31. यीशु पांणी गैश हान्ड़ो

पांज हजार लोगा लै खांणै खैणै का बाद, यीशुए आपणै चेलै लै नावा दे चढ़णै लै बोला। तिनी तिन्हा लै झिला का पारा बाखा लै जांणै लै बोला जबकि स थोड़े समै लै तिथी रुके गोआ। तै चेलै नाठै गोए होर यीशुए भीड़ै लोग बिदा कियै कि सिंयो आपणै घौरा लै जाओ। एताका बाद, यीशु प्रार्थना करणै कठै एकी धारा गैशा लै नाठै गोआ। तिंदे स कली थिया, होर तिनी रैचे बेरा तिक प्रार्थना किये।

तेस समै, चेलै आपणी नावा पांणी छाली मेंझा का खिंचदै लागैदै थिये, पर बागरे तिन्है खलाफ आछदे लागेदे थिये। हैंन रैच होंणै का बाद भी सिंयो चेलै सिर्फ झीलै मैंझा दे ही पुज्जै थियै।

तेस समै यीशु प्रार्थना करे केरे मुका होर आपणै चेलै गोलै बापस जांणा शुरू किया। स नावा बाखा लै जांणै कठै पांणी गैश हांडदा लागा।

तिंया चेलै स हेरा। सिंयो हैन डरे गोए किलैकी तिन्है सोचा था कि स कोए भूत आसी। यीशु जैणो थिया की सिंयो डरे गोए थियै, एतीकठै तिनी तिन्हा लै हाका लायेकेरे बोला, “डरी नी आथी, हाँ ही आसी।’’

तिंया पतरसै यीशु का बोला, “ओ प्रभुआ, जै ए तू आसी तै मूलै पांणी गैश हान्ड़ेकेरे आपु गोलै आछणै आज्ञा दै।” यीशुए पतरसा का बोला, “आछ!’’

तै पतरस नावा का उतरे गोआ होर यीशु गोलै जांणै कठै पाणी गैश हांडदा लागा। पर थोड़ै दूर जायेकेरे, तिनी आपणी आखै यीशु का फेरे लौई होर छाली हेरदा लागा होर बागर भांण महसूस करदा लागा।

तिंया पतरस डरे गोआ होर पाणी दे डुबदा लागा स राड़ूआ, “ओ प्रभुआ मूं बचा!” यीशुए तेस ही समै हाथ बढायेकेरे स पाकड़े लौआ, तिंया तिनी पतरसा का बोला, “तेरा बिश्वास हैन कम आसी! तेरा धैन डांणै कठै तौं मूं गैश बिश्वास किलै नी करी?’’

तिंया यीशु होर पतरस नावा दे चढ़े गोए, होर तिंया ही बागर भांण बंद होए गोआ। पाणे शांत होए गोआ चेलै हैरान होयेकेरे यीशुआ गो घुटणै टेकेकेरे तेसरे आराधना किये होर तेसका बोला, “सची लै ही तू परमेश्वरा शोरो आसी।’’