28. जवान सेठ शासक

एकी धैड़ै, एक धनी यहूदी अगुवै यीशु गोलै आछेकेरे तेसका पूछा, “ओ बांकै गुरुआ, अनंत जीवनै पांणै कठै मूं किजै करणा चाहियै? यीशुए तेसका बोला, “तू मूलै ‘बांका’ किलै बोलो? बस एक ही बांका आसी होर स परमेश्वर आसी। पर जै तू अनंत जीवन पांणा चाहो तै परमेश्वरै ब्यवस्थै शिक्षा पालन कर।’’

तिनी पूछा, “मूलै कुण-कुण जी आज्ञा पालन करणै जरूरत आसी?” यीशुए जबाब दैया, “हत्या नी करी। ब्यभिचार नी करी। चोरी नी करी। झूठ नी बोली। आपणै बाबा होर आपणी आम्मा आदर करया, होर आपणै पड़ोसी सागे आपु सैंही प्यार करया।’’

पर तिनी जवान मर्दे बोला, “हाँ आपणै बचपना का ही इन्हा गला पालन करदा आयादा। मूलै सदा लै जिउंदै रोहंणै कठै एबै भी किजै करणै जरूरत आसी। “यीशुए तेसलै नजर दैये होर तेस सागे प्यार किया।

तेखा यीशुए जबाब दैया, “जै तू सिद्ध होंणा चाहो तै जायेकेरे आपणा सब किछ बेचे दै होर तेस धना कंगाला लै बांडे दै, होर तालै स्वर्गा दै धन मिड़णा। तिंया आछेकेरे मूं पिछो होए जा।’’

जिंया तिनी जवान मर्दे यीशुइ गला शुणी तै स हैन दुखी होए गोआ, किलैकी स हैन सेठ थिया होर आपणे सारे जायदाद दैणा नी चाहंदी थिया। स मुड़ेकेरै यीशु गो का डे गोआ।

तिंया यीशुए आपणै चेलै का बोला, “सेठ मंणछा परमेश्वरै राज्य दे प्रवेश करणा हैन कठण आसी! हाँ, एक सेठ मंणछा परमेश्वरै राज्य दे प्रवेश करणै मुकाबलै दे कस ऊंटा सिंणै छैदा का होयेकेरै निकड़णा सान आसी।’’

जिंया चेलै यीशुइ गला शुणी, तै सिंयो हैरान होये गोऐ। तिन्है बोला, “जै ए एड़ा आसी तै परमेश्वरा कुण बचाणा?’’

“यीशुए चेलै बालै नजर दैये होर बोला, “लोग आपु लै बचाये नी सकदै। एड़ा करणा नामुनकिन आसी।’’ पर परमेश्वरा लै किछ भी करणा नामुनकिन नी आथी।’’

पतरसै यीशु का बोला, “हांमै जुण तेरे चेलै आसी आपणा सब किछ छाडेकेरे ता पिछो होए गोए। तै म्हारा प्रतिफल किजै होंणा?’’

यीशुए जबाब दैया, “हर एक मंणछ जुणी मेरी बजहा का आपणा घौर, भाए, आम्मा, बाब होर बाल बच्चै, जायदाद छाडेदै, तेसलै तेताका शो गुणा ज्यादा मिड़णा होर सदा जीवन भी पाणा। पर एस संसारा दे हैन सारै लोग आपु लै ज्यादा ही समझो, सिंयो लोग परमेश्वरै नजरा दे कम होए जांणै। होर जुण एस संसारा दे तुच्छ समझै जाओ, सिंयो लोग परमेश्वरै नजरा दे बड़ै होए जांणै।’’