30. यीशु पांज हजार लोगा लै खांणै लै खैओ

यीशुए आपणै प्रेरित प्रचार करणै होर लोगा लै शिक्षा दैणै कठै लग–लग ग्रांवा ले भेजै। जिंया सिंयो तिंदा लै वापस हटै जिंदे यीशु थिया तै तिन्है तेसका दसा कि तिन्है किजै किया था। तिंया यीशुए सिंयो झिला का दूजी बाख तेस सागे एकी शांत जगहा लै जायेकेरे किछ समै तिक आराम करणै कठै आपु गोलै शादै। तै सिंयो नावा दे चढ़ै होर झीलै दूजै कनारै लै डे गोए ।

पर तिंदे हैन सारै लोग थिए जुणी यीशु होर चेलै नावा दे जांदै हेरै थिए। ए जैंणेकेरे लोग भी झिला का दूजी बाखा लै जांणै कठै झीलै कनारै-कनारै दे पैदल दौड़ै होर त्तिन्हा का पैहलै पूज्जै। जिंया यीशु होर चेलै पूज्जै तै इन्हा ही लोगा एक बड़ा झुण्ड तिन्हा न्हैड़दा तिंदे पैहलै का थिया।

तैसा भीड़ा दे बेटड़ी होर शोरुए गिनती बगैर 5,000 का ज्यादै मर्द थियै। यीशुए तिन्हा लोगा गैश बड़ा तरस खया। किलैकि यीशु लै सिंयो लोग तिन्हा भेड़ा सैंई थिए, जसरा कोए फवाल नी होंदी। एतिकठै तिनी तिन्हा लै शिक्षा दैए होर तिन्हा मेंझा का जुण लोग बमार थिए सिंयो चंगै कियै।

धैड़ै अंता दे, चेलै यीशु का बोला, “एबै बेर होए गोएदे होर ओरो पोरो किंदे कोए नगर भी नी आथी। इन्हा लोगा बिदा कर ताकि सिंयो जायेकेरे किछ खांणै लै लओ।’’

पर यीशुए चेलै का बोला, “तुम्है तिन्हा लै किछ खांणै लै दैओ!” तिन्है जबाब दैया, “हाँमै एड़ा नहीं करे सकदै? हाँमा का सिर्फ पांज रोटी होर दुए माठी माछड़ी आसी।’’

यीशुए आपणै चेलै का बोला कि सिंयो भीड़ै लोगा लै घा गैश पजा-पजा झुंडा दै बैठणै लै बोलो।

तै यीशुए पांज रोटी होर दुए माछड़ी लौयेकेरे स्वर्गा बाखा लै हेरा, होर तेस खांणै कठै परमेश्वरा लै धन्यवाद दैया।

होर यीशु रोटी चोड़े-चोड़े केरे चेलै लै दैंदा लागा ताकि सिंयो लोगा लै बांडो, होर सिंयो दुए माछड़ी भी तिन्हा सभी लै बांड़ी। चेलै तेस खांणै बांडदै रौहै, होर स बाख भी खत्म नी होई! सिंयो सभ लोग खायेकेरे रजै भी गोए।

तेताका बाद, चेलै सिंयो बचैदै छौंणै कठै किये जुण खाणै का बचे गोए थिए। होर सिंयो छौंणै केरे भरुएदै बारहा छाबड़ै चकै! स सारै खांणै लै तिन्हा पांज रोटी होर दुई माछड़ी का बचेदे थिये।