदा जीवन पांणै कठै हाँ किजै करु? यीशुए जबाब दैया, “मूसै ब्यवस्था जुण परमेश्वरै दैयेदे, तेतदे किजै लिखादा आसी?

तिनी मंणछै बोला, “तेत दे एड़ा बोलादा कि तू आपणै परमेश्वरा सागे आपणै सारै शा, प्राण, सामर्थ, होर बुद्धी केरे प्यार कर। होर आपणै पड़ोसी सागे आपु सैही प्यार कर।’’ यीशुए जवाब दैया, “तू ठीक बोलदा लागादा! जै तू एड़ा करो, तै तालै सदा जीवन प्राप्त होंणा।’’

पर स मूसै ब्यवस्थै शिक्षा दैणै आड़ा बड़ा परोहत लोगा का दसणा चाहो थिया कि तेसरै जिणैआ ढंग सही थिया। एतिकठै तिनी यीशु का पूछा, “ठीक आसी, तै मेरा पड़ोसी कुण आसी?

यीशुए तेस ब्यव्स्थै शिक्षा दैणै आड़े परोह्ता लै एकी कथै जरियै जवाब दैया। “एक यहूदी मंणछ थिया जुण एकी सड़का का होयेकेरे यरुश्लेम नगरा का यरीहो नगरा लै यात्रा करदा लागादा थिया।’’

“पर एखो लुटेरै स हेरा होर तेस गैश हमला किया। तिन्है तेसरा सभ किछ लौआ होर स मारा -जिका तेखा तेस अधमरा छाडेकेरे नाठे गोए।’’

“एताका बाद तिंया ही एक यहूदी परोहत तैसा ही सड़का बाथी आ। तिनी परोहतै स मंणछ सड़का दै पड़ादा हेरा। जिंया तिनी स हेरा स सड़कै दूजी बालै जायेकेरे आगु लै ही हांडदा लागा। तिनी स मंणछ अनदेखा करे दैया।’’

“कुछ ही समा बीतणै का बाद, एक लेवी घरानैया आदमै तैसा सड़का बाथी आ (लेवी यहूदी लोगा एक गोत्र थिया जूणी मंदरा दे परोह्तै मदद किये थिये) तिनी लेवी आदमियै भी स अधमरा मंणछ पड़ादा हेरा होर तेस हेरेकेरे सड़का का दूजी बाखा लै निकड़े गोआ। तिनी भी स मंणछ अनदेखा करे दैया।’’

“आगला मंणछ जुण तैसा सड़का बाथी आया स सामरिया देशा दे रौहणै आड़ा एक मंणछ थिया। (सामरी लोग होर यहूदी लोग एकी दूजै सागै नफरत करो थिए) तेखा भी तिनी सामरी मंणछै जिंया सड़का दे पड़ादा स यहूदी मंणछ हेरा, तेखा तेस लै तेस गैश बड़ा तरस आ। तै स तेस गोलै डेया होर तेसरै जखमा दे पाटी बैनी।’’

“तेखा तिनी सामरियै स मंणछ आपणै गाधै गैश बशैड़ा होर स तैसा सड़का का एकी सरायै लै निंया। जिंदे तिनी तेसरे देखभाड़-करणै जारी डाये।’’

आगलै धैड़ै, तेस सामरी आदमी लै आपणै यात्रा जारी डांणै जरूरत थिए। तिनी तैसा सरायै मालका लै किछ ढब्ब़ै दैए। तिनी तेसका बोला, “एस मंणछै देख-भाड़ करया। जै इन्हा ढब्बै का अलावा तेरै किछ होर ढब्ब़े भी खर्च हुंग तै वापस हटणै का बाद मूं तेरे खर्चेया भुगतान करे हेरणा।”

तेखा यीशुए तेस व्यवस्थै शिक्षा दैणै आड़ै का पूछा, “तुम्है किजै सोचो? इन्हा चन मंणछा मेंझा का कुण तेस मंणछा पड़ोसे आसी जुण लूटा होर जिका थिया?’’ तिनी जबाब दैया, “स ही जुण तेस गैश दयावान थिया।’’ तिंया यीशुए तेसका बोला, “तू भी जा होर एड़ा ही कर।’’